4 Tsaynö ninqanta willayaptinmi rey Acab nirqan: “Rey Ben-adadman kutiykur niyanki: ‘Taytay, makiki chakikichömi kaykä. Ninqaykinöllami llapan imaykäkunapis, warmïkunapis y shumaq kaq tsurïkunapis qampä kanqa’ ”.

Tsaynö niptinmi kachakuna aywaykur Ben-adadta willayarqan.

5 Tsaypitanami tsay kacha aywaq runakuna yapay kutiykur Acabta niyarqan: “Rey Ben-adadmi nin: ‘Llapan qoriykita, qellaynikita, warmikikunata y tsurikikunata entregamänaykipämi willatsirqä. 6 Tsaynö kaptinpis kananqa manami tsayllatatsu apakushä, tsaypa trokinqa palaciuykicho kaykaqta y mandar yanapashuqniki runakunapa wayinkunacho allinnin kaqkunatapis apakushämi. Tsaymi mandaq soldädukunata waray junaq kachamushä munayanqan kaqta apakayämunanpä’ ”.

7 Tsaynö niptinmi Israel mayor runakunata qayaykatsir rey Acab nirqan: “Tsay runaqa niq tumpallami atacamaynintsikta munaykan ëllu. Qorïta, qellaynïta, warmïkunata, tsurïkunata y imaykäkunatapis apakunanpä nikaptïpis mastarämi munaykan”.

8 Tsaynö niptinmi Israel mayor runakuna niyarqan: “Taytay, pay nishunqaykita ama cäsuytsu. Tsaynöpis llapan mañayäshunqaykita ama entregaytsu”.

9 Tsaynö niptinmi Ben-adad kachanqan runakunata Acab nirqan: “Mandamaqnintsik rey Ben-adadta niyanki: ‘Puntata mañakunqaykitaqa awnishushqaykishi. Tsaynö kaptinpis kanan mañakunqaykitashi itsanqa awnishunkitsu’ ”.

Tsaynö ninqantami Ben-adadman kutiykur kacha aywaq runakuna willayarqan.

10 Tsaynö willayaptinmi Ben-adad yapay kacharqan Acabta niyänanpä: “Kananqa Samaria markata llapantami polvuman tikratsishä. Tsaynö mana ushakätsiptïqa diosnïkuna pasaypa castigayämätsun”.

11 Tsayta wiyarmi rey Acabpis kacharqan niyänanpä: “Manarä vincimarqa ama alabakuyrätsu”.

12 Acab tsaynö ninqantami mandaq mayinkunawan toldunkunacho upyaykaptin Ben-adadta willayarqan. Ninqanta wiyarmi mandaq soldädunkunata nirqan: “¡Samaria runakunata juklla atacashun!”

Tsaynö niptinmi soldädunkuna kamarikuyarqan atacayänanpä.

13 Ben-adadpa soldädunkuna manarä atacaptinmi Israel runakunapa mandaqnin rey Acabman juk profëta chaykur nirqan: “Tayta Diosmi nin: ‘Tsaytsika soldädukuna shamuptinpis llapanta vinciyänaykipä makikimanmi churamushä. Tsaynö rurashä noqa Tayta Dios kanqäta musyanaykipämi’ ”.

14 Tsaynö niptinmi profëtata Acab tapurqan: “¿Imanöpatä Tayta Dios makïman churamunqa?”

Tsaynö tapuptinmi profëta nirqan: “Tayta Diosmi nin: ‘Provinciakunapita shamuq capitankunapa soldädunkuna vinciyänanpämi yanapashä’ ”.

Tsaymi Acab nirqan: “¿Noqakunaku puntata atacayäman o shuyäyämanku Ben-adadpa soldädunkuna puntata atacayänanpä?”

Tsaynö niptinmi profëta nirqan: “Qamkunami puntata atacayanki”.

