Corinto wawqikuna panikuna recomendación cartanö kayanqan
3
Tsaynö niptï chaskiyämänayki raykuq parlayanqäta ama yarpäyaytsu. Tsaynöpis ama yarpäyaytsu chaskiyämänaykipä recomendación cartatarä ministiyanqäta. Wakin runakuna recomendación cartata puritsiyaptinpis qamkuna chaskiyämänaykipäqa manami ministiyätsu. Tsaynöpis juk markaman chäyaptï chaskiyämänanpä manami qamkunapita recomendación cartata ministiyätsu. 2 Tsaypa trokinqa kikikikunami shonqükunacho qellqaraykaq recomendación cartä kayanki. Tsay cartataqa pïmaypis liyiyanmi.a 3 Tsaynöpami runakuna musyayan willakuyanqäta criyir Jesucristo qellqanqan carta kayanqaykita. Tsay cartataqa manami tintawantsu qellqashqa, sinöqa imayyaqpis kawaq Tayta Diospa Espïritunwanmi. Tsaynöpis manami läja rumichötsu† qellqashqa, sinöqa shonquykikunachömi.†4 Tsaynö kayanqaykita musyayä Jesucristo salvayämanqanpita Tayta Diosman criyikurmi. 5 Willakuyänäpä manami yachaq kayanqämantsu yärakuyä, sinöqa Tayta Diosmanmi. 6 Paymi yanapayäman mushuq pactupä† willakuyänäpä. Tsay mushuq pactuqa manami leykunapa munaynincho kawanantsikpätsu nimantsik, sinöqa Espíritu Santu tantiyatsimanqantsiknö kawanantsikpämi. Leykunapa munaynincho kawarqa wanushqanömi kawantsik.† Espíritu Santupa munaynincho kawarmi itsanqa mana ushakaq kawayta tarintsik.
Moisés qellqanqan leykunapitapis Jesucristupa willakuynin mas alli kanqan
7 Läja rumicho qellqaraykaq leykuna runakunata salvananpä mana kaykaptinpis tsay leykunata Israel runakunaman Moisés chätsiptinmi qaqllan pasaypa chipipirqan. Tsay chipipinqan illakaqlla kaykarpis pasaypami chipipirqan.† Tsaymi Moiséspa qaqllanta rikayta kamäpakuyarqantsu. 8 Moisés apamunqan leykunapis tsaynö kushikuypä kaykaptinqa ¿manaku Espíritu Santu apamunqan willakuy mas kushikuypä kaykan? 9 Mana salvakunantsikpä kaykarpis tsay leykuna alli kaykaptinqa salvamänantsikpä kaq willakuy mas allimi kaykan. 10 Tsay leykunaqa Espíritu Santu apamunqan willakuyman manami tinkuntsu. 11 Tsaymi ushakänanpä kaq leykuna kushikuypä kaptinpis Jesucristupa mana ushakaq willakuynin mas kushikuypä kaykan.
12 Tsayta musyarmi mana mantsariypa willakuyä. 13 Manami Moisésnötsu Diospa willakuyninta willakuyä. Payqa qaqllan chipipinqan illakaykanqanta Israel runakuna mana rikayänanpämi vëluwan tsapakurqan.† Tsaynöpami leykuna ushakänanpä kanqanta tantiyayarqantsu.
14 Moiséspa qaqllan tsaparanqannömi Israel runakunapa yarpayninkunapis tsapashqanö kaykan. Tsaymi punta kaq pactuta liyir päsaqlla kanqanta kananyaqpis tantiyayantsu. Jesucristuman criyikurrämi shumaqna tantiyayanqa. 15 Moisés qellqanqan leykunata liyirpis manami kananyaqpis tantiyayantsu. 16 Señornintsikman criyirmi itsanqa tantiyakuyanqana.
17 Señornintsikqa Espíritu Santumi. Paypa Espïritunta chaskirmi librina kantsik. 18 Librina karmi Señornintsikta rikaqnö kaykantsik. Tsaymi runakuna rikamarnintsik kikin Señornintsikta rikaqnö kaykäyan. Tsaynöpis Señornintsikqa Espíritu karmi qoyay qoyay yanapamantsik kikin kanqannö noqantsikpis kanantsikpä.†