Ofrendata qoriyänanpä ninqan
8
Wawqikuna panikuna, Macedoniacho wawqikunata y panikunata Tayta Dios kuyapar imanö yanapanqantapis willayäshayki. 2 Paykunaqa pasaypa ñakarpis y pasaypa muchuycho karpis kushishqami tsaytsika ofrendata qoriyashqa. 3 Kikïmi rikashqä ofrendata churayänanpä kaqpita masta churayanqanta. Tsaynö churayashqa kikinpa voluntäninpitami. 4 Kutin kutinmi paykuna rugakayämashqa wakin markakunacho ofrendata qoriyanqannö Jerusaléncho criyikuq mayintsikkunapä paykunapis qoriyänanpä.† 5 Ofrendata qorir yarpäyanqäpitapis mas atskatami qoriyashqa. Puntataqa Señor Jesucristupa munaynincho kawayänanpämi awniyashqa. Tsaypitanami imata yätsiyanqätapis Tayta Dios munanqannö cumpliyänanpä niyämashqa.6 Qamkunapis ofrendata qorir qallaykuyänaykipä Titumi shakyätsiyäshushqayki. Tsaymi payta rugakurqä qamkuna kaqman kutimur tsaynölla shakyätsiyäshunaykipä. 7 Tayta Dios allimi yanapaykäyäshunki payman yärakuyänaykipä, shumaq parlayänaykipä, alli yachayänaykipä, yanapakuq kayänaykipä y yachatsiyanqänö pïmaytapis kuyayänaykipä. Tsaynölla atska ofrendata qoriyänaykipäpis Tayta Dios yanapaykuyäshunki.
8 Wakinkuna kushishqa qoriyanqanta nikä manami mana munaykaqta obligartsu, sinöqa kuyapäkuq kayanqaykita pïmaypis musyananpämi. 9 Qamkuna musyayankimi Señor Jesucristupis kuyapäkuq kanqanta. Paymi gloriacho imaykayuq kayninta kacharir kay patsaman shamur muchuqnölla karqan. Tsaynö karqan qamkunapis gloriaman char Tayta Diospa ñöpancho imaykayuq kayänaykipämi.
10 Kanan yätsinqäta cäsukuyay: Qäyan wata ofrendata qorir qallashqana kaykarqa 11 kapuyäshunqaykiman tupu qorir sïguiyay. 12 Llapan shonquykikunawan kushishqa qoriyaptikiqa ofrendaykikunata Tayta Dios chaskiyäshunkimi. Itsanqa kapuyäshunqallaykipita churayay. Ama llakikuyaytsu churayanqayki ofrenda wallkalla kaptinpis.
13 Manami muchuyman churayta munartsu tsaynö nï, tsaypa trokinqa llapantsikpis yanapanakunantsikta munarmi. 14 Jerusaléncho yärakuq mayintsikkuna kanan pishïpakuyaptinpis qamkunapaqa kanrämi. Qamkuna muchuycho kayaptikinami paykunapis yanapayäshunki. Juknintsik juknintsik tsaynö yanapanakurqa manami pishïpakushunnatsu. 15 Tayta Diospa palabranchöpis kaynömi qellqaraykan:
“Atskata qoriyaptinpis manami ujurqantsu.
Wallkallata qoriyaptinpis manami pishirqantsu”.†
Yanapaqninkunawan Corintuman Tito aywayänanpä ninqan
16 Titupis noqanölla qamkunapä yarpaptinmi Tayta Diosta agradëcikü. 17 Tsaymi qamkuna kaqman kutimunanpä niptï kushishqa awnimashqa. Qamkunawan kayta munarmi manarä niptïpis shamuyta munaykan. 18 Tituwanmi juk wawqitapis kachaykämü. Tayta Diospa willakuyninta alli willakuq kaptinmi kaycho kaq llapan wawqikuna panikuna alli wawqi kanqanta niyan. 19 Tsaymi Jerusalénman ofrendata apayaptï yanapayämänanpäpis payta akrayashqa. Ofrendata chätsiyaptïnami yanapakuq kanqantsikta tantiyar Tayta Diosta alabayanqa. 20 Atska ofrendata chätsiyänäpä yanapayämaptinmi pipis llutanta parlanqatsu. 21 Tayta Diospa ñöpanchöpis y runakunapa ñöpanchöpis allillatami rurayta munä.
22 Tituwanmi mas juk wawqitapis kachaykämü. Paypis Tayta Dios munanqannö kawaq wawqimi. Alli chaskiyänaykipä kanqanta musyarmi paypis yanapayäshunaykipä kushishqa shamuykan.
23 Tito pï kanqantapis tapuyäshuptiki noqawan willakur puriq kanqanta willayanki. Manami noqallata yanapamänanpätsu tsaynö purin, tsaypa trokinqa qamkunatapis yanapayäshunaykipämi. Tsaynölla paywan shamuq ishkan wawqikunapita tapuyäshuptikipis willayanki kaycho kaq wawqikuna panikuna paykunata kachayämunqanta y Cristo munanqannö alli kawayanqanta. 24 Qamkuna kaqman chäyämuptin paykunata shumaq chaskiyanki. Tsaynöpami maytsaychöpis wawqikuna panikuna musyayanqa ninqänölla kuyapäkuq kayanqaykita.