Judápita shamuq profëta willakunqan
13
Juk kutinami profëtata Tayta Dios kacharqan Judápita Bet-elman. Bet-elman chaykurmi inciensiuta altarcho Jeroboam rupaykätsiqta tarirqan. 2 Tsaymi Tayta Dios tantiyatsinqannölla altarta parlapar jinchi nirqan: “¡Altar, altar! Markakunacho kaq altarkunapita shamuykurmi sacerdötikuna qampa janaykicho inciensiuwan qoshnitsiyan. Tsaymi Tayta Dios nin: ‘Davidpa castanpita juk wamra Josías jutiyuq yurirmi tsay mana alli sacerdötikunata wanuskatsir janaykicho rupatsinqa. Tsaynöllami tsay wanushqakunapa tullunkunatapis janaykicho rupatsinqa’ ”.a †3 Tayta Dios ninqanta willaskirmi tsay profëta nirqan: “Willanäpä Tayta Dios kachamanqanta musyanaykipämi kanan junaq rikanki kay altar pakiptin uchpanpis patsaman mashtakaqta”.
4 Bet-elcho kaykaq altarpa contran profëta tsaynö parlaptinmi rey Jeroboamqa makinta joqarkur nirqan: “¡Tsay runata prësu tsariyämuy!”
Tsaynö nikaptinmi rikran chukruskiptin kuyutsiyta kamäpakurqantsu. 5 Tsay hörami altar pakiptin janancho kaykaq uchpapis mashtakarqan. Tsaykuna päsarqan Tayta Diospa profëtan ninqannöllami.
6 Tsaymi rey Jeroboamqa profëtata rugakur nirqan: “Tayta Diosta mañakuykullay rikrä alliyänanpä”.
Tsaynö rugakuptinmi profëtaqa Tayta Diosta mañakurqan rikran alliyänanpa. Profëta mañakunqannöllami Jeroboampa rikran alliyaskirqan.
7 Alliyarkurmi profëtata rey Jeroboam nirqan: “Wayïman aywaykulläshun mikunantsikpä. Tsaynöpis qaraytami qarashayki”.
8 Tsaymi tsaynö niptin profëta nirqan: “Palaciuykicho kaqkunata pullanta rakipämaptikipis manami aywashätsu. Kaychöqa mikuytapis manami mikushätsu ni yakutapis manami upushätsu. 9 Kayman kachamarmi Tayta Dios nimashqa: ‘Tsaychöqa mikuytapis ama mikunkitsu, yakutapis ama upunkitsu ni aywanqayki nänipapis ama kutimunkitsu’ ”.
10 Tsaynö niskirmi profëtaqa Bet-elpita yarqur juk nänipana kutikurqan.
11 Tsay witsanmi Bet-elcho taykarqan juk awkin profëta. Paytami tsurinkuna wayinman kutiykur willayarqan Judápita shamuq profëta rey Jeroboamta imata ninqantapis. 12 Tsaynö willaptinmi awkin profëta tapurqan: “¿Mayqan nänipatä kutikushqa?” nir.
Tsaynö niptinmi tsurinkuna rikatsiyarqan mayqan nänipa kutikunqantapis. 13 Tsaypitanami awkin nirqan: “Ashnuta karunapaykayällämay”.
Tsaymi tsurinkuna karunapaskiyaptin muntakurkur aywarqan.
14 Profëtapa qepanta aywarmi tariparqan encina jacha chakincho jamaraykaqta. Tsaymi payta nirqan: “¿Qamku kaykanki Judápita shamuq profëta?”
Tsaynö tapuptinmi nirqan: “Awmi, noqami kaykä, taytay”.
15 Tsaynö niptinmi awkin profëta nirqan: “Taytay, imallatapis mikurkunantsikpä wayïman aku aywashun”.
16 Tsaynö niptinmi nirqan: “Qamwanpis manami wayikiman mikuq ni yaku upuq aywashätsu. 17 Kay particho imatapis mana mikunäpä, yakutapis mana upunäpä ni shamunqä nänipa mana kutinäpämi Tayta Dios nimashqa”.
18 Tsaynö niptinmi awkin profëta llullaparnin nirqan: “Noqapis qamnö profëtami kaykä. Tayta Diospa angelninmi yuripaykamar nimashqa wayïman pushaykur mikuytapis, yakutapis qaranäpä”.
19 Tsaymi Judápita shamuq profëta paypa wayinman aywaykur mikurqan y yakutapis upurqan.
20 Mësacho jamaraykäyaptinmi awkin profëtata Tayta Dios tantiyatsiptin 21 Judápita shamuq profëtata nirqan: “Tayta Diosmi nin: ‘Qamqa manami cäsukamashqaykitsu Bet-elcho mana mikunaykipä ni yakutapis mana upunaykipä ninqäta’. 22 Tayta Dios nishunqaykita mana cäsukur kayman kutiykamur mikunqaykipita y upunqaykipitami castaykikuna pamparäyanqanchöqa pampakunkitsu”.
23 Mikuyta mikuskiptin y yakuta upuskiptinnami awkin profëtaqa ashnuta karunaparqan muntakurkur aywakunanpä. 24 Judápita shamuq profëta aywaykaptinmi juk león yuripaykur wanuskatsirqan. Tsaymi ashnupis leonpis ayapa ñöpancho ichiraykäyarqan. 25 Tsaypa päsaq runakuna nänicho wanushqa profëta jitaraykaqta y ñöpancho león ichiraykaqta rikarmi awkin profëta tanqan markacho willakuyarqan.
26 Tsayta musyaskirmi awkin profëta nirqan: “Tsay runaqa Tayta Diosta mana cäsukuq profëtami kashqa. Mana wiyakunqanpitami león atacar wanutsinanpä Tayta Dios kacharishqa. Wanunanpä Tayta Dios ninqannöllami cumplishqa”.
27 Nirkurmi tsurinkunata nirqan: “Ashnuta karunapaykayällämay”.
Niptinmi tsurinkuna karunapäyarqan. 28 Tsaypita aywarmi awkin profëta tarirqan wanushqa jitaraykaqta y ñöpancho ashnupis leonpis ichiraykaqta. León manami mikushqatsu kashqa ayatapis ni ashnutapis. 29 Tsaynö kaykaqta tariykurmi ayata ashnuman chaqnakurkur markaman aparqan tsaycho täpaskir pampayänanpä. 30 Tsaymi kikinpa sepultüranman ayata churaykur waqarqan: “¡Ay wawqillay wawqi! ¿Imanirtä kachariykamashqayki?” nir.
31 Ayata pampaskirnami tsurinkunata rugakur nirqan: “Noqa wanuptï kay profëtata pampanqantsikman pampaykayällämanki. Aytsä ismur ushakaptin tullükunata qoriskir paypa tullunkuna kanqanman churaykuyanki. 32 Bet-elcho kaykaq altarpa contran y Samaria markakunacho kaykaq altarkunapa contran kay profëta willakunqanqa llapanpis ninqannöllami kanqa”.
33 Jeroboamqa profëta michaykaptinpis Tayta Diosta mana cäsukurmi pitapis sacerdöti kananpä llutalla churarqan. Nirkurmi tsay sacerdötikunata mandarqan markakunacho kaq altarkunacho sacrificiukunata rupatsiyänanpä. 34 Tsaynö ruranqan pasaypa jutsa kaptinmi achäqui karqan Jeroboampita aywaraqkuna Israelcho ushakäyänanpä.