Salmos
Libru 1
Salmo 1—41
Salmo 1
Tayta Dios munanqannö kawaq runa y jutsasapa runa imanö kanqanpis
1 Kushishqami kawan Tayta Dios munanqannö kawaq runaqa.
Tsay runaqa llutan yätsikuykunata manami cäsupantsu.
Wakin runakuna jutsata rurayaptinpis payqa manami jutsata rurantsu.
Llutankunata parlayaptinpis payqa manami llutanta parlantsu.
2 Tsaypa rantinqa Tayta Diospa leyninkunata kushishqami cäsukun.
Paqaspa junaqpapis tsay leykunallapämi yarparan.
3 Tsay runaqa kaykan mayu kuchuncho plantashqa jachanömi,†
tiempun chämuptin alli wayuq jachanömi,
y raprankunapis mana qarwashtaypa lloqlluypa lloqlluykaqnömi.
Llapan ruranqankunapis allimi kaykan.
4 Jutsa ruraycho kawaq runakunaqa manami tsaynötsu kawayan.
Paykunaqa wayra apanqan tsaki päjanömi kayan.†
5 Paykunataqa Tayta Diosmi juzganqa.
Manami kuyanqan runatsu kayanqa.
6 Cäsukuqkunataqa alli kawayänanpä Tayta Diosmi yanapan.
Jutsa ruraqkunatami itsanqa jutsacho kaykaqllata ushakätsinqa.†