Israel nación ishkayman rakikäyanqan
12
Roboamta rey kananpä churayänanpämi llapan Israel runakuna Siquem markaman qorikäyarqan. Tsaymanmi Roboampis aywarqan. 2 Tsayman qorikäyänanpä kanqanta musyarmi Nabatpa tsurin Jeroboam Egiptupita kutimurqan. Payqa Salomónpita qeshpir aywakunqanpita patsami Egiptucho tarqan.† 3 Tsaymi Israel runakuna qayatsiyaptin Israelman Jeroboam kutimurqan. Nirkurmi Israel runakunawan aywaykur Roboamta niyarqan: 4 “Taytaykiqa alläpami impuestukunata cobrayämashqa y faenakunachöpis pasaypami arutsiyämashqa. Paynöqa amana cobrayämaynatsu. Tsaynöpis amana alläpa arutsiyämaynatsu. Mañakuyanqäta awniyämaptikiqa sirviyäshaykimi”.5 Tsaynö niyaptinmi Roboam nirqan: “Mañakayämanqaykita shumaq yarpachakunqäyaq kimsa junaq shuyaykayämay. Nirkur kutiyämunki imata yarpanqätapis willanäpä”.
Tsaynö niptinmi aywakuyarqan.
6 Tsaypitanami taytanpa yätsiqnin mayor runakunawan Roboam qorikaykur tapukurqan: “¿Imatatä qamkuna yätsiyämanki tsay runakunata ninäpä?”
7 Tsaynö tapukuptinmi niyarqan: “Tsay runakunata shumaq yanapaptiki y alli shimillaykipa parlapaptikiqa imayyaqpis sirviyäshunkimi”.
8 Mayor runakuna yätsinqanta chaskinanpa trokinqa yuriy mayinkunata tapukuqmi Roboam aywarqan. Paykunatami Roboam churashqa karqan yätsiqnin kayänanpä. 9 Paykunatapis tapurmi Roboam nirqan: “Tsay runakunami rugakayämashqa impuestuta taytä alläpa cobranqannö manana cobranäpä. Tsaynöllami rugakayämashqa faenakunachöpis alläpa mana arutsinäpä. ¿Imatatä tsay runakunata nïman?”
10 Yuriy mayin chölukunami niyarqan: “Taytayki alläpa impuestukunata cobranqanta y alläpa arutsinqanta niyäshuptiki tsay runakunata ninki: ‘Taytä yaqa kanqanpitapis noqaqa mas yaqami kashä. 11 Pay ñakatsiyäshunqaykipitapis noqaqa peorrämi ñakatsiyäshayki. Taytä lätiguwan castigayäshunqaykipitapis noqaqa fiërru puntayuq lätiguwanrämi castigayäshayki’ ”.
12 Jitapanqan junaqnami Jeroboam y llapan Israel runakuna kutiyarqan Roboam imata ninqantapis musyayänanpä. 13 Kutiykuyaptinmi rey Roboamqa imatapis nirqantsu mayor runakuna yätsiyanqannöqa, sinöqa ayaq shiminpami parlaparqan. 14 Tsaymi chölukuna yätsiyanqannölla nirqan: “Taytä ñakatsiyäshunqaykipitapis noqaqa peorrämi ñakatsiyäshayki. Taytä lätiguwan castigayäshunqaykipitapis noqaqa fiërru puntayuq lätiguwanrämi castigayäshayki”.
15 Tsaynö nirmi runakuna rugakuyanqanta awnirqantsu. Mana awninanpäqa Tayta Diosmi kamakätsirqan Nabatpa tsurin Jeroboamta awninqanta cumplir. Jeroboamta awninqanta musyatsirqan Silo markapita profëta Ahíaswanmi.† 16 Rugakuyanqanta Roboam mana awniptinmi Israel runakuna niyarqan:
“¿Davidpitaku kawantsik imami paypita aywaraqta alläpa sirvinantsikpäqa?
Jinapis manami David castatsu kantsik paypa tsurinta qatiränantsikpäqa.
Payqa kikinpa castankunata mandakutsun.
Israel kaqkunaqa, llapantsik wayintsikpa kutikushun”.†
Tsaynö nirmi Israel runakuna wayinkunapa kutikuyarqan. 17 Paykuna rakikäyaptinpis Judá markakunacho taykaq Israel runakunaqa Roboamta manami kachariyarqantsu.
