4 Tsay cartata qellqamur qallayashqalla kaykäyanqaykita yarparmi pasaypa llakikur waqarqä. Manami llakikuyänaykipätsu cartakamurqä, sinöqa qamkunata pasaypa kuyanqäta musyayänaykipämi.

5 Conträ runaqa manami noqallatatsu llakikatsimashqa, sinöqa qamkunatapis llakikatsiyäshushqaykimi. 6 Tsay runata corrigiyanqayki allimi. 7 Alläpa mana llakikunanpä perdonar shakyätsiyay. 8 Tsaymi qamkunata rugakü payta kuyapar alli rikayänaykipä.

9 Tsay cartata qamkunaman cartakamurqä tsay runata corrigiyänaykipämi. Tsaynöpami musyayta munarqä cäsukayämanqaykita o mana cäsukayämanqaykitapis. 10 Tsay perdonayanqayki runata noqapis perdonämi. Perdonanäpä mana kaptinpis qamkuna raykuqmi Jesucristupa ñöpancho payta perdonashqä. 11 Musyantsikmi Satanás imaykanöpapis runakunata jutsaman ishkitsinanpä kanqanta. Tsaymi tsay runata perdonashqa qallayätsinakuyman Satanás jitarpamäshunnatsu.

12 Troas markaman Jesucristupa alli willakuyninta willakuq chaptï manami ima tsapapis kashqatsu. 13 Tsaynö kaptinpis qamkuna kaqpita Tito mana musyakämuptinmi pasaypa llakikurqä. Tsaymi Troascho quëdanäpa trokinqa Tituta ashiq^a Macedonia provinciaman aywarqä.^†

14 ¡Tayta Diostami agradëcikü! Paymi Jesucristucho kayaptï imaypis yanapayäman. Tsaymi willakuyaptï maytsaychöpis runakunata tantiyatsin Jesucristuman criyikur payta reqiyänanpä. 15 Jesucristupa willakuyninta willakuyanqäqa inciensiupa alli mushkuyninnömi Tayta Diospä kaykan. Salvakuyänanpä kaqkunaman y mana salvakuyänanpä kaqkunamanpis chanmi. 16 Mana salvakuqkunapäqa melanaypä asyaqnömi kaykan. Salvakuqkunapämi itsanqa kuyayllapä mushkuqnö kaykan. Tsaynö kaptinqa ¿pirä kikillanpita Jesucristupa willakuyninta willakunman?

17 Wakinkunaqa imatapis chaskiyänan raykuqmi Diospa willakuyninta willakuykäyan. Noqakunaqa manami paykunanötsu kayä, sinöqa Tayta Dios kachayämashqa kaptin y noqakunawan pay kaykanqanta musyarmi Jesucristupa jutincho llapan shonqükunawan willakuyä.