Mayor wawqi karmi kay cartata cartakaykämü. Llapan shonqüwanmi qamkunata kuyä. Manami noqallatsu kuyä, tsaypa trokinqa Tayta Diospa willakuyninta wakin chaskikuqkunapis kuyayäshunkimi. 2 Qamkunata kuyayä Tayta Diospa willakuyninta noqakunanö chaskikushqa kayaptikimi. Paypa willakuynintaqa manami imaypis qonqäshuntsu. 3 Tayta Dios y Tsurin Jesucristo kuyapäyäshurniki alli kawayänaykipä y alli willakuynin ninqannö kawar kuyanakuyänaykipä yanapaykuyälläshuy.

4 Wakin wamraykikuna Tayta Diospa mandamientun ninqannö kawayanqanta rikarmi pasaypa kushikü.^† 5 Tsaymi kanan qamta rugakü jukniki juknikipis kuyanakuyänaykipä. Kay mandamientuqa manami mushuqtsu, sinöqa unaypitanami musyashqantsik.^† 6 Rasunpaypa kuyakuq karqa Tayta Diospa mandamientunkunata cäsukushun. Paypa mandamientunqa kuyanakunantsikpämi nimantsik. Kuyanakunantsikpä kanqantaqa unaypita patsanami musyashqantsik.^†

7 Kay patsacho atskaqmi llutan yachatsikuqkuna puriykäyan. Paykunami niyan: “Jesucristuqa manami rasunpaypa runatsu”. Runakunata tsaynö criyitsirmi anticristo kayan.^† 8 Paqtä tsay runakuna qamkunatapis criyitsiyäshunkiman. Criyitsiyäshuptikiqa Jesucristupa willakuyninta chaskikuyanqaykipis manakaqllapämi kanqa. Paykunata mana chaskiparmi itsanqa gloriacho premiuta chaskiyanki.

9 Pipis Jesucristupa willakuyninta qonqaykur llutan yachatsikuyman criyikurqa manami rasunpaypatsu Tayta Diosman criyikushqa. Jesucristupa willakuyninta mana kachariqkunami itsanqa Jesucristuman y Tayta Diosmanpis rasunpaypa criyikuyashqa.^†

10 Tsaynö kaykaptinqa llutan yachatsikuqkuna chäyämuptin ama chaskiyaytsu ni wayikikunamanpis patsatsiyaytsu. 11 Llutan yachatsikuqkunata chaskipaq kaqqa paykunanömi llutanta ruraykäyan.

12 Maspis kanrämi yätsinäpä. Itsanqa cartallacho manami qellqamushätsu. Kikï shamurnami mastaqa yätsishayki.^† Tsaychömi shumaq kushikushun.

13 Tayta Dios akranqan ñañaykipa wawankunapis^b winchikayämushunkimi. [Amén.]