Tayta Diospa willakuyninta Pablo willakunqan
4
Tayta Dios kuyapäyämar willakuyninta willakuyänäpä churayämashqa kaptinmi chikiyämaptinpis llakikuyätsu. 2 Noqakuna manami imatapis llutankunata ni penqakuypä kaqkunata rurayätsu. Manami pitapis engañayätsu ni Tayta Diospa willakuyninman manami kikïkunapa yarpaynïkunata yapayätsu. Tsaypa trokinqa willakuyninta pïmaypis musyayänanpämi Tayta Dios munanqannö kawayä.3 Tsaynö kaptinpis infiernuman qaykushqa kayänanpä kaqkunaqa willakuyanqäta manami chaskikuyantsu. 4 Paykunaqa chaskikuyantsu kay patsacho kaykaq diosa yarpayninkunata upatakätsishqa kaptinmi. Tsaymi Jesucristupa willakuynin aktsinö kaykaptinpis paykunaqa mana rikaqnö kar tsay willakuyninta tantiyayantsu. Jesucristuchömi Tayta Dios imanö kanqantapis tantiyantsik.
5 Manami noqakunapa munaynïkunacho kawayänaykipätsu willakuyä, sinöqa Señor Jesucristupa munaynincho kawayänaykipämi. Noqakunaqa Jesucristuta sirvir qamkunapa wätaynikikunanöllami kaykäyä. 6 Tsaynö kaykäyä chipipiykaq aktsitanö alli willakuyninta shonqükunaman Tayta Dios churamushqa kaptinmi. Tsaynö churamushqa kay patsata kamar tsakaycho atsikyay kananpä ninqannöllami.† Tsaymi Tayta Dios imanö kanqantapis Jesucristucho shumaq tantiyaykäyä.
Imanö ñakarpis Pablo willakunqan
7 Tsay alli willakuyqa shonqükunacho kaykan mitu mankacho pasaypa väliq riquëza kaykaqnömi. Noqakuna mitu mankanölla karmi kikïkunapa munaynïkunawantsu willakuyä, sinöqa Tayta Diospa munayninwanmi. 8 Tsaymi imanö ñakatsiyämaptinpis mana ajayaypa willakuykäyä. Ima rurayta mana kamäpakurpis manami alläpaqa llakikuyätsu. 9 Chikiyämaptinpis Tayta Dios manami kachariyämantsu. Conträ shäriyaptinpis Diosllamanmi imaypis yärakuyä. 10 Maypa aywayaptïpis Jesucristo ñakanqannö ñakayanqätami runakuna rikayäman. Payta cäsukuyaptïmi ichikllapana wanutsiyämanpis. Tsaynöpami runakuna tantiyayan wanuypita salvamänanpä Jesucristo munayyuq kanqanta. 11 Jesucristupa willakuyninta willakunqäpita wanutsiyämayta munayaptinpis Jesucristo noqakunawan kawanqanmi musyakan. 12 Tsaymi janäkunachöna wanuy kaptinpis mana ushakaq kawayta tariyänayki raykuq willakuykäyä.
13 Tayta Diospa palabrancho kaynömi qellqaraykan: “Payman yärakurmi willakushqä”.†
Tsay qellqaraykanqannöllami noqakunapis Tayta Diosman criyikur willakuyninta willakuykäyä. 14 Payman yärakurmi musyantsik Señor Jesucristuta kawaritsimunqannö kawatsimänantsikpä kanqanta. Tsaynöllami musyantsik ñöpanman apamänantsikpä kanqanta. 15 Tsaymi imanö ñakarpis salvakuyänaykipä willakuyä. Tsaynöpami wakin runakunatapis Tayta Dios kuyapar salvaptin maytsaychöpis payta agradëcikur alabayanqa.
16 Tsaymi Tayta Diospa willakuyninta mana ajayaypa willakuyä. Awkinyashqa cuerpuntsik lasaptinpis shonquntsikchöqa qoyay qoyay mas chölunömi kaykantsik. 17 Kay patsacho kanqantsikyaq ñakarpis gloriacho imayyaqpis kawanantsikpämi kamarikuykantsik. Tsay kawaymanqa manami imapis kay patsacho kaqkuna tinkuntsu. 18 Manami kay patsacho kawanantsikllapätsu yarpachakuntsik, sinöqa gloriacho kawanantsikpämi. Kay patsacho kawayqa ushakaqllami. Gloriacho kawaymi itsanqa mana ushakaq kanqa.