Rey Ben-adadwan rey Asa parlayanqan
16
Asa kimsa chunka soqta (36) watana rey kaykaptinmi Israel runakunapa mandaqnin rey Baasa soldädunkunawan aywarqan Judá nacionta atacayänanpä. Ramá markata vincirmi tsay markaman soldädunkunata churar siguratsirqan Judápita tsayman pipis mana yaykunanpä ni tsaypita Judáman pipis mana yarqunanpä.2 Tsaymi Asaqa Tayta Diospa wayincho y palaciuncho churaraykaq qorita y yuraq qellayta jipiskir Siria nacionpa mandaqnin rey Ben-adadman apatsirqan. Ben-adadqa Damascuchömi taykarqan. Tsaynö apatsirmi encargakurqan niyänanpä: 3 “Rey Asami nin: ‘Pipis atacaptin taytaykiwan taytä yanapanakuyänanpä pactuta rurayanqannö noqantsikpis yanapanakunantsikpä pactuta rurashun. Yanapamänaykipämi apaykätsimü qorita y yuraq qellayta. Tsaynöpis manana atacamänanpä Israel nacionpa mandaqnin rey Baasata yanapaynatsu’ ”.
4 Tsaynö mañakuptinmi rey Ben-adad awnirnin soldädunkunatawan capitanninkunata kacharqan Israel nacioncho kaq markakunata atacayänanpä. Atacarmi qechuyarqan Ijón, Dan y Abel-maim markakunata. Neftalí trïbu runakuna täyanqancho mikuy churakuna markakunatapis llapantami qechuyarqan.
5 Tsay markakunata atacayanqanta musyaykurmi rey Baasaqa Ramá markacho cuartelta shäritsinanpä qoritsinqankunata jaqiriykur aywakurqan. 6 Tsaymi rey Asaqa llapan Judá runakunata Ramáman qayatsirqan. Chäyaptinmi Ramá markata siguraraq rumikunata y qerukunata apayarqan Geba y Mizpa markakunaman. Tsaykunawanmi tsay markakunata allitsatsir siguratsirqan.
7 Tsay witsanmi Tayta Diospa profëtan Hanani Judá nacionpa mandaqnin rey Asa kaqman aywaykur nirqan: “Tayta Diosman yärakunaykipa trokin ¿imanirtä Siria nacionpa mandaqnin reyman yärakushqayki? Kananpitaqa tsay reyta manami imaypis vincinkinatsu. 8 ¿Manaku yarpanki Libia runakuna y Etiopía runakuna qorikaskir atska soldädunkunawan y atska cawallunkunawan y carrëtankunawan atacayäshunaykipä shayämunqanta? Tsaynö kaykaptinpis Tayta Diosman yärakuptikimi paykunata vinciyänaykipä yanapayäshurqayki.†
9 “Tayta Diosqa kay patsacho llapan runakunatami rikaykan llapan shonqunwan payman yärakuqkunata yanapananpä. Ben-adad yanapashunaykipä pägarqa upa ruraytami rurashqayki. Tsaymi kananpitaqa guërrallachöna kanki”.
10 Tsaymi rey Asaqa pasaypa rabyanar Tayta Diospa profëtanta carcelman prësu wichqatsirqan. Tsaynöllami Jerusaléncho taq wakin runakunatapis pasaypa ñakatsirqan.
Asa wanunqan
11 Rey Asa ruranqan qallaykunanpita ushananyaq llapanmi qellqaraykan Judá nacionpa y Israel nacionpa mandaqnin reykunapa acta libruncho.
12 Kimsa chunka isqun (39) watana rey kaykaptinmi Asata chaki nanay tsarirqan. Qeshyarpis Tayta Diosman yärakunanpa trokinmi mëdicukunallaman yärakurqan.
13 Chusku chunka juk (41) watana rey kaykarmi Asa wanurqan. 14 Wanuskiptinnami Davidpa Markancho kikin uchkutsinqan sepultüranman sutayarqan. Nirkurmi aya jananman wiñayarqan yachaq runakuna rurayanqan tukuy niraq perfümikunata y mushkuq jachakunata. Pampaskirnami wanuqpa jutincho atska yantata churaskir ninata tsaritsiyarqan.