Tayta Diosta Asa cäsukunqan
15
Tayta Diospa Espïritun parlatsiptinmi Obedpa tsurin Azarías 2 rey Asaman aywaykur nirqan: “Rey Asa, Judá trïbu runakuna, Benjamín trïbu runakuna, llapaykikuna wiyayämay. Tayta Dioswan kaykäyaptikiqa paypis qamkunawanmi kaykanqa. Payta ashirqa tariyankimi. Payta kachariyaptikiqa qamkunatapis kachariyäshunkimi.3 “Unayshi Israel nacioncho runakuna Tayta Diosta cäsukuyänätsu. Tayta Diospa mandamientunkunata yachatsiyänanpäpis sacerdötikuna manashi kayänätsu. 4 Itsanqa ñakaykuna kaptinshi jutsa rurayta kacharir kuyaqnin Tayta Diosta ashir tariyänä. 5 Tsay witsanshi maytsaychöpis mantsa mantsalla kawayänä. Maypa aywayarpis y maypita kutimurpis manashi añawqa kawayänätsu. Llapan nacionkunachöshi tukuyläya desgraciakunawan runakuna ñakayänä. 6 Tayta Dios tsaynö castigaptinshi juk nacionwan juk nación y juk markawan juk marka pasaypa wanutsinakuyänä. 7 Qamkunaqa Tayta Diosta mana ajayaypa cäsukuyay. Cäsukuyaptikiqa alli kawayänaykipämi yanapayäshunki”.
8 Tayta Diospa profëtan ninqanta wiyaykurmi rey Asaqa kallpata tsarir Judá runakuna y Benjamín runakuna täyanqan markakunacho llapan ïdulukunata ushakätsirqan. Tsay ïdulukunata Tayta Dios pasaypami melanarqan. Tsaynöllami Efraín jallqakunacho qechunqan markakunacho kaq ïdulukunatapis ushakätsirqan. Nirkurmi Tayta Diospa templun punkucho kaykaq altarta allitsatsirqan.
9 Judá nación runakunata Tayta Dios llapancho yanapaykanqanta musyarmi Israel nación atska runakuna markankunata kacharir Asa mandanqan nacionman aywakuyarqan. Tsay runakunami kayarqan Efraín trïbu, Manasés trïbu y Simeón trïbu runakuna. Tsay runakunatawanmi Judá trïbu runakunata y Benjamín trïbu runakunatapis Asa qayatsirqan 10 Jerusaléncho qorikäyänanpä. Tsayman qorikäyarqan chunka pitsqa wata Asa rey kaykaptin kimsa kaq killachömi.
11 Tsaynö qorikäyaptinmi Tayta Diosta adorar qanchis pachak törukunata (700) y qanchis waranqa (7,000) üshakunata pishtaskir sacrificiuta rupatsiyarqan. Tsay uywakunaqa contrankunata vincir apayämunqanmi karqan. 12 Tsaypitanami pactuta rurar awniyarqan llapan shonqunkunawan y llapan voluntäninkunawan unay castankuna yärakuyanqan Tayta Diosta imaypis ashiyänanpä. 13 Tsaynöllami niyarqan Israel runakunata kuyaq Tayta Diosta mana cäsukuq kaqtaqa awkin o wamra o warmi o ollqu kaptinpis wanutsiyänanpä.
14 Tayta Diosta tsaynö awnirmi pasaypa kushikuyarqan. Kushikurmi cornëtakunatapis waqrakunatapis tukayarqan. 15 Llapan shonqunkunawan awnir y llapan voluntäninkunawan Tayta Diosman yärakurmi Judá nacioncho taq runakuna llapankunapis kushikuyarqan. Tsaymi Tayta Dios paykunata imaypis yanaparqan ñöpancho kaq nacionkunawan añaw kawayänanpä.† 16 Asera diösapä awilan Maaca jawitsinqan qerutapis tseqtaskirmi Cedrón raqraman apaykur rupatsirqan. Nirkurmi tsay ïduluta ruratsinqanpita Maacatapis reina kanqanpita qarqurqan. 17 Tsaynö rurarpis markakunacho kaq altarkunataqa Asa manami juchutsirqantsu. Asaqa wanunqanyaqmi Tayta Dios munanqannö kawarqan. 18 Tsaymi taytanwan kikinpis Tayta Diospä rakinqankunata templuman aparqan qorita, qellayta y alhäjakunata. 19 Asa kimsa chunka pitsqa (35) wata rey kanqanyaq manami pipis Judá nacionta atacarqantsu.