2 (1) Asaqa kawarqan Tayta Dios munanqannömi. 3 (2) Tsaymi juklä nación runakunapa diosninkunata adorayänanpä rurayanqan altarkunata y markakunacho kaq altarkunatapis juchutsirqan. Adorayänanpä jawiyanqan wankakunata y Asera diösapä jawiyanqan raku qerukunatapis pakitsirmi usharqan. 4 (3) Judá runakunatami nirqan unay castankuna yärakuyanqan Tayta Diosta ashir leyninkunatawan mandamientunkunata cumpliyänanpä. 5 (4) Tsaynöllami inciensiuwan qoshnitsikuna altarkunata y wakin altarkunatapis Judácho kaq llapan markakunapita jipitsirqan. Asa mandanqan witsanqa Judá nacioncho runakuna añawmi kawakuyarqan.

6 (5) Añaw kawayänanpä Tayta Dios yanapaptinmi rey Asaqa Judá nacioncho markakunata allitsatsir tumaypa corralatsirqan. 7 (6) Judá nación runakunatami nirqan: “Tayta Diosnintsikta ashishqami pay yanapaykämantsik ñöpantsikcho nacionkunawan añaw kawanantsikpä. Añaw kawanqantsikyaq markantsikkunata shumaq corralatsishun. Törrikunatapis cada markacho shäritsir punkunkunatapis churatsishun. Punkuta siguranantsikpä trancatapis churatsishun”.

Tsaynö willanakuskirmi llapanta shumaq ruratsirqan.

8 (7) Rey Asapa soldädunkunami Judá trïbupita kimsa pachak waranqa (300,000) kayarqan. Cada soldädupami escüdunpis y lanzanpis karqan. Benjamín trïbupitanami ishkay pachak puwaq chunka waranqa (280,000) soldädukuna kayarqan. Paykunapapis escüdun y flëchan karqanmi. Paykunaqa llapan alli chölu kaqllami kayarqan.

9 (8) Tsaypitanami Judá nacionta atacayänanpä Zera jutiyuq runa juk millón (1'000,000) soldädunkunata pushakurkur y kimsa pachak (300) guërra carrëtakunawan Etiopíapita Maresa partiyaq chäyarqan. 10 (9) Tsaymi Asapis paykunawan pelyayänanpä soldädunkunata pushakurkur Maresapa ñöpan Sefata pampaman aywar churakäyarqan.

11 (10) Tsaychömi Tayta Diosta mañakur Asa nirqan: “Tayta Dios, atska soldäduyuq o wallka soldäduyuq karpis qam yanapamaptikiqa vincishämi. Tsaymi qamllaman yärakur conträkunawan pelyaq jutikicho shayämushqä. Taytay, qamllami Diosnï kaykanki. Ama munaykuytsu conträkuna vinciyämänanta”.

12 (11) Tsaynö rugakuptinmi rey Asata y Judá runakunata Tayta Dios yanaparqan Etiopía runakunata vinciyänanpä. Vinciyaptinmi Etiopía runakunaqa qeshpir aywakuyarqan. 13 (12) Qeshpiykaqta Gerar markayaq soldädunkunawan Asa qatipaykur wanutsiyaptinmi ni jukllayllapis kawaykar quëdarqantsu. Nirkurmi wanushqa runakunapa imaykankunatapis apakuyarqan.

14 (13) Tayta Dios tsaynö yanapanqanta rikarmi Gerar ñöpankunacho taq runakuna pasaypa mantsariyarqan. Tsaymi Judá runakunaqa Gerar ñöpancho kaq markakunatapis atacar imaykankunatapis apakuyarqan. 15 (14) Tsaynöllami chakracho taq runakunata atacar üshankunatapis camëllunkunatapis atskata apakuyarqan. Tsaypitanami Jerusalénman kutikuyarqan.