5 Baasa ruranqankuna y guërrakunacho vincinqankuna llapanmi qellqaraykan Israel nacionpa mandaqnin reykunapa acta libruncho. 6 Baasa wanuskiptinmi Tirsa markacho pampayarqan. Paypa trokinnami tsurin Elana rey karqan.

7 Jeroboamnö y tsurinnö Tayta Diosta ajanätsir jutsata ruranqanpita y Jeroboampa castankunata wanutsinqanpitami Hananipa tsurin profëta Jehú Tayta Dios tantiyatsinqannö Baasapa y castankunapa contran willakurqan.

8 Judá nacioncho Asa ishkay chunka soqta (26) watana rey kaykaptinmi Baasapa tsurin Ela Tirsa markapita Israel runakunata mandar qallaykurqan. Payqa ishkay watallami mandarqan.

9 Elapa soldädunkunapa juk capitanninmi karqan Zimri. Paymi guërra carrëtakunata pullanta munaynincho tsarararqan. Capitannin kaykarmi rey Elapa contran shärirqan. Juk junaqmi Tirsa markacho rey Ela palaciuta rikaq Arsapa wayincho upyaykarqan. Tsaycho pasaypa machashqa kaykaptinmi 10 Zimri chaykur wanutsirqan. Nirkurmi kikinna rey kayta qallaykurqan. Tsay karqan Judá nacioncho ishkay chunka qanchis (27) wata Asa rey kaykaptinmi.

11 Zimri rey kayman yaykuskirmi Baasapa tsurinkunata, castankunata y amïgunkunata chipyaq wanutsirqan. Manami ni jukllayllapis ollqu quëdarqantsu. 12 Llapanta tsaynö wanutsirqan Tayta Diospa willakuqnin profëta Jehú willakunqannöllami. 13 Rey Baasapa contran Jehú tsaynö willakurqan Baasa y tsurin Ela jutsata rurayanqanpita y jutsata rurayänanpä Israel mayinkunata shakyätsiyanqanpitami. Tsaynöpami ïdulukunata adorar Israel runakunata kuyaq Tayta Diosta pasaypa ajanätsiyarqan.

14 Ela imata ruranqankunapis llapanmi qellqaraykan Israel nacionpa mandaqnin reykunapa acta libruncho.

15 Ishkay chunka qanchis (27) wata Judá nacioncho Asa rey kaykaptinmi Tirsa markacho Zimri rey kayta qallaykurqan. Tsaynö kaptinpis qanchis junaqllami rey karqan. Tsay junaqkunami Israel soldädukuna Filistea nacioncho kaq Gibetón markata atacaykäyarqan. 16 Tsaychömi Israel soldädukuna musyayarqan rey Elata wanuskatsir Zimrina paypa trokin rey kaykanqanta. Tsayta musyaskirmi jinan höra capitanninkuna Omrita churayarqan rey kananpä. 17 Tsaynö churaskiyaptinnami Omriqa Gibetón markata manana atacarnin llapan Israel soldädukunawan Tirsa markatana atacayänanpä aywayarqan.

18 Zimriqa tanqan markata atacaykäyanqanta rikaykurmi palaciucho kaykaq törri rurinman yaykuskirqan. Nirkur törrita tsariskatsiptinmi kikintapis nina lunyar usharqan. 19 Tsaynö wanurqan Tayta Diosta ajanätsir jutsata ruranqanpitami. Ïdulukunata adorayänanpä Israel runakunata Jeroboam shakyätsinqannömi Zimripis shakyätsirqan.^†

20 Zimri ruranqankuna y Elapa contran shärir wanutsinqanpis qellqaraykan Israel nacionpa mandaqnin reykunapa acta librunchömi.

21 Tsaypitanami Israel nacioncho wakin runakuna munayarqan Ginatpa tsurin Tibni rey kananta y wakinnami munayarqan Omri rey kananta. 22 Tsaymi Omripa favornin kaqkuna pelyar Ginatpa tsurin Tibnipa favornin kaqkunata vinciyarqan. Tibnita wanuskatsiyaptinmi Omrina paypa trokin rey karqan.

23 Judá nacioncho kimsa chunka juk (31) wata Asa rey kaykaptinmi Israel nacioncho Omri rey kayta qallaykurqan. Payqa chunka ishkay watami Israel runakunapa mandaqnin rey karqan. Soqta watami Tirsa markapita mandarqan. 24 Tsaypita juk markata shäritsinanpämi Samaria jirkanta Semer runapita Omri rantirqan. Tsay jirkanpa chanintami pägarqan soqta chunka soqta (66) kïlu qellayta. Tsaycho markata shärirkatsirmi jiruruypa corralatsirqan. Jirkanpa punta kaq duëñunpa jutin Semer kaptinmi tsay markata jutitsirqan Samaria kananpä.

25 Omriqa Tayta Diosta mana cäsukurmi punta reykunapitapis peorrä jutsata rurarqan. 26 Nabatpa tsurin Jeroboam jutsata ruranqannömi paypis jutsata rurarqan. Tsaymi ïdulukunata adorayänanpä Israel runakunata Jeroboam shakyätsinqannö shakyätsirqan. Tsaynöpami Tayta Diosta pasaypa ajanätsirqan.

27 Omri ruranqankuna y guërrakunacho vincinqankuna qellqaraykan Israel nacionpa mandaqnin reykunapa acta librunchömi. 28 Wanuskiptinmi Samaria markaman pampayarqan.

29 Judá nacioncho kimsa chunka puwaq (38) wata Asa rey kaykaptinmi Israel nacioncho Omripa tsurin Acab rey kayta qallaykurqan. Paymi ishkay chunka ishkay (22) wata Israel runakunata Samaria markapita mandarqan. 30 Acabqa Tayta Diosta mana cäsukurmi punta reykunapitapis peorrä jutsata rurarqan. 31 Nabatpa tsurin Jeroboam jutsata ruranqannöllami paypis jutsata rurarqan. Tsaynöpis Sidón runakunapa mandaqnin rey Et-baalpa tsurin Jezabelta warmin kananpä ashirmi Baal diostapis adorarqan. 32 Tsaymi Baalpä templutapis altartapis Samariacho shäritsirqan. 33 Asera diösapäpis qeruta jawitsirmi wakin kaq reykunapitapis peor Israel runakunata kuyaq Tayta Diosta ajanätsirqan.

34 Acab mandaq kanqan witsanmi Bet-elcho taq Hiel jutiyuq runa Jericó markata yapay allitsatsirqan. Cimientukunata pirqayta qallaykuptinmi mayor tsurin Abiram wanurqan. Marka punkuta churatsiptinnami qepa kaq tsurin Segubna wanurqan. Llapan tsaykuna päsarqan Nunpa tsurin Josué ninqannöllami.^†