Rey Acabwan Elías yapay tinkuyanqan
18
Usya qallaykunqanpita kimsa wata päsaskiptinnami Elíasta Tayta Dios nirqan: “Kay patsaman yapaymi tamyatsimushä. Tsayta willaq Acab kaqman ayway”.2 Tsaymi Acabta willaq Elías aywarqan.
Samaria markacho pasaypa muchuy kaptinmi mikuyänanpä ni imapis karqantsu. 3 Tsaynö kaptinmi Acab qayatsirqan palaciucho yanapaqnin Abdíasta. Payqa Tayta Diospita mantsapakuq runami karqan. 4 Tsaymi Tayta Diospa profëtankunata Jezabel wanutsinqan witsan Abdíasqa juk pachak (100) profëtakunata qoriskirnin pitsqa chunka (50) pitsqa chunka (50) ishkay machaykunaman pakaskir mikuytapis yakutapis apaparqan.
5 Pasaypa usya kaptinmi Abdíasta rey Acab nirqan: “Maytsay raqrakunaman y oqukunaman qewa ashiq aywashun. Capazchi qewata tarimushwan cawalluntsikkuna y mulantsikkuna mana wanuyänanpä”.
6 Tsaynö willanakuskirmi Acab juk nänipa y Abdías juk nänipa yarquyarqan.
7 Nänipa Abdías aywaykarmi Elíaswan tinkurqan. Elías kanqanta tantiyaskirmi urkunpis patsaman töpanqanyaq qonqurikuykur nirqan: “Taytay, ¿Elíasku kaykanki o rikapakuykäku?”
8 Tsaynö tapuptinmi Elías nirqan: “Awmi, kikïmi kaykä. Kanan ayway kaycho kaykanqäta patronnikita willanaykipä”.
9 Tsaynö niptinmi Abdías nirqan: “Taytay, ¿imatä jutsä kashqa Acabman kachamänaykipä? Nimanqaykinö willaptïqa llullapaykanqäta yarpar wanutsimanqachi. 10 Tayta Dios musyanmi patronnï maytsay nacionpa ashitsishunqaykita. Mana tarishurnikimi tsay nacionpa mandaqnin reykunatapis juratsishqa rasunpaypa mana rikashunqaykita. 11 ¿Tsaynö mana tariykäshuptikiku kanan nikämanki kaycho kaykanqaykita patronnïta willanäpä? 12 Willaq aywaykaptillänachi Tayta Diospa Espïritun maypapis pushashunki. Wamra kanqäpita patsa Tayta Diospita mantsapakur kawaykaptïpis Acab shamur mana tarishurniki noqatachi wanutsimanqa. 13 ¿Manaku willayäshushqayki profëtakunata Jezabel wanutsinqan witsan imata ruranqätapis? Juk pachak (100) profëtakunata ishkay machayman pitsqa chunka (50) pitsqa chunka (50) pakaykurmi mikuytapis yakutapis apaparqä. 14 ¿Tsaynö yanapaykaptïku kanan nikämanki Acabman aywaykur kaycho kaykanqaykita willanäpä? Willaptïqa mana tarishurniki wanutsimanqachi”.
15 Elíasnami nirqan: “Kananmi Acabwan tinkushä. Llapanta mandaq Tayta Diospa sirviqnin karmi tsaynö nï”.
16 Tsaymi Abdíasqa aywarqan rey Acabta willananpä. Willaykuptinmi Acabqa Elíaswan juklla tinkuq aywarqan. 17 Elíasta rikaykurmi Acab nirqan: “¡Qammi jutsayuq kaykanki Israel runakuna tsayjinanpa ñakayänanpä!”
18 Elíasnami nirqan: “Manami noqatsu jutsayuq kaykä ñakayänanpä, tsaypa trokinqa qam y castaykikunami jutsayuq kaykäyanki. Qamkunaqa Tayta Diospa mandamientunkunata mana cäsukurmi Baal dioskunata adoraykäyanki. 19 Carmelo jirkaman llapan Israel runakunata kanan qoritsimuy. Tsaynöpis tsayman qayatsimuy Baalpa chusku pachak pitsqa chunka (450) profëtankunata y Asera diösapa chusku pachak (400) profëtankunatapis. Tsay profëtakunataqa warmiki Jezabelmi wätan”.
Baalpa profëtankunata Elías manakaqman churanqan
20 Tsaynö niptinmi llapan Israel runakunata y profëtakunata Carmelo jirkaman Acab qoritsirqan. 21 Tsaychömi runakunata Elías nirqan: “Qamkuna ¿imayyaqtä ishkay yarpayyuq kayanki? Tayta Dios rasunpaypa Dios kaykaptinqa payllatana adorayay. Baal Dios kanqanta criyirqa payta adorayay”.
Tsaynö niptin tsaycho kaykaq runakunaqa imatapis manami parlakuyarqantsu.
22 Tsaymi Elías nirqan: “Noqa japallänami Tayta Diospa profëtan kaykä. Baalpa profëtankunami itsanqa chusku pachak pitsqa chunka (450) kaykäyan. 23 Kanan ishkay torïtukunata apaykamur Baalpa profëtankuna juk torïtuta pishtaskir yanta jananman churayätsun. Itsanqa tsay yantaman ninata ama tsaritsiyätsuntsu. Noqapis tsaynöllami jukaq torïtuta pishtaskir yanta jananman churashä. Nirkur yantaman ninata manami tsaritsishätsu. 24 Nirkurnami diosnikikunata mañakuyanki. Tsaynöllami noqapis Diosnïta mañakushä. Mayqanpis ninata yantaman tsaritsiq kaqmi rasunpaypa kaq Dios kanqa”.
