6
Willakuqnin karmi kuyakuq Tayta Diosta mana yupaytupäyänaykipä qamkunata rugakuyä. 2 Palabranchömi nin:“Kuyapänäpä kaq höra chämuptinmi rugakamanqaykinö yanapashqä.
Salvanäpä kaq junaqmi qamta salvashqä”.†
Tayta Dios kuyapäyäshunayki höraqa kanan hörami kaykan. Tayta Dios salvayäshunayki junaqqa kanan junaqmi kaykan.
Imanö ñakarpis Pablo willakunqan
3 Noqakuna willakuyanqäta pipis manakaqman mana churayänanpämi imatapis llutanta rurayätsu. 4 Tsaypa trokinqa Tayta Diosta sirviq kayanqäta tantiyakuyänanpämi pay munanqannölla kawayä imanö ñakarpis, ima pishïyämaptinpis, pasaypa llakikurpis, 5 castigayämaptinpis, carcelman wichqayämaptinpis, maqayämaptinpis, pishipashqa willakurpis y punuyta mikuyta mana tarirpis. 6 Tsaynöpis Tayta Diosta sirviq kayanqäta tantiyakuyänanpämi jutsata mana ruraypa kawayä, willakuyninta shumaq tantiyakuyä, chikiyämaqnïkunata perdonayä, pïmaytapis kuyapäyä, Espíritu Santupa munaynincho kawayä, pïmaytapis kuyayä, 7 Diospa willakuyninta willakuyä y pay yanapayämaptin imatapis allita rurayä. Conträ shäriyaptinpis pay munanqannö allillatami rurayä.
8 Wakin runakunami alli rikayäman y wakinnami mana alli rikayäman. Tsaynöpis wakinmi favornï parlayan y wakinnami conträ parlayan. Rasun kaqllata parlayaptïpis llullakuyanqätami yarpäyan. 9 Wakinqa reqiyämarpis manami reqiq tukayämantsu. Ushakäyanqäta yarpäyaptinpis kawaykäyärämi. Chikiyämar ñakatsiyämarpis manami wanutsiyämashqatsu. 10 Llakishqa karpis kushishqallami kawaykäyä. Muchuq karpis atskaqta rïcuyätsiqnömi kaykäyä.a Imäkuna mana kaptinpis noqakunapami llapanpis kaykan.
11 Corinto wawqikuna panikuna, llapan shonqükunawan kuyarmi imatapis mana pakaypa llapan yarpäyanqäta willayashqä. 12 Qamkunata kuyar mana qonqaypa yarparaykaptïqa ¿imanirtä qonqaykayämashqayki? 13 Tsaymi wamräkunatanö niyä: Noqakuna kuyayanqänö qamkunapis kuyayämar yarpaykayällämay.
Tayta Diospa templun kanqantsik
14 Wawqikuna panikuna, musyayanqaykinöpis manami pipis törutawan ashnuta yüguntsu. Tsaynöllami qamkunapis Jesucristuman mana criyikuqkunawan yügukäyankimantsu. Alli ruraypis manami mana alli ruraywan tinkuntsu. Aktsi kanqanchöpis tsakay manami kantsu. 15 Jesucristupis Belialwanb manami tantiyanakuyantsu. Tsaynöllami Jesucristuman yärakuqkunawan mana yärakuqkunapis tantiyanakuyantsu. 16 Tsaynöpis Tayta Diospa templunman ïdulukunata jamatsiyanqan manami allitsu kaykan. Noqantsikqa imayyaqpis kawaq Tayta Diospa templunmi kantsik.† Palabranchömi Tayta Dios nin:
“Paykunawanmi täshä.
Paykunawanmi purishä.
Paykunapa Diosninkunami kashä.
Paykunami kuyanqä runakuna kayanqa”.†
17 Mastami palabrancho nin:
“Jutsa ruraq runakunapita witikuyay.
Paykunapita yarqukuyay.
Imatapis impüruyätsikuqkunata ama yatayaytsu.
Tsaynö kawayaptikimi chaskiyäshayki.†
18 Qamkunapa taytaykimi kashä.
Qamkunami wamräkuna kayanki.
Llapanpä munayyuq Tayta Dios karmi tsaynö nï”.†