Jeroboamta ima päsananpä kanqantapis profëta Ahías ninqan
14
Tsay witsanmi Jeroboampa tsurin Abías antsa jitaraykarqan. 2 Tsaymi Jeroboamqa warminta nirqan: “Warmï kanqaykita pipis cuentata mana qokunanpä juk niraq latsapata jatikuy. Nirkur ayway Silo markacho kaykaq profëta Ahíasman. Paymi nimarqan kay nacionpa mandaqnin rey kanäpä. 3 Paypä chunka tantata, tortillakunata y taksha uylluwan abëjapa mishkinta apakurkur ayway. Tsaykunata qarar tapunki wamrantsik alliyänanpä o antsänanpä kanqantapis”.4 Tsaynö niptinmi Jeroboam yätsinqannölla Silo markaman warmin aywar profëta Ahíaspa wayinman charqan. Ahíasqa pasaypa awkinna karmi reqikurqannatsu. 5 Tsaymi Ahíasta Tayta Dios nirqan: “Jeroboampa warminmi mana reqinaykipä juk niraq latsapan jatishqa shamunqa. Paymi qeshyaykaq wamranpä tapukushunki. Tsaynö chämuptin yätsinqänölla ninki”.
6 Tsay warmi punkupa yaykuykaqta tantiyaskirmi Ahías nirqan: “Päsakallämuy, Jeroboampa warmin. ¿Imanirtä pipis mana reqishunaykipä juk niraq latsapata jatikurkur shamushqayki? Tayta Diosmi nimashqa pasaypa desgracia päsashunaykipä kanqanta. 7 Kaypita kutiykur runayki Jeroboamta willanki Israel runakunata kuyaq Tayta Dios ninqanta: ‘Qamta akraskirnikimi churashqä Israel runakunapa mandaqnin rey kanaykipä. 8 Tsaynö churarmi Davidpita aywaraqta jipishqä Israel nacionpa mandaqnin rey kaykanqanpita. Tsaynö kaptinpis qamqa manami sirvimaqnï rey Davidnötsu mandamientükunata y leynïkunata llapan shonquykiwan cumplishqayki. 9 Cäsukamänaykipa trokinmi despreciamar runa fundinqan ïdulukunata adorar pasaypa ajanätsimashqayki. Tsaynö rurarqa wakin reykunapitapis qamqa peormi jutsata rurashqayki.
10 “ ‘Tsayta ruranqaykipitami kananqa qampita aywaraq llapan ollqu kaqkunata ushakätsishä, wätay o mana wätay kayaptinpis.† Qanrakunata jitaqnömi paykunata illakätsishä. 11 Markacho wanuqkunataqa allqukunami mikuyanqa. Markapita juklächo wanuqkunataqa wiskurkunawan condorkunami mikuyanqa’ ”.
Tsaynö niskirninmi Ahías nirqan: “Tsaynö kananpä kanqantaqa kikin Tayta Diosmi nimashqa”.
12 Tsaynö willaskirmi Jeroboampa warminta Ahías nirqan: “Kananqa markaykipana kutikuy. Markaykiman yaykuykaptikimi wawayki wanunqa. 13 Llapan Israel runakunami llakirnin waqar payta pampayanqa. Jeroboampa llapan tsurinkunapita tsay wamrallami Israel runakunata kuyaq Tayta Diospa shonqunpänö kashqa. Tsaymi Jeroboampa tsurinkunapita payllata tsaynö pampayanqa. 14 Tsaypita juk reytanami Tayta Dios churanqa Israel runakunata mandananpä. Paymi Jeroboampita aywaraqkunata llapanta ushakätsinqa. Llapan tsay ninqäkunaqa kanan junaqmi cumplir qallaykunqa.
15 “Asera diösapä rurayanqan ïdulukunata adorarmi Tayta Diosta Israel runakuna pasaypa ajanätsiyan. Tsaymi pasaypa castigar paykunata qarqunqa unay castankunata rikatsinqan alli nacionpita Éufrates mayu mas karuyaq. 16 Tsaynö qarquriykunqa Jeroboam jutsata rurar Israel runakunatapis jutsata ruratsinqanpitami”.
17 Tsaynö willaykuptinmi Jeroboampa warmin kutikurqan tanqan Tirsa markaman. Wayinman yaykuykaptinmi wamran wanuskirqan. 18 Tayta Diospa sirviqnin profëta Ahías willanqannöllami Israel runakuna waqar Jeroboampa tsurinta pampayarqan.
19 Jeroboam guërrata ruranqankuna y Israel runakunata llapan mandanqankunapis Israel nacionpa mandaqnin reykunapa acta librunchömi qellqaraykan. 20 Ishkay chunka ishkay (22) watami Israel runakunapa mandaqnin rey Jeroboam karqan. Pay wanuskiptinnami tsurin Nadabna rey karqan.
Judá nacioncho Roboam rey kanqan
21 Judáchöqa Salomónpa tsurin Roboammi rey kaykarqan. Mandayta qallaykunqan witsan chusku chunka juk (41) watayuqmi kaykarqan. Tayta Dios akranqan Jerusalénpitami chunka qanchis wata mandarqan. Israel runakunapa llapan trïbunkunacho kaykaq markakunapitami Jerusalénta Tayta Dios akrarqan payta tsaycho adorayänanpä. Roboampa mamanpa jutinmi Naama karqan. Payqa Amón nacionpitami karqan.
22 Roboam rey kanqan witsanmi Tayta Diosta mana cäsukur Judá runakuna jutsata rurayarqan unay castankunapitapis peorrä. 23 Tsaymi jirkankunachöpis y raprasapa jachakuna chakinchöpis wanka rumikunata ichirkatsir y Asera diösapä raku qerukunata jawiykur altarkunata shäritsiyarqan.† 24 Tsaychömi diosninkunata adorar runakunapis y warmikunapis altarkuna kanqancho jukwan jukwan kakuyaq.† Tsaynöpami Tayta Dios unay qarqunqan mana Israel runakunanölla pasaypa melanaypä jutsata rurayarqan.
25 Roboam pitsqa wata rey kaykaptinmi Egiptupa mandaqnin rey Sisac soldädunkunawan Jerusalénman atacayänanpä aywar† 26 Tayta Diospa templunpita y reypa palaciunpita llapan tesörunkunata apakuyarqan. Tsaynöllami apakuyarqan rey Salomón ruratsinqan qori escüdukunatapis.† 27 Apakuyanqan escüdukunapa trokintami broncipitana escüdukunata Roboam ruratsirqan. Nirkurmi palaciu punku täpaq soldädukunapa mandaqninkunata entregarqan. 28 Templuman rey aywaptinmi soldädunkuna paywan aywayaq tsay escüdunkuna aptashqa. Palaciunman rey kutiptinnami soldädukuna tsay escüdukunata sälaman kutitsiyaq.
29 Roboam imata ruranqankunapis llapanmi qellqaraykan Judá nacionpa mandaqnin reykunapa acta libruncho. 30 Roboam mandanqan witsanmi Jeroboamwan chikinakur guërrata imaypis rurayaq. 31 Roboam wanuskiptinmi Davidpa Markancho unay castankuna pamparäyanqanman pampayarqan. Roboampa mamanmi Amón nacionpita Naama karqan. Roboampa trokinmi tsurin Abiamna rey karqan.