R
rabí Rabíqa Tayta Diospa palabranta yachaq y yachatsiq runami karqan. Jesucristo kawanqan witsanmi Tayta Diospa palabranta yachatsir markan markan rabíkuna puriyarqan. Rabíkunawanmi wakin runakunapis yachakuyta munar puriyarqan. Tsay runakunatami rabípa discïpulun kayanqanta niyarqan. Jesucristupis rabími karqan (Juan 1.38; 3.2, 26; 4.31; 6.25).
Rahab kuru Unay runakuna niyarqan Tayta Dios kay patsata kamanqan witsan Rahabqa lamarcho jatunkaray mantsaypä kuru kanqantami. Tsay kuru Tayta Diospa contran kaptinmi Tayta Dios vincirqan (Job 26.12; Sal. 89.10; Isa. 51.9).
Ramäda fiesta Trïgu cosëchata y üva cosëchata ushaskirmi Ramäda fiestata qanchis junaqyaq rurayarqan (Lev. 23.34-36; Deut. 16.13). Tsay karqan octubri killa qallaykunanchömi. Tsay fiestata rurayänanpämi llapan ollqu kaqkuna Jerusalénmanrä aywayaq (Deut. 16.16). Tsay fiestachömi ramädakunallacho punuyaq (Lev. 23.42). Tsaycho punuyaq Egiptupita Israel runakunata Tayta Dios jipimuptin ramädallacho täyanqanta yarpäyänanpämi (Lev. 23.43). Jesucristupis Ramäda fiestaman aywarmi runakunata yachatsirqan (Juan 7.37-39).
reqiy, Diosta reqiy Tayta Diosta reqirqa payman yärakuntsik y pay munanqannö kawarmi kushikuntsik. Tsaynöpis musyantsik kuyakuq kanqanta, munayyuq kanqanta, jutsaynaq santu kanqanta, juzgakuq kanqanta, allillata rurä kanqanta y awninqanta imaypis cumpliq kanqanta.
Tayta Diosta reqinantsikpä textukuna atskami kaykan:
(1) Tayta Diosta reqinantsikpämi Jesucristo kay patsaman shamurqan (1Juan 5.20).
(2) Jesucristo mana tantiyatsiptinqa manami pipis Tayta Diosta reqinmantsu (Mat. 11.27).
(3) Mana ushakaq kawaycho kawarqa Tayta Diosta y Jesucristutami reqintsik (Juan 17.3).
(4) Payta reqinantsikpämi Tayta Dios awnimashqantsik (Heb. 8.11).
(5) Juknintsik juknintsik kuyanakurmi Diosta reqintsik (1Juan 4.7-8). Tsaynöpis liyinki Jer. 22.16.
(6) Tayta Diosta reqishqami munanqannö kawanantsikpä yanapamantsik (2Ped. 1.3).
(7) Tayta Diosta reqinqantsikmi llapanpitapis mas alli (Jer. 9.23-24).
(8) Apóstol Pablupis Jesucristuta mas reqiytami munarqan (Fil. 3.10).
Kay patsacho kawanqantsikyaq Tayta Diosta reqirpis llapantaqa manami shumaq tantiyantsiktsu (Isa. 55.8-9; Rom. 11.33-34). Diospa ñöpanman chaykurmi itsanqa payta shumaq reqishun (1Cor. 13.12; Apoc. 22.4).
Runapa Tsurin Runapa Tsurinpä parlarqa kikinpämi Jesucristo parlarqan (Juan 9.35-37). Tsaynöpami tantiyatsirqan Daniel 7.13-14-cho qellqaraykanqannö Runapa Tsurin kanqanta, kutimunanpä kanqanta (Mat. 13.41-42; 24.27, 30, 44; 25.31) y llapanpä munayyuq kanqanta (Mar. 2.10; 2.28).
rupatsina sacrificiu Rikay sacrificiu ninqanta.