Judá nacioncho Abiam rey kanqan
15
Nabatpa tsurin Jeroboam chunka puwaq wata Israel nacioncho rey kaykaptinmi Judá nacioncho Abiam rey kayta qallaykurqan. 2 Jerusaléncho kimsa watami rey karqan. Mamanmi Abisalompa tsurin Maaca karqan.3 Rey Abiamqa manami unay castan Davidnötsu Tayta Diosta llapan shonqunwan cäsukurqan tsaypa trokinqa taytan jutsata ruranqannömi paypis rurarqan. 4 Tsaynö kaptinpis Davidta kuyashqa karmi Abiamta Tayta Dios qarqurqantsu rey kanqanpita.† Tsaynöllami Abiam wanuskiptin tsurintana Tayta Dios churarqan Jerusaléncho rey kananpä. 5 Rey Davidqa Tayta Dios munanqannö kawarmi llapan mandamientunkunata cumplirqan. Tsaynö kaptinpis Davidpa jutsan karqan Betsabépa runan Uríasta wanutsinqanmi.
6 Jeroboamwan Roboam chikinakur imaypis guërrata rurayanqannömi Abiampis Jeroboamwan imaypis guërrata rurayaq. 7 Abiam imata ruranqanpis llapanmi qellqaraykan Judá nacionpa mandaqnin reykunapa acta libruncho. 8 Abiam wanuskiptinmi Davidpa Markanman pampayarqan. Paypa trokinnami tsurin Asana rey karqan.
Judá nacioncho Asa rey kanqan
9 Jeroboam ishkay chunka (20) wata Israel nacioncho rey kaykaptinmi Judá nacioncho Asa rey kayta qallaykurqan. 10 Asami Jerusaléncho chusku chunka juk (41) wata rey karqan. Paypa awilanmi Abisalompa tsurin Maaca karqan.
11 Rey Asami itsanqa unay castan Davidnö Tayta Dios munanqannö kawarqan. 12 Tsay witsanmi wakin runakuna y warmikuna diosninkunata adorar altarkuna kanqancho jukwan jukwan kakuyaq. Tsay runakunata y warmikunatami Judá nacionpita rey Asa qarqurqan. Tsaynöllami taytan, awilun y awilunpa taytan ruratsinqan ïdulukunatapis llapanta ushakätsirqan.† 13 Asera diösapä awilan Maaca jawitsinqan qerutapis Cedrón raqraman apaykurmi rupatsirqan. Nirkurmi tsay ïduluta ruratsinqanpita Maacatapis reina kanqanpita qarqurqan. 14 Tsaynö rurarpis markakunacho kaq altarkunataqa Asa manami juchutsirqantsu. Asaqa wanunqanyaqmi Tayta Dios munanqannö kawarqan. 15 Tsaymi taytanwan kikinpis Tayta Diospä rakinqankunata templuman aparqan qorita, qellayta y alhäjakunata.
Rey Ben-adadwan rey Asa parlayanqan
16 Israel runakunapa mandaqnin rey Baasawanmi rey Asa guërrata imaypis rurayaq. 17 Tsaymi rey Baasa Judá nacioncho kaykaq Ramá markata vinciskir tsay markaman soldädunkunata churarqan Judápita tsayman pipis mana yaykunanpä ni tsaypita Judáman pipis mana yarqunanpä.
18 Tsaymi Asaqa Tayta Diospa wayincho y palaciuncho churaraykaq qorita y yuraq qellayta jipiskir Siria nacionpa mandaqnin rey Ben-adadman apatsirqan. Ben-adadqa Tabrimónpa tsurin y Heziónpa willkanmi karqan. Payqa Damascuchömi taykarqan. Tsaynö apatsirmi encargakurqan niyänanpä: 19 “Rey Asami nin: ‘Pipis atacaptin taytaykiwan taytä yanapanakuyänanpä pactuta rurayanqannö noqantsikpis yanapanakunantsikpä pactuta rurashun. Yanapamänaykipämi apaykätsimü qorita y yuraq qellayta. Tsaynöpis manana atacamänanpä Israel nacionpa mandaqnin rey Baasata yanapaynatsu’ ”.
20 Tsaynö mañakuptinmi rey Ben-adad awnirnin soldädunkunatawan capitanninkunata kacharqan Israel nacioncho kaq markakunata atacayänanpä. Atacarmi qechuyarqan Ijón, Dan y Abel-bet-maaca markakunata, Cineret particho kaq markakunata y Neftalí particho kaq markakunatapis.
21 Tsay markakunata atacayanqanta musyaykurmi rey Baasaqa Ramá markacho cuartelta shäritsinanpä qoritsinqankunata jaqiriykur Tirsaman kutikurqan. 22 Tsaymi rey Asaqa llapan Judá runakunata Ramáman qayatsirqan. Chäyaptinmi Ramá markata siguraraq rumikunata y qerukunata apayarqan Benjamíncho kaykaq Geba y Mizpa markakunaman. Tsaykunawanmi tsay markakunata allitsatsir siguratsirqan.
Rey Asa wanunqan
23 Rey Asa ruranqankuna, guërrakunacho vincinqankuna y markakunata shäritsinqankunapis llapanmi qellqaraykan Judá nacionpa mandaqnin reykunapa acta libruncho. Awkinna karmi chaki nanaywan Asa qeshyarqan. 24 Asa wanuskiptinmi Davidpa Markancho unay castankuna pamparaykäyanqanman pampayarqan. Paypa trokinnami tsurin Josafatna rey karqan.
Israel nacioncho Nadab rey kanqan
25 Ishkay watana Judá nacioncho Asa rey kaykaptinmi Israel nacioncho Jeroboampa tsurin Nadab rey kayta qallaykurqan. Nadabqa ishkay watallami rey karqan. 26 Payqa Tayta Diosta mana cäsukurmi taytan Jeroboamnölla Israel runakunata jutsata ruratsirqan.a
27 Juk kutimi llapan Israel soldädunkunata qoriskir Nadab aywarqan Filistea nacioncho kaykaq Gibetón marka runakunata atacayänanpä. Tsaynö atacar markata jiruruypa tsaparaykäyaptinmi Ahíaspa tsurin Baasa contran shärir Nadabta wanuskatsirqan. Baasaqa Isacar trïbu runami karqan. 28 Tsaynö wanutsirqan Judá nacioncho kimsa wata Asa rey kaykaptinmi. Tsaynöpami Baasana Israel nacioncho rey karqan.
29 Rey kaykarnami Jeroboampita aywaraqkunata llapanta wanutsir usharqan. Llapanta tsaynö wanutsirqan Tayta Dios ninqanta profëta Ahías Silucho willakunqannöllami.† 30 Tsaynö karqan Israel runakunata kuyaq Tayta Diosta Jeroboam ajanätsinqanpitami. Tsaynö ajanätsirqan jutsata rurar y Israel runakunatapis jutsata ruratsirmi.
31 Rey Nadab wakin ruranqankuna qellqaraykan Israel nacionpa mandaqnin reykunapa acta librunchömi. 32 Israel runakunapa mandaqnin rey Asami rey Baasawan imaypis guërrata rurayaq.
Israel nacioncho Baasa rey kanqan