Juk dioskunata Salomón adoranqan
11
Salomónqa atska jäpa warmikunatami ashirqan warmin kananpä. Manami Faraónpa tsurillantsu warmin karqan, tsaypa trokinqa warminkuna karqan Moab nacionpita, Amón nacionpita, Edom nacionpita, Sidón markapita y heteo runakunapitapis. 2 Jäpa warmikunawan Israel runakuna majatsakäyänanta mana munarmi Tayta Dios nishqa karqan: “Jäpa nación warmikunawanqa ama täyankitsu ni paykunapis qamkunawan täyanqatsu. Tsay warmikunawan majatsakäyaptikiqa diosninkunatami adoratsiyäshunki”.†Tsaynö nikaptinpis Salomónqa mana cäsukurmi tsay warmikunawan tarqan. 3 Salomónpa warminkuna qanchis pachakmi (700) kayarqan. Tsaynöllami concubïna warminkunapis kimsa pachak (300) kayarqan. Tsay warmikunami ïdulunkunata adorar Salomónta jutsaman ishkitsiyarqan. 4 Tsaymi Salomónqa awkinyayninchörä warminkunata cäsur ïdulukunata adorarqan. Manami taytan Davidnötsu Tayta Diosllaman yärakur kawarqan. 5 Tsaymi Salomónqa adorarqan Sidón runakuna adorayanqan Astoret diösata y amonita runakuna adorayanqan melanaypä Milcom diosta.
6 Tsaynö rurar Salomónqa manami taytan Davidnötsu llapan shonqunwan Tayta Diosta cäsukur kawarqan, tsaypa trokinqa Tayta Dios mana munanqantami rurarqan. 7 Tsaymi Jerusalén markapa tsimpan jirkancho moabita runakuna adorayanqan melanaypä Quemos diospä altarta shäritsirqan. Tsaynöllami altarta shäritsirqan amonita runakuna adorayanqan melanaypä Moloc diospäpis. 8 Tsaynöllami jäpa warminkuna adorayanqan dioskunapä altarta Salomón ruratsirqan. Tsay altarkunachömi tsay warmikuna diosninkunapä inciensiutapis sacrificiukunatapis rupatsiyaq.
9 Mana cäsukur juk dioskunata Salomón adoranqanpitami Tayta Dios pasaypa ajanarqan. Salomón tsaynö rurarqan Israel runakunata kuyaq Tayta Dios ishkay kuti yuripaykaptinmi.† 10 Payta yuripaykurmi Tayta Dios nirqan juk dioskunata imaypis mana adorananpä. Tsaynö nikaptinpis Salomón mana cäsukuptinmi 11 Tayta Dios nirqan: “Pactu ruranqäta manami cumplishqaykitsu y leynïkunatapis manami cäsukushqaykitsu. Tsaynö kanqaykipitami qampita aywaraqkuna wakin Israel runakunapa mandaqnin rey kayanqanatsu. Tsaypa trokinqa juk wätaynikinami rey kanqa. 12 Tsaynö kaptinpis taytayki Davidta kuyarmi kawanqaykiyaqqa tsay wätaynikita churashärätsu, tsaypa trokinqa tsuriki rey kaykaptinrämi pullan Israel nacionta makinpita qechushä. 13 Imanö kaptinpis sirvimaqnï David raykuq y akranqä Jerusalén raykuq juk trïbutaqa kachapäshärämi tsuriki mandananpä”.
Salomónpa contran shäriqkuna
14 Tsaypitanami edomita runa Hadadpa yarpayninman Tayta Dios churarqan Salomónpa contran shärinanpä. Hadadqa Edom nacionpa mandaqnin rey castami karqan. 15 Salomón manarä rey kaptinmi soldädunkunawan rey David aywar Edom nación runakunawan pelyayarqan. Nirkurmi Israel soldädukunapa capitannin Joab aywarqan pelyacho wanuq Israel soldädukunata pampananpä. Tsaycho kaykarmi Edom nacioncho llapan ollqu kaqkunata wanutsir usharqan. 16 Tsaynö wanutsir ushanqanyaqmi Israel soldädukunawan soqta killa Edomcho Joab täkurqan.
17 Tsay witsanqa wamrallarämi Hadad kaykarqan. Edomita runa mayinkunata Joab wanutsinqanta musyaskirmi taytanpa yanapaqninkunawan Egiptuman qeshpir aywakuyarqan. 18 Madián nacioncho kaykäyanqanpita Egiptuman aywakurmi Parán partiman chäyarqan. Tsaypitanami mas runakuna paykunawan aywayarqan. Tsaymi paykunawan aywar Egiptuman chaykurnin rey Faraón kaqman aywayarqan. Tsaynö chaykuyaptinmi Faraónqa wayikunata y chakrakunata rikatsirqan tsaycho täyänanpä. Tsaynöllami mikuytapis kamariparqan.
19 Hadadwan Faraónmi amïgü kar alläpa yachanänakuyarqan. Tsaymi Faraónqa warmin reina Tahpenespa ñañanwan Hadadta tätsirqan. 20 Hadadwan täyaptinmi yurirqan wawan Genubat. Paytami Faraónpa palaciuncho Tahpenes wätakurqan kikinpa wawankunatawan juntu.