18 Tsaypitanami capataznin Adoramta Roboam kacharqan rakikaq Israel runakunata faenacho arutsinanpä. Chaptinmi Israel runakuna saqmaypa wanutsiyarqan. Wanutsiyanqanta musyaskirmi Roboamqa pasaypa mantsarirnin carrëtanman yarkurkur Jerusalénman qeshpir aywakurqan.
19 Roboamta kachariyanqanpita patsami Israel runakunaqa kananyaqpis David casta kaqtaqa chaskiyantsu mandaqnin rey kananpä.
20 Egiptupita Jeroboam kutimunqanta musyaskirmi llapan Israel runakuna payta qayaykatsir churayarqan rey kananpä. Judá trïbullanami David casta reypa makincho quëdarqan.
Israel mayinkunawan mana pelyayänanpä Semaías willakunqan
21 Jerusalénman Roboam kutiykurmi rakikaq Israel runakunata munayninman kutitsiyämunanpä Judá trïbu runakunapita y Benjamín trïbu runakunapita juk pachak puwaq chunka waranqa (180,000) allinnin soldädukunata qorirqan. 22 Tsaymi profëta Semaíasta Tayta Dios parlapar nirqan: 23 “Salomónpa tsurin Judá nacionpa mandaqnin rey Roboamta, Judá trïbu runakunata, Benjamín trïbu runakunata y wakin runakunatapis willar ninki: 24 ‘Tayta Diosmi nin: Noqami Israel nacionta rakishqä ishkay nación kananpä. Tsaynö kaykaptinqa Israel mayikikunawan pelyaq ama aywayaytsu. Tsaypa trokinqa jukniki juknikikuna wayikikunapa kutikuyay’ ”.
Tayta Diospa willakuqnin tsaynö niptinmi wayinkunapana llapan kutikuyarqan.
Qori torïtukunata Jeroboam ruratsinqan
25 Tsaypitanami Jeroboamqa Efraín jallqakunacho kaykaq Siquem markata allitsaskatsir tsayman aywarqan tänanpä. Nirkurnami Penuel markatapis allitsatsirqan. 26 Jeroboammi yarpachakur nirqan: “Davidpa willkan Roboamqa Israel runakunata qorirpis qoriykunmanchi. 27 Tsaynöpis Tayta Diospa templuncho sacrificiukunata rupatsiyänanpä Jerusalénman aywar Roboamwan amistarpis amistaykuyanmanchi. Tsaynö amistarqa wanuskatsimarchi Judá runakunapa mandaqnin rey Roboampa munayninman kutiyanqa”.
28 Tsaynö yarpachakuskirmi yätsiqninkunawan willanakuskir qoripita ishkay torïtukunata Jeroboam ruratsirqan. Nirkurmi Israel runakunata nirqan: “Israel runakuna, Jerusaléncho templuman alläpanami aywayashqayki. Kaychömi kaykan Egiptupita jipimushuqniki diosnikikuna”.†
29 Nirkurnami tsay torïtukunata churarqan jukaqta Bet-elman y jukaqtana Danman. 30 Tsay ïdulukunata Israel runakuna adorayanqanqa pasaypa jutsami karqan. Karu kaptinpis adorayänanpä hasta Danyaqmi aywayarqan.
31 Tsaynöllami maytsaycho altarkuna kanqancho wayikunata Jeroboam ruratsirqan. Tsaycho sacerdöti kayänanpämi mana Leví trïbu runakunatapis llutalla churarqan. 32 Tsaynöpis Jeroboam mandarqan Judácho Ramäda fiestata rurayanqannö Israel runakuna Bet-elchöpis cada wata fiestata rurayänanpämi. Tsay fiestatami qallaykuyaq puwaq killacho chunka pitsqa junaq kaykaptin. Bet-elcho fiesta kaptinmi kikin Jeroboam sacrificiukunata rupatsirqan qoripita rurashqa torïtukunata adorar. Tsaynöllami runakunata churarqan markakunacho kaq altarkunacho sacerdöti kayänanpä.
33 Tsaymi puwaq kaq killa kaykaptin chunka pitsqa junaqcho Jeroboamqa sacrificiukunata rupatsirqan Bet-elcho kaykaq altarcho. Kikinpa yarpayllanpitami fiestata rurayänanpä tsay junaqta akrarqan.† Tsaynöpis tsay fiestachömi altarman aywarqan inciensiuta rupatsinanpä.