Llutan yachatsikuqkuna imanö kanqanpis
4
Kuyay wawqikuna panikuna, kay patsacho atskaqmi llulla profëtakuna puriykäyan. Tsaynö kaykaptinqa pipis “Espíritu Santumi tantiyatsimashqa willakunäpä” nir chämuptin shumaqrä tantiyayay Tayta Diospa willakuqnin kanqanta o mana kanqantapis. 2 Tayta Diospa willakuqnin karqa Jesucristo kay patsaman shamur rasunpaypa runa kanqantami yachatsin.a 3 Jesucristo rasunpaypa runa kanqanta mana yachatsirqa manami Tayta Diospa willakuqnintsu, tsaypa rantinqa anticristumi. Anticristo shamunanpä kanqanta musyayanqaykinöllami kananqa anticristukuna kay patsacho puriykäyan.†4 Kuyay wamräkuna, Tayta Diospa wamrankunami kaykäyanki. Qamkunacho kaykaq Espíritu Santuqa kay patsacho kaykaq espïritupitapis mas munayyuqmi. Pay yanapayäshuptikimi tsay llutan yachatsikuqkunata chaskipäyankitsu. 5 Paykunaqa Diospa wamran mana karmi yarpayninkunallapita yachaykätsiyan. Tsaymi paykunataqa Diosta mana cäsukuq runakunalla chaskiyan.†
6 Noqakunaqa Diospa willakuqninmi kaykäyä. Tsaymi willakuyanqäta chaskikuqkuna Tayta Diosta reqiyan. Willakuyanqäta mana chaskikuqkunaqa manami Tayta Diospa willakuqnintsu kayan. Tsaynöpami musyantsik mayqan runa rasun kaqta yachatsinqanta y mayqan runa llutanta yachatsinqanta.
Tayta Dios kuyamanqantsiknö kuyanakunantsikpä ninqan
7 Kuyay wawqikuna panikuna, Tayta Dios kuyakuq kaykaptinqa juknintsik juknintsikpis kuyanakushun. Kuyanakurqa Diospa wamran karmi payta reqintsik. 8 Mana kuyanakurmi itsanqa Diosta reqintsiktsu. Tayta Diosqa kuyakuqmi kaykan.
9 Mana ushakaq kawayta tarinantsikpämi japallan Tsurinta Tayta Dios kay patsaman kachamurqan. Tsaynöpami pasaypa kuyamanqantsikta musyatsimashqantsik.† 10 Rasunpaypa kaq kuyakuyqa manami noqantsik Tayta Diosta kuyanqantsiktsu, sinöqa noqantsikta pay kuyamanqantsikmi. Jutsata ruranqantsikpita sacrificiu kananpämi Tsurin Jesucristuta kachamurqan. Tsaymi rasun kaq kuyakuyqa.
11 Kuyay wawqikuna panikuna, Tayta Dios tsaynö kuyaykämashqaqa noqantsikpis juknintsik juknintsik kuyanakur kawashun. 12 Tayta Diosta manami pipis rikashqatsu.† Tsaynö kaptinpis kuyanakushqami noqantsikwan kaykan. Tsaymi yanapaykämantsik pay kuyakuq kanqannö noqantsikpis kuyakuq kanantsikpä.
13 Espíritu Santuta chaskikushqa karmi Tayta Dios noqantsikwan kaykanqanta y noqantsikpis paywan kaykanqantsikta musyantsik.† 14 Kikïkunami rikayashqä Diospa Tsurin Jesucristo kay patsacho kaykaqta. Tsaymi willakuyä runakunata salvananpä Tayta Dios payta kachamunqanta.† 15 Jesucristo Tayta Diospa Tsurin kanqanta pipis criyirqa Tayta Dioswanmi kaykan y Tayta Diospis paywanmi kaykan.
16 Kananqa Tayta Dios kuyamanqantsikta musyarmi payman yärakuntsik. Tayta Diosqa kuyakuqmi kaykan. Noqantsikpis kuyanakurqa paywanmi kaykantsik y paypis noqantsikwanmi kaykan. 17 Tsaynöpami Tayta Dios munanqannö kuyanakuntsik. Tsaynö kuyanakur kawar y Jesucristo kay patsacho kawanqannö kawarqa juiciu finalcho manami mantsarishuntsu. 18 Tayta Dios kuyamanqantsikta mana tantiyarmi castigamänantsikpä kanqanta yarpantsik. Tayta Dios kuyamanqantsikta tantiyarmi itsanqa mana castigamänantsikpä kanqanta musyar mantsarintsiktsu.
19 Puntata pay kuyamanqantsikpitami noqantsikpis [payta] kuyantsik. 20 Pipis “Tayta Diostami kuyä” nikar runa mayinta chikirqa llullakuykanmi. Runa mayintsikta rikaykar mana kuyarqa ¿imanöparä mana rikanqantsik Tayta Diosta kuyashwan? 21 Tayta Diospa mandamientunchömi nimantsik: “Tayta Diosta kuyarqa runa mayikitapis kuyay”.†