Mushuq cuerputa chaskinantsikpä ninqan
5
Musyantsikmi kay cuerpuntsik ushakaptinpis mana ushakaq mushuq cuerputa Tayta Dios qaramänantsikpä kanqanta. Kay patsachöqa cuerpuntsik ushakaq tsukllanöllami kaykan. Gloriachömi itsanqa mushuq cuerpuntsik Tayta Dios ruranqan alli wayinöna kanqa. 2 Kay patsacho kawanqantsikyaqqa mushuq cuerputa juklla chaskiyta munarmi yarpachakur llakikuntsik. 3 Mushuq cuerputa chaskirqa manami qallapächunötsu kashun, sinöqa alli latsapashqanönami kashun.4 Kay patsacho cuerpuntsik ushakaqlla kaptin llakikurpis manami wanuyta munantsiktsu, sinöqa cuerpuntsik mana ushakaq cuerpuman juklla tikranantami munantsik. 5 Mana ushakaq cuerpuyuq kanantsikpämi Tayta Dios kamamashqantsik. Mushuq cuerputa chaskinantsikpä kanqanta musyanantsikpämi Espíritu Santuta qaramashqantsik.
6 Tsaymi Tayta Diosman imaypis yärakuntsik. Musyantsikmi kay patsacho kanqantsikyaqqa Tayta Diosta manarä rikanqantsikta. 7 Payta manarä rikarpis paymanmi yärakuntsik. 8 Payman yärakurmi cuerpuntsikta kacharir puntanman juklla chayta munantsik. 9 Tsaymi kawarpis o wanurpis Tayta Dios munanqannö kawanantsikpä imaypis yarpachakuntsik.
10 Jesucristupa ñöpanman chashqami llapantsikta juzgamäshun.† Kay patsacho kanqantsikyaq allita o mana allita ruranqantsikpitami premiutapis o castïgutapis chaskishun.
Tayta Dioswan runakuna amistayänanpä willakuyanqan
11 Señor Jesucristo juzgamänantsikpä kanqanta musyarmi paypita mantsapakur willakuyninta imaykanöpapis willakuyä. Rasunpaypa sirviyanqätami Tayta Dios musyan. Tsaytaqa qamkunapis tantiyayankimanmi. 12 Tsaynö nï manami yachaq kayanqäta alabakurtsu, sinöqa Tayta Diospa willakuqnin kayanqäta tantiyar kushikuyänaykipä y pipis conträ parlaptin janä shäriyänaykipämi.
Tsay conträ shäriqkunaqa yachaq tukurpis janan shonqullami Tayta Diosta sirviyan. 13 Löcu kayanqäta niyaptinpis Tayta Diosta sirviyänä raykuqmi löcu nishqapis kayä. Alli yarpayyuq kayanqäta niyaptinpis qamkunata yanapayänä raykuqmi alli yarpayyuq kayä. 14 Imanö niyämaptinpis noqakunaqa Jesucristo kuyamanqantsikta tantiyarmi wanuytapis mana mantsariypa payta sirviyä. Tsaynö sirviyä Jesucristo llapantsik raykuq wanunqanta musyarmi. Noqantsik raykuq wanuptinmi llapantsikpis jutsa ruraypä wanushqanöna kantsik. 15 Manami kikintsik munanqallantsikta rurar kawanantsikpätsu Jesucristo wanushqa, sinöqa pay munanqannöna kawanantsikpämi. Payqa wanurpis noqantsik raykuqmi kawarimushqa.
16 Tsaynö kaptinmi Diosman mana yärakuq runakunanöqa pipäpis llutanta yarpäyätsu. Ñöpataqa noqakunapis mana criyikuq runakunanöllami Jesucristupä llutanta yarpäyarqä. Kananqa manami tsaynönatsu yarpäyä. 17 Pipis Jesucristucho karqa mushuq kamanqan runanami kaykan.† Unay kawayqa päsashqanami. Kananqa llapanpis mushuqnami kaykan.
18 Tsaynö kanantsikpä kikin Tayta Diosmi kamakätsishqa. Paymi Jesucristo noqantsik raykuq wanunqanpita perdonamashqantsik. Tsaynöllami runakuna paywan amistayänanpä willakuyninta willakuyänäpä churayämashqa. 19 Tsay willakuyqa kaynömi nikan: Jesucristuchömi Tayta Dios karqan runakunata jutsankunapita perdonar kikinwan amistananpä. Tsay willakuyta willakuyänäpämi churayämashqa.
20 Tsaymi noqakunaqa Jesucristupa willakuqninkuna kayä. Willakuqnin karmi Tayta Dios rugakuykaqnö Jesucristupa jutincho pïmaytapis kaynö nir rugakuyä: ¡Tayta Dioswan amistakuy! 21 Jutsaynaq kaykaptinpis llapan jutsantsiktami Jesucristuman Tayta Dios jitapashqa. Tsaymi jutsayuq runanö noqantsik raykuq wanuptin paycho kashqa Tayta Dios jutsaynaqtanö chaskimantsik.