7
Salomón mañakuyta ushaskiptinmi ciëlupita nina tsarimur rupatsina kaq sacrificiuta y wakin sacrificiukunatapis rupar usharqan.† Tsaynöllami Tayta Diospa pukutayninpis templuman juntarqan. 2 Tsaynö juntaptinmi templuman yaykuyta sacerdötikuna kamäpakuyarqantsu. 3 Nina urämuptin Tayta Diospa pukutaynin templuman juntaqta rikarmi Israel runakunaqa patsaman lätakaykuyarqan. Tayta Diosta adorar alabarmi kaynö niyarqan:“¡Tayta Diosqa allillata ruraqmi!
¡Kuyakuq kayninqa imaypis manami ushakantsu!”†
4 Tsaypitanami rey Salomón y llapan Israel runakuna Tayta Diospä sacrificiukunata rupatsiyarqan. 5 Tsaymi rupatsiyarqan ishkay chunka ishkay waranqa (22,000) törukunata y juk pachak ishkay chunka waranqa (120,000) üshakunatawan cabrakunata. Tsaynömi Tayta Diospä shäritsinqan templuta llapan Israel runakunawan Salomón bendisayarqan.
6 Sitiunkunaman sacerdötikuna ichiykurmi levitakunapa puntancho cornëtakunata tukayarqan. Tsaynöllami Tayta Diosta alabayänanpä rey David ruratsinqan instrumentukunata tukar levitakuna cantayarqan: “¡Mana ushakaqmi kuyakuyninqa!” nir. Tsayyaqmi llapan Israel runakuna ichiraykäyarqan.
7 Rupatsina kaq sacrificiukuna, tsaki mikuy ofrendakuna y alli päsakuy sacrificiukuna tsaytsika kaptinmi bronci altar ayparqantsu rupatsiyänanpä. Tsaymi templupa patiun chawpintapis Salomón bendisarqan tsay pampacho rupatsiyänanpä.
8 Tsaypitanami llapan Israel runakunawan Ramäda fiestata Salomón rurarqan. Hamat markaman yaykunapita patsa hasta Egipto raqra kuchunpita patsami tsay fiestaman atska runakuna shayämurqan. 9 Altarta bendisar qanchis junaq fiestata rurayanqannömi Ramäda fiestatapis qanchis junaq rurayarqan. Ramäda fiestata rurayta ushaskirmi Diosta adorarnin mas juk junaq fiestata rurayarqan. 10 Qanchis kaq killa ishkay chunka kimsa (23) kaq junaqcho fiesta rurayta ushaskirmi runakuna kutikuyänanpä rey Salomón despacharqan. Wayinkunapa kushishqa kutikurmi Tayta Diosta agradëcikuyarqan Davidta, Salomónta y kuyanqan Israel runakunata yanapanqanpita.
Salomónta Tayta Dios awninqan
11 Yarpanqannömi Salomónqa Tayta Diospa templunta y rey täkunan palaciuta shäritsir usharqan. 12 Tsaypitanami paqaspa yuripaykur Salomónta Tayta Dios nirqan: “Mañakamanqaykitami wiyashqä. Tsaymi shäritsinqayki templuta akrashqä sacrificiuta tsaycho rupatsiyänaykipä. 13 Tsaymi mana tamyatsimuptï, mikuykunata ushayänanpä chukllushkunata kachamuptï y pesti qeshyata kachamuptï 14 kuyanqä runakuna jutsata rurayanqanta tantiyakur perdonta mañakayämaptin, ashiyämaptin y jutsa rurayninkunata kachariyaptin mañakayämanqanta ciëlupita patsa wiyashä. Jutsankunata perdonarmi nacionninkunaman bendicionnïta churashä.
15 “Kay templuman shamuykur runakuna mañakayämanqantami wiyashä. 16 Kay templucho imayyaqpis tänäpä akrashqa karmi mana kachaypa imaypis rikashä.
17 “Qampis taytayki Davidnö llapan ninqäta cäsukamar leynïkunata y mandamientükunata cumplir kawaptikiqa 18 paywan pactuta rurar awninqänöllami qampita aywaraqkuna imayyaqpis Israel runakunapa mandaqnin rey kayanqa.†
19 “Leynïkunata y mandamientükunata mana cäsukurnin juk dioskunata adorayaptikiqa 20 qamkunata rikatsinqä nacionpita qarquyäshaykimi. Adorayämänaykipä shäritsishqa kaptikipis taykanqä templuta kacharishämi. Qamkunata castigaptïmi juklä nacioncho taq runakunapis kushipäyäshurniki penqakuyman churayäshunki. 21 Kay templu kuyayllapä kaptinpis raqällana kaykaqta rikaykurmi runakuna mantsarirnin niyanqa: ‘¡Imanirrä kay nación runakunata y kay templutapis Tayta Dios ushakätsishqa!’† 22 Tsaymi niyanqa: ‘Yärakuyanqan Tayta Diosta sirviyänanpa trokin juk dioskunatana adorar sirviyanqanpitami paykunata tsaynö päsashqa. Unay castankunata Egiptupita Tayta Diosnin jipiykämuptinpis mana cäsukuyanqanpitami tsaynö castigashqa’ ”.