Judá nacioncho Josafat rey kanqan
17
Asa wanuskiptinmi tsurin Josafatna rey karqan. Payqa Israel nacionta ichipänanpämi kamarikurqan. 2 Tsaymi Judácho kaq jinchi murallashqa markakunaman y wakin markakunamanpis soldädukunata churarqan. Tsaynöllami soldädukunata churarqan taytan Asa qechunqan Efraíncho kaykaq markankunamanpis.3 Unay castan David cäsukunqannö Tayta Diosta cäsukuptinmi Josafatta Tayta Dios yanaparqan. Josafatqa Baal dioskunatapis manami adorarqantsu. 4 Israel nación runakuna jutsata rurayaptinpis payqa manami jutsata rurartsu kawarqan. Tsaypa trokinqa taytan yärakunqan Tayta Diospa mandamientunkunata cäsukurmi kawarqan. 5 Tsaymi Tayta Dios yanaparqan Judá nación runakuna llapanpis paypa munaynincho kayänanpä. Tsaynöllami Judá runakunaqa imaykatapis mandaqnin rey Josafatpä apayaq. Tsaynöpami Josafat imaykayuq tikrarqan y pïmaypis payta kuyar respitarqan. 6 Llapan voluntäninwan Tayta Dios munanqannö kawarmi markakunacho kaq altarkunata y Asera diösapä jawiyanqan raku qerukunatapis Judá nacioncho llapanta ushakätsirqan.
7 Kimsa watana rey kaykarmi Judácho kaq markakunaman yanapaqninkunata Josafat kacharqan Tayta Diospa mandamientunkunata yachatsiyänanpä. Paykunami kayarqan Ben-hail, Abdías, Zacarías, Natanael y Micaías. 8 Paykunawan aywayänanpämi levitakunata Josafat kacharqan. Tsay runakunami kayarqan Semaías, Netanías, Zebadías, Asael, Semiramot, Jonatán, Adonías, Tobías y Tobadonías. Paykunawanmi aywayarqan sacerdöti Elisama y sacerdöti Joram. 9 Paykunami markan markan purir Judá nacioncho taq runakunata Tayta Diospa leyninkuna qellqaranqan librupita yachatsiyarqan.
10 Judá nacionpa ñöpancho kaq nacionkunapis Tayta Diosta mantsarmi Josafat mandanqan markakunata atacayarqannatsu. 11 Tsaypa trokinqa wakin filisteo runakunapis qaraykunata y qellaykunata apamurmi Josafatta entregayarqan. Arabia nación runakunapis rey Josafatta qarayänanpämi qanchis waranqa qanchis pachak (7,700) üshakunata y qanchis waranqa qanchis pachak (7,700) chïvukunata apayämurqan.
12 Tsaynö mas munayyuq rikakurmi Judá nacioncho Josafat shäritsirqan amparakuna törrikunata y mikuy churakuna markakunata. 13 Tsaynöpami Judá nacioncho kaq markakunata mejoratsirqan.
Jerusalénmanpis alli chölu soldädunkunatami Josafat churarqan. 14 Tsay soldädunkunata castanpa castanpa apuntatsiptinmi Judá trïbupita kimsa pachak waranqa (300,000) soldädukuna kayarqan. Cada tröpachömi juk waranqa (1,000) soldädukuna kayarqan. Llapan tröpapa capitanninkunapa mandaqninmi Adnas karqan.
15 Juk capitán Johanánpa munayninchömi ishkay pachak puwaq chunka waranqa (280,000) soldädukuna kayarqan.
16 Zicripa tsurin capitán Amasíaspa munayninchömi ishkay pachak waranqa (200,000) alli chölu soldädukuna kayarqan. Payqa kikinpa voluntäninpitami yaykurqan Tayta Diosta sirvir capitán kananpä.
17 Benjamín trïbupitami ishkay pachak waranqa (200,000) soldädukuna kayarqan. Jukninpa jukninpami escüdunkuna y flëchankunapis karqan. Paykunapa capitanninmi Eliada karqan. Payqa pelyayta yachaq alli chölumi karqan.
18 Juk capitannami Jozabad karqan. Paypa munayninchömi kayarqan pelyayänanpä kamarikushqalla juk pachak puwaq chunka waranqa (180,000) soldädukuna.
19 Llapanpis tsay soldädukunaqa Jerusaléncho rey Josafat ninqanta rurayänanpämi kayarqan. Tsayqa karqan Judá nacioncho corralashqa markakunachöpis kaykaq soldädukunata mana yupaykäyaptinmi.