21 Rey David y soldädunkunapa capitannin Joabpis wanunqanta musyaskirmi Faraónta Hadad nirqan: “Taytay, markäman kutikushäna”.
22 Tsaynö niptinmi Faraón nirqan: “¿Imanirtä markaykiman kutikuyta munaykanki? ¿Imatä kaycho pishïshunki?”
Tsaynö niptinmi Hadad nirqan: “Taytay, manami imapis pishïmantsu. Imanö kaptinpis markäpami kutikuyta munaykä”.
23 Tsaynöllami Eliadapa tsurin Rezónpa yarpayninman Tayta Dios churarqan Salomónpa contran shärinanpä. Ñöpataqa Soba markapa mandaqnin rey Hadad-ezerpa wätaynillanmi Rezón karqan. Wätay kaykanqanpitami qeshpir aywakurnin 24 asaltantikunawan takukar paykunapa cabecïllan rikakurqan. Hadad-ezerta rey David vinciskiptinmi Rezón y paywan puriq runakuna Damascuman qeshpir aywakuyarqan. Damascuchönami runakuna payta churayarqan rey kananpä. 25 Tsaynöpami Siria nacionpa mandaqnin rey kayta qallaykurqan. Israel runakunapa contran Hadad kanqannömi Salomón wanunqanyaq Rezónpis Israel runakunata chikir contran karqan.
Salomónpa contran Jeroboam shärinqan
26 Tsaynöllami Salomónpa contran shärirqan sirviqnin Jeroboam. Paypa taytanmi Nabat karqan y mamanmi Zerúa. Zerúaqa viüdami karqan. Paykunaqa Efraíncho Sereda markapitami kayarqan.
27 Kaychömi qellqaraykan Salomónpa contran imanö Jeroboam shärinqanpis. Rey Salomónqa taytan Davidpa Markanchömi Milo patak niyanqan pirqata y marka murälla kichakashqatapis allitsatsirqan. 28 Jeroboam kallpasapa alli chölu y habilösu kanqanta Salomón tantiyarmi Josépita aywaraq runakunapaa capataznin kananpä churarqan.
29 Jukpinmi Jerusalénpita Jeroboam yarqur Silupita profëta Ahías mushuq tünican jatishqa aywaykaqwan nänicho tinkurqan. Tsay höraqa manami pipis karqantsu. 30 Tsaychömi Ahíasqa jatiraykanqan mushuq tünicanta chunka ishkay pedäzuman rachiskir 31 chunka pedäzuta Jeroboamta aptatsir nirqan: “Yärakunqantsik Tayta Diosmi nin: ‘Salomónpa makinpita qechuskirmi chunka trïbuta entregashayki mandaqnin rey kanaykipä. 32 Sirvimaqnï David raykuq y Israel markakunapita akranqä Jerusalén marka raykuqmi Salomónta kachapaykushä juk trïbullatana mandananpä. 33 Tsaynömi rurashä Salomón manana cäsukamar Sidón runakuna adorayanqan Astoret diösata, moabita runakuna adorayanqan Quemos diosta y amonita runakuna adorayanqan Moloc diosta adoranqanpita. Payqa manami taytan Davidnötsu mandamientükunata, leynïkunata y ninqäkunatapis cäsukamashqa.
34 “ ‘Tsaynö kaptinpis sirvimänanpä akranqä David mandamientükunata y leynïkunata cäsukur kawanqanpitami Salomón kawanqanyaqqa llapan trïbu runakunapa mandaqnin kanqa. 35 Tsurin rey kaptinnami itsanqa chunka trïbu Israel runakunata qechuskir qamta entregashayki rey kanaykipä. 36 Salomónpa tsurintaqa kachapaykushä juk trïbullatanami mandananpä. Tsaynöpami sirvimaqnï Davidpita aywaraqkuna Jerusaléncho mandayta sïguiyanqa. Jerusalén markatami akrashqä imayyaqpis tsaycho adorayämänanpä.
37 “ ‘Qamtaqa churashayki Israel runakunapa mandaqnin rey kanaykipämi.b Tsaymi shonquyki yarpanqannö mandar kushikunki. 38 Sirvimaqnï rey David cäsukamanqannö qampis mandamientükunata y leynïkunata cumpliptikiqa Davidta yanapanqänöllami yanapashayki. Rey kanaykipä qamta churanqänöllami qampita aywaraqkunatapis churashä Israel runakunapa mandaqnin rey kayänanpä. 39 Davidpita aywaraqkunataqa mana cäsukayämanqanpita castigarpis kutin kutinqa manami castigashätsu’ ”.
40 Profëta Ahías tsaynö willanqanta musyarmi Jeroboamta Salomón wanutsiyta munarqan. Tsaymi Jeroboamqa Egiptupa mandaqnin Sisacman qeshpir tsaycho tarqan Salomón wanunqanyaq.
Rey Salomón wanunqan