15 Tsaymi Acab yuparqan provinciakunapita shamuq capitankunapa soldädunkunata. Tsay soldädukunami ishkay pachak kimsa chunka ishkay (232) kayarqan. Nirkurmi yuparqan wakin Israel soldädukunata. Paykunami qanchis waranqa (7,000) kayarqan. 16 Pullan junaq kaykaptinnami Israel soldädukuna pelyayänanpä yarquyarqan. Tsay hörami kimsa chunka ishkay (32) mandaq mayinkunawan Ben-adad qorikaykur toldunkunacho upyaykäyarqan. 17 Israel soldädukunapa puntantami aywayarqan provinciakunapita shamuq capitankunapa soldädunkuna.

Samariapita soldädukuna yarquykäyanqanta willayaptinmi 18 Ben-adad nirqan: “Atacamänantsikpä o mana atacamänantsikpä yarqamuptinpis kawaykaqta tsariskir apayämuy”.

19 Provinciakunapita shamuq capitankunapa soldädunkuna y wakin Israel soldädukunapis pelyayänanpä listunami aywayarqan. 20 Pelyayta qallaykurmi cada soldädu Siriapita shamuq juk soldäduta wanutsirqan. Mana wanutsiyanqan Siria soldädukuna qeshpir aywakuyaptinmi Israel soldädukuna qatipäyarqan. Tsaymi Siriapa mandaqnin rey Ben-adad y wakin kaq soldädukunapis cawallunkunata muntakurkur qeshpir aywakuyarqan. 21 Tsaynöpami Israel nacionpa mandaqnin rey Acab vinciskir Siria soldädukunapa cawallunkunata y guërraman aywayänanpä kaq carrëtankunata qechurqan.

22 Tsaypitanami rey Acabta profëta nirqan: “Watan kaynö witsanmi atacayäshunaykipä Siria soldädukuna yapay kutiyämunqa. Tsaynö kananpä kaykaptinqa shumaq yarpachakuskir soldäduykikunata kamarikatsiy pelyayänanpä”.

23 Tsaypitanami Siria nacionpa mandaqnin rey Ben-adadta capitanninkuna niyarqan: “Israel runakunapa diosninkunaqa jallqakunallachömi yanapan. Tsaymi guërracho vincimashqantsik. Pampaman apanakuykur pelyarmi itsanqa vincishun. 24 Pelyamanqa reykuna amana aywayätsunnatsu. Tsaypa trokinqa capitankunallana soldädunkunawan aywayätsun. 25 Nirkur ñöpata kamarikunqantsiknölla cawallukunata, carrëtakunata y soldädukunatapis shumaq kamarikushun. Pampaman apanakuykur Israel runakunawan pelyarqa mana mayayllami vincirishun”.

Tsaynö nir yätsiyaptinmi Ben-adadqa paykuna niyanqannölla kamarikurqan.

26 Tsaypita juk wata päsaskiptinnami Ben-adadqa llapan soldädunkunata qorikaskatsir Afecman aywayarqan Israel soldädukunawan pelyayänanpä. 27 Tsaynöllami Acabpis Israel soldädukunata qoriskir aywarqan Siria soldädukunawan pelyayänanpä. Siria soldädukunaqa ishniyparämi atska kayarqan. Israel soldädukunami itsanqa ishkay qencha cabranölla kayarqan.

28 Manarä pelyayaptinmi rey Acabman chaykur profëta nirqan: “Tayta Diosmi nin: ‘Siria soldädukunaqa yarpäyan jallqakunallacho qamkunata yanapanqätami. Tsaynö yarpaykäyaptinmi kananqa pampachöpis paykunata vinciyänaykipä yanapayäshayki. Tsaynöpami tantiyanki noqa Tayta Dios kanqäta’ ”.

29 Siria soldädukuna y Israel soldädukunaqa soqta junaqmi frenti frenti campamentunkunacho kayarqan. Qanchis kaq junaqchönami pelyar qallaykuyarqan. Tsay junaqmi chakillapa aywaq juk pachak waranqa (100,000) Siria soldädukunata Israel soldädukuna wanutsiyarqan. 30 Tsaynö wanuskatsiyaptinmi Afec markaman wakin kaq soldädukuna qeshpir aywakuyarqan. Tsaycho kaykäyaptinmi markapa murällan juchur ishkay chunka qanchis waranqa (27,000) Siria soldädukunata wanutsirqan. Ben-adadpis tsay markaman qeshpiskirmi wayin wayin pakakur purirqan.

