Salmo 2
Mandaq rey kananpä Tayta Dios churanqan
1 ¿Imanirtä runakuna Diospa contran shäriyan?
¿Imanirtä manakaqkunata yarpäyan?
2 Manakaqkunata yarparmi nacionkunapa mandaqnin reykuna guërrata rurayänanpä kamarikuykäyan.
Paykunaqa Tayta Diospa contran y akranqan reypa contran shäriyänanpämi willanakur nikäyan:†
3 “¡Munaynincho kanqantsikpita witikushun!
¡Munaynincho kanqantsikpita qeshpikushun!”
4 Tsaymi ciëlucho Tayta Dios asikun.
Tsay willanakuyanqantapis manakaqmanmi churan.†
5 Pasaypa ajarninmi ollqutupan.
Pasaypa mantsakätsirmi nin:
6 “Akranqä runatami rey kananpä churashqä.
Paymi Sión sagrädu jirkancho mandaq kaykan”.
7 Tayta Diosmi nimashqa:
“Qamqa tsurïmi kanki.
Kanan junaqpitami taytayki kä.†
8 Mañakamaptikiqa llapan nacionkunatapis herenciayki kananpämi rikatsishayki.
Kay patsatapis qampa kananpämi juk kuchupita jukaq kuchunyaq rikatsishayki.
9 Fiërru väraykiwanmi nacionkunata vincir ushakätsinki.†
Mitu mankata pakiriqnömi paykunata ushakätsinki”.
10 Nacionkunapa mandaqnin reykuna, llapaykikunapis shumaq tantiyakuyay.
Kay patsacho mandaqkuna, kay ninqäta shumaq chaskikuyay.
11 Tayta Diospita mantsapakur payta sirviyay.
Mantsapakurnin adorayay.
12 Diospa tsurinta respitar qonqurikuyay.
Mana respitayaptikiqa juklla ajanarninmi wanutsiyäshunki.
¡Payman yärakuqkunaqa kushishqami kawayanqa!