Tsaynö niptinmi runakuna niyarqan: “Taytay, ninqaykinö katsun”.
25 Tsaymi Baalpa profëtankunata Elías nirqan: “Atskaq kaykarqa puntata qamkuna mayqan torïtutapis pishtaskir altar jananman churayay. Nirkur ninata mana tsaritsiyllapa diosnikikunata mañakuyay”.
26 Tsaymi paykunaqa juk torïtuta pishtaskir aytsata yanta jananman churaskir tutapita pullan junaqyaq Baalta mañakur niyarqan: “¡Tayta Baal, mañakuyanqäta wiyaykayällamay!”
Tsaynö nir rurayanqan altar ñöpanpa qayarar saltaykachar tumayaptinpis manami pipis contestamurqantsu.
27 Pullan junaqnami Elíasqa paykunata manakaqman churarnin asipar nirqan: “¡Wiyayäshunaykipä mas jinchi qayaräyay! ¿Manaku paypis diosnikikuna kaykan? Capazchi ima rurayninchöpis kaykan. Tsaynöpis capazchi ishpakuykan. Capazchi illaykanpis. Capazchi punukashqapis kaykan. ¡Rikchananpä mas jinchi qayaräyay!”
28 Tsaynö niptinmi mas jinchi qayararnin costumbrinkuna kanqannö yawarllana kayanqanyaq cuchillukunawan y espädakunawan roqukuyarqan. 29 Tardi kaq sacrificiuta rupatsiyänan hörayaq† löcunö qayaräyaptinpis manami Baal cäsumurqantsu ni imapis wiyakämurqantsu.
30 Tsaypitanami runakunata Elías nirqan: “Kanan kayman llapaykikuna witiyämuy”.
Tsaynö niptin ñöpanman llapan qorikäyaptinmi Tayta Diospa altarnin juchushqa kaykaqta Elías allitsar qallaykurqan. 31 Allitsananpämi Jacobpa tsurinkuna chunka ishkay kanqanpita chunka ishkay rumikunata qorirqan. Jacobpa jutin Israel kananpämi kikin Tayta Dios nirqan.† 32 Tsay qorinqan rumikunawanmi Tayta Diospa altarninta Elías allitsarqan. Nirkurmi altar ñöpankunapa zanjata rurarqan ishkay chunka (20) litru yaku yaykunanpänö.
33 Altar jananman yantata churaskirnami pishtanqan torïtupa aytsanta cuartizaskir yanta jananman churaykur 34 nirqan: “Chusku uyllu yakuta aytsamanpis yantamanpis wiñayay”.
Ninqannö wiñayaptinmi “mas yakuta wiñayay” nirqan. Yapay wiñayaptinmi “mastapis tsaynölla wiñayay” nirqan. Tsaynö niptinmi yakuta yapay wiñayarqan. 35 Ninqannö yakuta wiñayaptinmi altarcho kaykaqkunata chipyaq ushmar zanjamanpis juntarqan.
36 Tsaypita sacrificiuta rupatsiyänan hörami Tayta Diosta Elías mañakurqan: “Abraham, Isaac y Jacob yärakuyanqan Tayta Dios, kanan junaq runakuna musyayätsun Israel nacioncho munayyuq Dios kanqaykita. Tsaynöpis musyayätsun profëtayki kar nimanqaykinölla llapanta ruraykanqäta. 37 Tayta Dios, munayyuq kanqaykita musyayänanpä y qamllamanna yapay yärakayämunanpä mañakunqäta wiyaykallämay”.
38 Tsaymi ciëlupita nina urämur ruparqan pishtanqan torïtupa aytsanta, yantata, pirqaraykaq rumikunata y allpatapis. Altar ñöpan zanjacho kaykaq yakutapis chipyaqmi tsakitsirqan. 39 Tsayta rikaykurmi runakunaqa lätakaykur niyarqan: “¡Elías mañakunqan kaqmi rasunpaypa kaq Dios kaykan!”
40 Tsaypitanami Elías nirqan: “Baalpa profëtankuna mana qeshpiyänanpä prësu tsariyay”.
Tsaynö niptinmi runakuna tsay profëtakunata prësu tsariyarqan. Cisón raqraman apaykurmi llapan tsay profëtakunapa kunkanta Elías roqurqan.
Tamyamunanpä Tayta Diosta Elías mañakunqan
41 Tsaypitanami Acabta Elías nirqan: “Wayikiman kutikuy mikur y upur kanaykipä. Mangäda qallaykunanpänami kaykan”.
42 Elías tsaynö niptinmi Acab aywakurqan mikuq y upuq. Elíasmi itsanqa Carmelo jirkaman witsarkur qonqurikuykurqan qaqllanpis qonqurninman töpanqanyaq. 43 Nirkurnami wätayninta Elías nirqan: “Aywar lamarläpa rikachakamuy”.
Tsaynö niptinmi wätayninqa aywar lamarläpa rikachakurqan. Kutiykurnami nirqan: “Taytay, imapis manami kantsu”.
Elíasnami wätayninta yapay nirqan qanchis kuti rikachakamunanpä. 44 Qanchis kuti rikachakamuyninchömi nirqan: “Maki paltanöllami lamarpita pukutay yarqaykämun”.
Tsaynö niptinmi Elías nirqan: “Aywar Acabta niy manarä tamya qallanqanyaq carrëtanman yarkurkur wayinman juklla kutikunanpä”.