31 Tsaynö pakakur puriykaptinmi soldädunkunapa mandaqninkuna payta niyarqan: “Israel nacionpa mandaqnin reykunaqa kuyapäkuqshi kayan. Tsaynö kaptinqa qachqa latsapakunata jatikurkur y waskata kunkantsikman watakurkur Israel runakunapa mandaqnin reyman aywashun. Tsaynö kaykaqta rikamarnintsikqa capazchi perdonaykämäshunpis”.

32 Tsaynö willanakuskirmi qachqa latsapata jatikurkur y waskata kunkakunaman watakurkur Israel runakunapa mandaqnin reyman aywayarqan. Chaykurmi niyarqan: “Tayta Acab, rey Ben-adadmi rugakushurniki kachayämashqa mana wanutsinaykipä”.

Tsaynö niyaptinmi rey Acab nirqan: “¡Allaw! ¿Kawaykanräku? ¡Payqa imayka wawqïnömi kaykan!”

33 Tsaynö niptinmi aywaqkuna tantiyayarqan Ben-adadta mana wanutsinanpä kanqanta. Tsaymi juklla niyarqan: “¡Ben-adadqa rasunpaypa wawqikinömi!”

Tsaynö niptinmi Acab nirqan: “Aywayay Ben-adadta pushayämunaykipä”.

Chaykuptinmi Ben-adadta guërra carrëtaman Acab witsätsirqan.

34 Tsaychömi Acabta Ben-adad nirqan: “Taytaykita taytä qechunqan markakunata kutiykatsishayki. Damascucho ima negociutapis churay negociunta Samariacho taytä churanqannö”.

Tsaynö niptinmi Acab nirqan: “Tsaynö kananpä kaptinqa libri kutikunaykipä kachaykushayki”.

Pactuta Ben-adadwan tsaynö ruraskirmi kutikunanpä kachaykurqan.

35 Tsaypitanami profëta mayinta juk profëta nirqan: “Maqamänaykitami Tayta Dios munaykan. Tsaynö kaptinqa mana kuyapaypa maqamay”.

Tsaynö niptinpis profëta mayinqa maqayta manami munarqantsu.

36 Maqayta mana munaptinmi tsay profëta nirqan: “Tayta Dios ninqanta mana cäsukunqaykipitami kaypita aywaykaptiki juk león wanutsishunki”.

Profëta ninqannöllami aywaykaptin juk león yuripaykur wanuskatsirqan.

37 Tsaypitanami tsay profëta tinkurqan juk runawan. Profëta mayinta mañakunqannöllami tsay runatapis mañakurqan maqananpä. Tsaynö mañakuptinmi yawartapis pükatsiypa maqar usharqan. 38 Tsaynö maqaskiptinmi pipis mana reqinanpä ñawinta tsapakurqan tsay profëta. Nirkurmi rey Acabta nänicho shuyararqan. 39 Tsaypa päsaykaptinmi rey Acabta profëta jinchi nirqan: “Taytay, pelyamanmi aywashqä. Tsaychömi prësuta cuidanäpä juk soldädu jaqipämarqan. Jaqipämarmi nimarqan tsay prësu qeshpiptin imaptinqa kikïta wanutsimänanpä kanqanta o sinöqa kimsa waranqa (3,000) qellayta päganäpä kanqanta. 40 Tsaynö kaptinpis ruraynïkunacho kakunqäyaqmi tsay prësu qeshpir aywakushqa”.

Tsaynö niptinmi rey Acab nirqan: “Qamtaqa shimillaykimi condenashushqayki”.

41 Tsaynö niptinmi ñawin tsaparaykaqta jipiskiptin rey Acab reqirqan profëta kanqanta. 42 Tsaymi profëta nirqan: “Tayta Diosmi nin: ‘Wanutsinaykipä makikiman Ben-adadta churaykämuptï kachanqaykipitami kananqa paypa trokin kikiki wanunki. Tsaynöllami paypa soldädunkunata wanutsiyänanpa trokin qampa soldäduykikunatana wanutsiyanqa’ ”.

43 Profëta tsaynö niptinmi rey Acabqa pasaypa llakikushqa y ajanashqa Samaria markacho kaykaq palaciunman kutikurqan.