3 Tayta Diosta kuyarqa mandamientunkunatami cumplintsik.^† Mandamientunkunata cumpliyqa manami ajatsu.^† 4 Tsaynö kaykan Tayta Diospa wamrankuna Satanásta vincishqa kaptinmi.^† Tayta Diosman yärakurmi payta vincintsik. 5 ¿Pitä Satanásta vincin? Jesucristo Tayta Diospa Tsurin kanqanta criyiqkunallami.

6 Jesucristo Diospa Tsurin kanqanta musyantsik bautizakunqan höra wamran kanqanta Tayta Dios nimushqa kaptinmi^† y yawarninta jichar wanushqa kaptinmi.^† Manami bautizakuptin Tayta Dios nimushqa kaptillantsu musyantsik, tsaypa trokinqa yawarninta jichar wanushqa kaptinmi. Tsaynöpis Diospa Tsurin kanqanta musyantsik Espíritu Santu tantiyatsimashqami. Espíritu Santu tantiyatsimanqantsikqa rasun kaqllami kaykan.

7 Jesucristo Diospa Tsurin kanqantaqa [ciëlucho kaykaq] kimsa testïgukunami musyatsimantsik. [Tsay testïgukunami kaykäyan Tayta Dios, Tsurin Jesucristo y Espíritu Santu. Paykuna kimsaq karpis jukllayllami kaykan. 8 Tsaynöllami kay patsachöpis kimsa testïgukuna musyatsimantsik.] Tsay testïgukunami kayan Espíritu Santu, Jesucristo bautizakunqan y wanur yawarninta jichanqan. Tsay kimsa testïgukuna tsayllatami musyatsimantsik.

9 Runa willamanqantsikta criyiykarqa Tayta Dios nimanqantsikman masrä criyishun. Tsurin Jesucristupita Tayta Dios nimanqantsikqa masmi välin runakuna willamanqantsikpitapis.^† 10 Jesucristo Diospa Tsurin kanqanta criyiq kaqqa Tayta Dios tantiyatsinqanta criyinmi. Jesucristo Diospa Tsurin kanqanta mana criyiq kaqmi itsanqa Tayta Dios tantiyatsinqantapis criyintsu. Mana criyirmi Tayta Diosta manakaqman churan.

11 Mana ushakaq kawayta qaramanqantsiktami Tayta Dios tantiyatsimashqantsik. Tsay kawaytaqa tarintsik Tsurin Jesucristuman criyikurmi. 12 Tayta Diospa Tsurinta chaskikuq kaqqa mana ushakaq kawaytami tarin. Mana chaskikuq kaqmi itsanqa tsay kawayta tarinqatsu.^†

13 Tayta Diospa Tsurinman yärakuyaptikimi kay cartata apaykätsimü mana ushakaq kawayta tariyanqaykita musyayänaykipä.^†

14 Tayta Dios munanqannö kananpä imatapis mañakushqaqa wiyamanqantsiktami musyantsik. 15 Wiyamanqantsikta musyarmi mañakunqantsiknö yanapamänantsikpä kanqantapis musyantsik.^†

16 Mayqaykipis wawqikuna panikuna jutsa ruranqanta musyarqa paykunapä Tayta Diosta mañakuyay. Perdonananpä kaq jutsa kaptinqa Tayta Diosmi perdonanqa. Mana perdonananpä kaq jutsa kaptinqa Tayta Diosta ama mañakuyaytsu.^† 17 Mana alli rurayqa llapanpis jutsallami. Tsaynö kaptinpis Tayta Dios mana perdonananpä kaq jutsa kaykanmi.^a

18 Musyantsikmi Tayta Diospa wamran kar jutsata mana rurar kawanqantsikta. Tsaynöllami Tayta Diospa Tsurin Jesucristo Satanáspita tsapämantsik.

19 Musyantsikmi Tayta Diospa wamranna kanqantsikta. Tsaynöpis musyantsikmi llapan kay patsa Satanáspa munaynincho kaykanqanta.

20 Musyantsikmi Tayta Diospa Tsurin Jesucristo kay patsaman shamur Tayta Diosta reqinantsikpä tantiyatsimanqantsikta. Tsaymi Tayta Diospa y Tsurin Jesucristupa makincho kawaykantsik. Jesucristuqa kikin Diosmi kaykan. Paymi mana ushakaq kawayta qaramantsik.^†

21 Kuyay wamräkuna, ima ïdulukunamanpis ama yärakuyaytsu. [Amén.]