Tsaychömi Tayta Dioswan Tinkuna Toldu kaykarqan. Tsay toldutaqa Tayta Diospa sirviqnin Moisésmi tsunyaq jirkacho ruratsishqa karqan. 4 Tayta Diospa babulninqa manami Tinkuna Tolduchönatsu karqan, sinöqa Jerusaléncho David ruratsinqan tolduchömi. Tsay tolducho churaränanpämi Quiriat-Jearim markapita Jerusalénman David apatsirqan.^† 5 Hurpa willkan y Uripa tsurin Bezaleel ruranqan bronci altarqa^† Gabaónllachörämi kaykarqan. Tsay altarqa Tayta Dioswan Tinkuna Toldu ñöpanchömi karqan. Tsaymanmi llapan runakunawan Tayta Diosta mañakuq Salomón aywayarqan.

6 Tayta Diospa ñöpancho kaykaq bronci altarchömi sacrificiuta rupatsir juk waranqa (1,000) uywakunata Salomón rupatsirqan.

7 Tsay paqasmi Salomónta yuripaykur Tayta Dios nirqan: “Imatapis mañakamanqaykitami kamaripäshayki”.

8 Tsaymi Salomón nirqan: “Tayta Dios, qamqa allimi yanapashqayki taytä Davidta. Kananqa noqatanami paypa trokin rey kanäpä churamashqayki. 9 Mandanqä runakunaqa lamar kuchuncho aqushanörämi yupaytapis mana atipaypä kaykäyan.^† Tayta Dios, tsaymi mañakamü taytä Davidta awninqaykinölla^† yanapaykamänaykipä. 10 Kuyanqayki Israel runakunata shumaq mandanäpä alli yarpaytawan yachayta qaraykallämay. Yarpaynï shumaq mana kaptinqa kaytsika runakunata manami mandayta kamäpakushätsu”.

11 Tayta Diosnami nirqan: “Kushikümi kuyanqä Israel runakunata shumaq mandanaykipä alli yarpaytawan yachayta mañakamaptiki. Manami mañakamashqaykitsu imaykayuq kanaykipä, respitashqa kanaykipä, contrayki runakunata ushakätsinäpä ni atska wata kawanaykipäpis. 12 Mañakamanqaykinöllami yanapashayki alli yarpayyuq y yachaq kanaykipä. Tsaynöllami yanapashayki imaykayuq kanaykipä y respitashqa kanaykipä. Punta kaq reykunapis manami qam kanaykipä kanqannöqa kayashqatsu. Tsaynöpis qepa yaykuq reykuna qammanqa manami tinkuyanqatsu”.

13 Tsaypitanami Gabaón markacho Tinkuna Toldu kaqpita Jerusalénman Salomón kutikur Israel runakunata mandar qallaykurqan.

14 Salomónmi tsaytsika carrëtakunata y cawallukunata rantirqan. Tsaynöpami paypa karqan juk waranqa chusku pachak (1,400) carrëtankuna y chunka ishkay waranqa (12,000) cawallunkuna.^† Tsay cawallukunatami wakinta churarqan guërra carrëtakuna kaykäyanqan cuartelkunacho kayänanpä y wakintana churarqan Jerusalén palaciun cercacho kayänanpä.

15 Rey Salomón qoritsinqan qoripis qellaypis ruminörämi Jerusaléncho atska karqan.^† Tsaynöllami cedru jachatapis Sefelacho plantatsirqan hïgus jachanörä tsaytsika kananpä.

16 Salomón kachanqan negociantikunami Egiptupita y Ciliciapita cawallukunata rantiyämuq.^† 17 Egiptupita rantiyämunqan juk carrëtami soqta pachak (600) qellay cuestaq y juk cawallunami juk pachak pitsqa chunka (150) qellay cuestaq. Tsay cawallukunata y carrëtakunatami wakintaqa rantikuyaq heteo runakunapa mandaqnin reykunata y wakintana Siria runakunapa mandaqnin reykunata.