Jeroboamwan Abíasmi guërrata rurayarqan. 3 Tsaymi rey Abías pelyaq aywananpä chusku pachak waranqa (400,000) alli chölu runakunata qorirqan. Rey Jeroboamnami rey Abíaswan pelyaq aywananpä puwaq pachak waranqa (800,000) alli chölu runakunata qorirqan.

4 Tsaymi Efraín jallqakunaman paykunawan chaykur Zemaraim jirkaman Abías witsarqan. Witsarkurmi qayakurqan: “¡Israel runakuna y Jeroboam, wiyayämay! 5 Qamkuna ¿manaku musyayanki David y paypita aywaraqkuna Israel nacioncho imayyaqpis rey kayänanpä Tayta Dios pactuta rurar awninqanta? Awninqantaqa imaypis cumplinqami.

6 “Tsaynö kaykaptinpis mana cäsukurmi Nabatpa tsurin Jeroboam reypa contran shärirqan. Jeroboamqa Davidpa tsurin Salomónpa wätaynin kaykarmi tsaynö rurarqan. 7 Contran shärirmi qela runakunawan y mana alli runakunawan Jeroboam takukarqan. Salomónpa tsurin rey Roboam chölullarä kaptinmi yarpaynin shumaq mana kaptin ichipayta kamäpakurqantsu.

8 “Davidpita aywaraqkunarämi Tayta Diospa mandakuynincho rey kaykäyan. Tsaynö kaptinpis qamkunaqa atskaq kayanqaykiman yärakur y Jeroboam ruratsinqan qori torïtu diosnikikunaman yärakurmi paypa contran shäriykäyanki.

9 “Tsaynöpis qamkunaqa Aarónpita aywaraq sacerdötikunatami markaykikunapita qarquyashqayki. Paykunatami qarquyashqayki sacerdötikuna kayänanpä Tayta Dios churashqa kaykaptinpis.^† Tsaynöllami Leví trïbu wakin runakunatapis qarquyashqayki. Nirkurmi wakin nación runakunanölla pipis juk torïtuta y qanchis carnërukunata apamuptin churaykäyanki diosnikikunata sirviq sacerdöti kayänanpä. Tsay diosnikikunaqa manami rasunpaypatsu Dios kaykäyan.

10 “Noqakunami itsanqa Tayta Diosnintsik ninqanta cumplir kachariyätsu. Payta sirviq sacerdötikunapis Aarónpita aywaraqkunallami kaykäyan. Tsaynöpis sacerdötikunata yanapayänanpä levitakunallami kaykäyan. 11 Tayta Dios ninqannöllami paykunaqa tutapapis tardipapis rupatsina kaq sacrificiukunata rupaykätsiyan y inciensiuwan qoshniykätsiyan. Tsaynöllami purificashqa mësamanpis sagrädu tantakunata churaykäyan. Qori candelabrukunamanpis cada tardimi aktsitapis tsariykätsiyan. Tsaynömi noqakunaqa Tayta Diosnintsik ninqanta cumpliykäyä. Qamkunaqa manami pay ninqanta cäsukuykäyankitsu.

12 “Noqakunawanmi Tayta Dios kaykan. Qamkunawan pelyayta qallaykuyänäpä sacerdötinkunapis listunami kaykäyan cornëtankunata tukayänanpä. Noqakunawan pelyarqa unay castantsikkuna yärakuyanqan Tayta Dioswanmi pelyayanki. Paywanqa ama churakäyaytsu. Paytaqa manami vinciyankitsu”.

13 Tsaynö parlanqanyaqmi Jeroboamqa pakayllapa wakin kaq soldädunkunata kacharqan qepanpa yaykuykur Judá soldädukunata atacayänanpä. Wakin kaq soldädunkunanami puntanpa atacayarqan. 14 Judá runakuna tikraykuyanqanchömi rikayarqan qepanpa y puntanpa atacaykäyanqanta. Tsaymi Tayta Diosta mañakuyaptin sacerdötikunapis cornëtakunata tukayarqan jinan höra pelyayänanpä.

15 Pelyayta qallaykur qayaräyaptinmi Jeroboamta y Israel runakunata vinciyänanpä Abíasta y Judá runakunata Tayta Dios yanaparqan. 16 Vinciyaptinmi Israel runakuna qeshpir aywakuyarqan. Tsaynö kaptinpis qeshpiykaqta Judá runakuna wanutsiyänanpämi Tayta Dios yanaparqan. 17 Tsaynö pelyarmi Abías y soldädunkuna pitsqa pachak waranqa (500,000) allinnin Israel soldädukunata wanutsiyarqan. 18 Tsaynö vinciyarqan unay castankuna yärakuyanqan Tayta Diosman yärakurmi. Israel runakunami itsanqa penqakushqa aywakuyarqan.

19 Jeroboamta vincirmi Abías qechurqan Bet-el markata jallqantinta, Jesana markata jallqantinta y Efraín markatapis jallqantinta. 20 Abías kawanqanyaqqa manami tsay markakunata Jeroboam qoriyta kamäpakurqantsu. Tsaypitanami Tayta Diospa castïgunwan Jeroboam wanurqan.

21 Abíasmi itsanqa mas munayyuq karqan. Abíaspa warminkuna chunka chuskumi kayarqan. Paypa ollqu tsurinkunami kayarqan ishkay chunka ishkay (22) y warmi tsurinkunanami kayarqan chunka soqta. 22 Abías imanö kawanqanpis y imata ruranqankunapis qellqaraykan Diospa profëtan Iddo qellqanqanchömi.