3 Tsaynö niptinmi Nabot nirqan: “Tayta Dios manami munanqatsu castäkuna kachapämanqan herenciata pitapis rantikunäta”.^a

4 Tsaynö niptinmi rey Acabqa pasaypa llakishqa y ajanashqa wayinpa kutikurqan. Chaykurmi cämanman jitakaskir pared kaqläpa tikrakuskir mikuytapis munarqantsu.

5 Tsaynö kaykaqta rikaykurmi warmin Jezabel tapurqan: “¿Imapitatä llakishqa kaykanki? ¿Imanirtä mikuytapis munankitsu?”

6 Tsaymi Acab nirqan: “Jezreelpita Nabottami nishqä üva chakranta qellaychöpis o trukaypapis rantikamänanpä. Tsaynö niptïpis payqa manami awnimashqatsu”.

7 Tsaynö niptinmi warmin Jezabel nirqan: “Israel nacionpa mandaqnin rey kaykarqa ajanänaykipa trokin mikuy. Nabotpa üva chakrantaqa noqami entregashayki”.

8 Tsaymi jinan höra cartata Acabpa jutincho Jezabel qellqarqan. Nirkurmi sëllunwan sellaskir apatsirqan Nabotpa markan Jezreelcho taq mayor runakunaman y autoridäkunaman. 9 Tsay qellqanqan cartachömi nirqan: “Llapayki qorikaykur ayunarniki runakunapa ñöpanman Nabotta jamatsiyay. 10 Nirkur ishkay llulla runakunata yätsiyay ‘kay runaqa Tayta Diospa contran y mandamaqnintsik reypa contranmi parlashqa’ nir Nabotpa contran shäriyänanpä. Tsaynöpa tsay markapita jukläman jipiskir Nabotta saqmaypa wanutsiyanki”.

11 Llapan runakunawan autoridäkuna y mayor runakunami cartacho Jezabel ninqannölla rurayarqan. 12 Tsaymi ayünuman qorikaskir llapan runakunapa puntanman Nabotta jamatsiyarqan. 13 Tsaymanmi ishkay llulla runakunapis jamaykur Nabotta manakaqta jitapar llapan runakunapa puntancho niyarqan: “Kay runaqa Tayta Diospa contran y mandamaqnintsik reypa contranmi parlashqa”.

Tsaynö niyanqanta wiyaykurmi markapita jukläman jipiskir runakuna saqmaykällar Nabotta wanutsiyarqan. 14 Nirkurmi Jezabelman willakatsir niyarqan: “Nabottami saqmaypa wanutsiyashqä”.

15 Jezabel tsayta musyaskirmi runan Acabta nirqan: “Üva chakranta rantikuyta mana munashuqniki Nabot wanushqanami kaykan. Kananqa juklla aywar tsay chakrata tsariy”.

16 Nabot wanunqanta niptinmi Acabqa juklla aywar Nabotpa üva chakranta tsarikurqan.

17 Tsaymi Elíasta Tayta Dios nirqan: 18 “Israel nacionpa mandaqnin rey Acabwan tinkunaykipä ayway. Payqa Samariachömi kaykan. Kanan hörami Nabotpa üva chakranta tsarikunanpä aywashqa. 19 Chaykur payta ninki: ‘Tayta Diosmi nin: ¿Imanirtä Nabotta wanuskatsir chakranta tsarikuykanki? Tsaynö ruranqaykipitami Nabotpa yawarninta allqukuna laqwayanqancho qampa yawarnikitapis allqukuna laqwayanqa’ ”.

20 Tsaynö niptinmi Acabman Elías aywarqan. Payta rikaykurmi Acab nirqan: “Conträ kaykarqa ¿imaqtä shamushqayki?”

Niptinnami Elías nirqan: “Tayta Diosta mana cäsukur llutankunallata ruraptikimi shamushqä. 21 Tayta Diosmi nishunki: ‘Imayka desgraciawanmi castigashayki. Tsaymi qampita aywaraq llapan ollqu kaqkunata ushakätsishä, wätay o mana wätay kayaptinpis. Noqaqa qanrakunata jitaqnömi paykunata illakätsishä. 22 Israel runakunata jutsata ruratsir ajanätsimanqaykipitami Nabatpa tsurin Jeroboamta y Ahíaspa tsurin Baasata tsurinkunatawan ushakätsinqänö qamtapis tsurikikunatawan ushakätsishayki’. 23 Tsaynöllami Jezabelpäpis Tayta Dios nin: ‘Jezreel markapa murällan waqtanchömi Jezabelpa ayantapis allqukuna mikuyanqa’.^†

24 “Tsaynöllami markacho wanuq castaykikunatapis allqukuna mikuyanqa. Markapita juklächo wanuq kaqkunatanami wiskurkuna mikuyanqa”.

25 Acabnöqa manami pipis warmin ninqankunata cäsur Tayta Diosta ajanätsirqantsu. 26 Tsaymi Acabqa pasaypa jutsata rurar amorreo runakuna adorayanqan ïdulukunata adorarqan. Tsay ïdulukunata adorayanqanpitami Israel nacionpita amorreo runakunata Tayta Dios qarqushqa karqan.

27 Tayta Dios ninqanta Elías willaptinmi rey Acab latsapanta rachiskir qachqa latsapata jatikuskir ayunarqan. Tsaynöllami tsay latsapan jatishqa punurqan y umpukashqalla purirqan. 28 Tsaymi Elíasta Tayta Dios nirqan: 29 “Acab llutanta ruranqanpita llakikuykanqanta ¿tantiyashqaykiku? Tsaynö llakikur perdonta mañakamanqanpita kawanqanyaq manami tsay ninqä castïgukuna kanqarätsu. Pay wanuskiptin tsurin mandaq kaykaptinrämi castïgukuna kanqa”.