3 Tsaynö niptinmi pasaypa mantsarir Elíasqa qeshpir aywakurqan. Judá nacioncho Beersebaman chaykurmi wätayninta jaqiykurqan. 4 Tsaypita juk junaq qoyat tsunyaq jirkapa aywaykanqanchömi retäma jacha chakinman pishipashqa jamaskirqan. Tsaychömi wanuyta munar nirqan: “Tayta Dios, juklla qorikallämay. Wanukuq castäkunapa ayan mana väliq kanqannömi noqapis mana väliq kaykä”.

5 Tsaynö mañakuskirmi tsay retäma chakinman kitiykur punukaskirqan. Tsaycho Elías punukashqa kaykaptinmi juk ángel rikchatsir nirqan: “Mikunaykipä shäriy”.

6 Tsaynö niptinmi rikachakunqancho Elías rikarqan jawnan ñöpan shanshacho kuwashqa tantatawan uyllucho yaku kaykaqta. Tsayta mikuskir y upuskirmi yapay punukuykurqan.

7 Tsaypita yapay kutiykurmi rikchatsir ángel nirqan: “Karurämi aywanaykipä kaykan. Tsaynö kaykaptinqa mikukurkuy”.

8 Tsaymi sharkur yapay mikurqan y yakutapis upurqan. Tsay mikuyta mikunqallanwanmi chusku chunka (40) junaq y chusku chunka paqas aywar Tayta Dioswan tinkuna Horeb jirkaman charqan. 9 Tsaychömi machayman yaykuykur tsay paqas punurqan.

Tsaycho punuykaptinmi Tayta Dios nirqan: “Elías, ¿imatatä kaycho ruraykanki?”

10 Tsaymi Elías nirqan: “Munayyuq Tayta Dios kaptikimi llapan shonqüwan qamta sirviykä. Israel runakunaqa pactu ruranqaykita manami cumpliyantsu. Tsaynöpis altarnikikunatami juchutsir ushayashqa y profëtaykikunatapis wanutsirmi ushayashqa. Noqallanami qeshpishqä. Kananqa noqatapis wanutsiyämänanpämi ashiykäyäman”.^†

11 Tsaynö niptinmi Tayta Dios nirqan: “Kaypita yarquskir ñöpäman ichïmuy”.

Tsaynö niskirmi Tayta Dios tsaypa päsarqan. Tsay hörami jirkakunata kichakätsir y rumikunatapis amirrä shukukuy wayra päsarqan. Tsaynö kaptinpis Tayta Dios manami tsay wayracho karqantsu. Shukukuy wayra päsaskiptinnami mantsariypä temblor karqan. Tsay temblorchöpis Tayta Dios manami karqantsu. 12 Tsay temblor päsaskiptinnami lunyaypa lunyar nina rupaykaq päsarqan. Tsay ninachöpis manami Tayta Dios karqantsu. Nina päsaskiptinnami wallwallyayllapa wayra päsaykaqnö wiyakarqan. 13 Tsayta wiyaykurmi Elíasqa cäpanwan qaqllanta tsapakurkur machay punkuman yarquskir ichiskirqan.

Tsaycho ichiraykaptinmi Tayta Dios nirqan: “Elías, ¿imatatä kaycho ruraykanki?”

14 Tsaymi Elías yapay nirqan: “Munayyuq Tayta Dios kaptikimi llapan shonqüwan qamta sirviykä. Israel runakunaqa pactu ruranqaykita manami cumpliyantsu. Tsaynöpis altarnikikunatami juchutsir ushayashqa y profëtaykikunatapis wanutsirmi ushayashqa. Noqallanami qeshpishqä. Kananqa noqatapis wanutsiyämänanpämi ashiykäyäman”.

15 Tsaynö niptinmi Tayta Dios nirqan: “Shamunqallaykipa kutir Damasco tsunyaq jirkayaq ayway. Tsayman chaykur Hazaelpa umanman aceitita wiñapanki Siria nacionpa mandaqnin rey kananpä.^† 16 Tsaypita aywakur Israel nacionpa mandaqnin rey kananpä Nimsipa tsurin Jehúpa umanmanpis aceitita wiñapanki.^† Tsaynöpis qampa trokiki profëta kananpä Abel-mehola markapita Safatpa tsurin Eliseupa umanmanpis aceitita wiñapanki.

17 “Hazaelpa makinpita qeshpiq kaqtaqa Jehúmi wanutsinqa. Jehúpa makinpita qeshpiq kaqtanami Eliseo wanutsinqa. 18 Tsaynö kaptinpis kikïmi tsapäshä noqaman yärakamuq qanchis waranqa (7,000) runakunata. Paykunaqa manami Baalman qonqurikuyashqatsu ni mutsayashqatsu”.

19 Tsaypita Elías kutirmi Safatpa tsurin Eliseuta tarirqan chunka ishkay yuntankunawan melganakuypa yapyaykaqta. Eliseo ushanan kaq melgacho yapyaykaptinmi Elíasqa ñöpanman aywarnin cäpanta Eliseuta aqshuskatsir päsakurqan. 20 Tsaymi Eliseuqa yuntanta kachariykur Elíasta taripaykur rugarnin nirqan: “Qamwan aywanantsikpä puntata mamätawan taytätarä despidikur mutsaykamushä”.

Tsaynö niptinmi Elías nirqan: “Ayway ari. Itsanqa ama qonqaytsu aywanantsikpä kanqanta”.

21 Elías tsaynö niptinmi Eliseuqa kutiykur ishkan törunta pishtatsirqan. Nirkurmi yügunwan y arädunwan aytsata kankaskir tsay markacho kaq runakunata qararqan. Tsaypitanami Elíasta yanapananpä aywakurqan.