Pasaypa usya kananpä Elías willakunqan
17
Profëta Elíasqa Galaad particho Tisbé markapitami karqan. Paymi rey Acabta nirqan: “Israel runakunata kuyaq y sirvinqä Tayta Diospa jutinchömi nï: Kay watakuna tamyapis ni shullyapis manami kanqatsu. Tsaynö kanqa hasta yapay ninqäyaqmi”.†2 Tsaypitanami Elíasta Tayta Dios nirqan: 3 “Kaypita rupay yarqamunan kaqläman aywakur Jordán mayupa wak tsimpancho kaykaq Querit raqra kuchunman pakakuy. 4 Tsaychömi tsay raqrapita yakuta upunki. Tsaynöpis maynami nishqä cuervukunaa mikuyta tsayman apapäyämushunaykipä”.
5 Tsaynö niptinmi Tayta Dios ninqannölla Jordán mayuta tsimpaskir Querit raqraman Elías aywakurqan. 6 Tsaymanmi cuervukuna tantata y aytsata tutapapis tardipapis Elías mikunanpä apapäyarqan. Yakutapis tsay raqrallapitami upurqan.
Viüdapa wayincho Elías tanqan
7 Unayna mana tamyaptinmi tsay raqracho yaku tsakiskirqan. 8 Tsaymi Elíasta Tayta Dios nirqan: 9 “Sidón marka cercancho kaykaq Sarepta markaman ayway tsaycho tänaykipä. Tsaychömi juk viüdata† nishqä pachayki qarashunaykipä”.
10 Tsaynö niptinmi Elías aywarqan Sarepta markaman. Marka yaykunaman charmi juk viüda yantakuykaqta tariskir nirqan: “Rugakushayki mamïta. Upukurkunäpä juk täza yakuyki qaraykallämay”.
11 Yakuta apapunanpä aywaykaptinmi Elías nirqan: “Juk amuy tantatapis mañakulläshayki”.
12 Tsaynö niptinmi viüda nirqan: “Tayta Diosniki musyanmi ima tantapis wayïcho mana kanqanta. Juk aptayllami jarinä kaykan y aceitipis wallkallami kaykan. Kananpis yantakuykä ultimu kaykaqta kusinakuskir wawäwan ishkä mikuyänalläpämi. Tsaypitaqa mikuyänäpä imapis mana kaptin wanukuyäshänachi”.
13 Tsaynö niptinmi Elías nirqan: “Ama yarpaytsu wanuyänaykipä kanqanta. Kusinakunaykipä ninqaykinölla juklla kusinakamuy. Itsanqa puntata noqapärä tantakshuta ankaskamuy. Nirkurnami kikikikunapäqa ankakunki. 14 Israel runakunata kuyaq Tayta Diosmi nin: ‘Kay patsaman yapay tamyatsimunqäyaq mankapita jarinaykipis y uyllupita aceitikipis manami ushakanqatsu’ ”.
15 Tsaynö niptinmi viüdaqa juklla kusinakurqan Elíasta qarananpä. Tsaypitanami Elíaspis kikin viüdapis y wawanpis qoyay qoyay mana ushakäpakuypa mikuyarqan. 16 Tayta Dios ninqanta Elías willakunqannöllami mankapita jarina ni uyllupita aceitipis ushakarqantsu.
17 Tsaypita ichik unayllatanami viüdapa wawan pasaypa qeshyar antsarnin wanurqan. 18 Wawan wanuskiptinmi viüdaqa Elíasta nirqan: “¡Tayta Diospa willakuqnin! ¿Imanirtä unay jutsata ruranqäpita castigamar wawäta wanutsishqayki?”
19 Tsaynö niptinmi Elías nirqan: “Wawaykita apamuy”.
Tsaymi viüda marqarkatsiptin patsaranqan cuartuman ayata apaykur cämanman sutaykurqan. 20 Nirkurmi Tayta Diosta mañakur nirqan: “Tayta Dios, wayincho patsaraykätsimaptin ¿imanirtä viüdata llakikuyman churar wawanta wanutsishqayki?”
21 Tsaynö niskirmi kimsa kuti aya jananman lätakaykur Tayta Diosta mañakur nirqan: “Tayta Dios, ¡kay wamrata kawariykatsillämuy!”
22 Elías tsaynö mañakuptinmi Tayta Dios tsay wamrata kawaritsirqan. 23 Tsaymi Elíasqa wamrata marqakurkur patsaranqan cuartupita yarpatsimur mamanta entregar nirqan: “Wawayki kawarimushqanami”.
24 Wawan kawaykaqta rikaykurmi viüda nirqan: “Kananmi itsanqa musyä Tayta Diospa profëtan kaptiki llapan ninqaykikuna rasun kaq kanqanta”.