2 Wawqikuna panikuna, yarpaykayällämay. Qamkunata manami mayqaykitapis mana allita rurayashqätsu ni llullapäyashqätsu ni engañayashqätsu. 3 Qamkunata tsaynö nï manami manakaqman churartsu, sinöqa ñöpata ninqänöpis qamkunata kuyayämi. Tsaymi imaypis mana qonqaypa yarparäyäshayki. 4 Ninqäkunata chaskiyänaykipä kanqanta tantiyarmi qamkunaman yärakü. Tsaymi ima päsamaptinpis llakikunäpa trokin pasaypa kushikü.

5 Macedonia provinciaman chäyanqäpita manami jamaytapis tariyashqätsu. Tsaypa trokinqa runakuna conträ shäriyaptin y qamkunapä y Titupä yarpachakurmi pasaypa llakikuyashqä. 6 Tsaynö kaykäyaptïmi Tito chämuptin llakishqa kaykaqkunata shakyätsiq Tayta Dios shakyätsiyämashqa. 7 Manami Tito chämunqallanpitatsu kushikuyashqä, sinöqa qamkuna kaqpita Tito kushishqa kutimunqanpitapis kushikuyashqämi. Paymi willayämashqa qamkunaman watukaq shamunäta munaykäyanqaykita, qallayätsinakunqantsikpita llakikuyanqaykita y noqapä yarpachakuykäyanqaykitapis. Tsaynö willayämaptin masrämi kushikuyashqä.

8 Apatsimunqä cartata liyir llakikuyanqaykita musyarpis manami llakikütsu. Qellqamunqä hörami itsanqa pasaypa llakikurqä cartacho ninqäta liyir llakikuyänaykipä kanqanta musyar. 9 Kananqa pasaypami kushikü. Manami qamkunata llakikatsinqäpitatsu kushikü, tsaypa trokinqa tantiyakur Tayta Diosta cäsukuyanqaykipitami. Cartata apatsiyämunqä manami manakaqllapätsu kashqa, sinöqa Tayta Dios munanqannö llakikuyänaykipämi.

10 Tayta Dios munanqannö llakikurqa jutsa rurayta kacharintsikmi. Jutsa rurayta kachariqkunatami Tayta Dios perdonan. Tsaynö perdonta tarirqa manami llakikuntsiknatsu, sinöqa kushikuntsikmi. Tsaynö kaptinpis mana criyiqkunami itsanqa llakikurpis jutsa rurayta mana kacharir wanushqanö kaykäyan.

11 Tayta Dios llakikuyman churayäshunqayki allipämi kashqa. Tsaymi kananqa perdonta mañakayämashqayki, conträ shäriq runapä ajanäyashqayki, Tayta Diospita mantsapakuykäyanki, noqawan tinkuytana munaykäyanki, noqapä yarpachakuyanki y jutsayuq runata corrigiyashqayki. Tsaynö kayaptikimi tantiyakuyä llapanta sitiunman churayanqaykita.

12 Tsay apatsimunqä carta manami conträ shäriq runata corrigiyänallaykipätsu ni noqa kushikunalläpätsu kashqa, sinöqa tantiyatsiyanqäta chaskikur rasunpaypa kuyayämanqaykita [y noqapis qamkunata kuyanqäta] Tayta Diospa ñöpancho tantiyayänaykipämi. 13 Kuyayämanqaykita musyarmi pasaypa kushikuyashqä. Masrämi kushikuyashqä Tituta alli chaskiyanqaykipita y shakyätsiyanqaykita kikin willayämaptin.

14 Manarä qamkuna kaqman Tito shamuptinmi payta shakyätsir nirqä: “Paykuna allimi chaskiyäshunki”. Tsay ninqänöllami llapanpis kashqa. Tsaymi qamkunata imaypis rasun kaqta ninqänö qamkunapä payta ninqäkunapis rasun kaqlla kashqa. 15 Kananqa cäsukuyanqaykipita y payta alli chaskikuyanqaykipitami Titupis qamkunapä yarparaykan. 16 Tsaynöllami yärakuypä kayanqaykipita noqapis kushikü.