Tayta Diospa wamrankuna kanqantsik
3
¡Tantiyakuyay! ¡Tayta Diosqa pasaypami kuyamantsik! Kuyamarnintsikmi “wamräkunami kayanki” nimantsik.† Rasunpaypami wamrankuna kaykantsik. Wamran kanqantsiktaqa Tayta Diosta mana chaskikuq runakuna manami tantiyayantsu. Tsaynö tantiyayantsu Tayta Diosta mana reqirmi.2 Kuyay wawqikuna panikuna, Tayta Diospa wamran kanqantsikta kanan musyarpis manami musyantsikrätsu imanö kanantsikpä kanqantapis. Tsaynö kaptinpis musyantsikmi Jesucristo kutimuptin paywan tinkur kikin niraqman tikranantsikpä kanqanta.† 3 Tsaynö kanantsikpä kanqanta shuyakuykarqa Jesucristo jutsaynaq püru kanqannö noqantsikpis jutsaynaq püru kashun.
4 Pipis jutsata rurarqa Tayta Diospa leyninkunata manami cäsukuntsu. 5 Musyantsikmi jutsaynaq kanantsikpä Jesucristo kay patsaman shamunqanta. Payqa manami imaypis jutsata rurashqatsu. 6 Tsaymi Jesucristupa munaynincho kawaqkunaqa jutsa rurayta kachariyan. Jutsa rurayta mana kachariqkunaqa Jesucristuta manami chaskiyantsu ni reqiyantsu.
7 Kuyay wamräkuna, pipis “Tayta Diostami cäsukü” nirqa Jesucristunömi allikunata rurar kawanman. “Cäsukümi” nikar jutsata ruraptinqa yachatsiyäshunqaykita ama chaskiyaytsu. 8 Jutsa rurayta mana kachariq kaqqa diablupa munayninchömi kaykan. Diabluqa kay patsa qallaykunqanpita patsami jutsata ruran. Diablu ruranqankunata ushakätsinanpämi Tayta Diospa Tsurin Jesucristo shamushqa.†
9 Tayta Diospa wamran kaqkunaqa manami jutsata rurayannatsu, tsaypa trokinqa Tayta Dios munanqannönami kawayan. Tayta Diospa wamran karmi jutsa rurayta kachariyan. 10 Pipis jutsata rurar y runa mayinta chikirqa manami Diospa wamrantsu, tsaypa trokinqa diablupa wamranmi. Tsaynöpami musyantsik Diospa wamran pï kanqanta y diablupa wamran pï kanqantapis.
Pïmaywanpis kuyanakunantsikpä ninqan
11 Juknintsik juknintsikpis kuyanakunantsikpä kanqantaqa unaypita patsami musyantsik.† 12 Ama kashuntsu Caínnöqa. Payqa diablu munanqanta rurarmi wawqin Abelta wanutsirqan.† ¿Imanirtä wanutsirqan? Kikinpa rurayninkuna mana alli kaptin y wawqinpa rurayninkuna alli kaptinmi.
13 Kuyay wawqikuna panikuna, musyantsikmi jutsa ruraq runakuna chikimanqantsikta. 14 Tsaynöpis musyantsikmi wanushqanö kanqantsikpita mana ushakaq kawaytana tarinqantsikta. Tsayta musyantsik wawqikunawan panikunawan kuyanakur kawarmi.† Mana kuyakuq kaqqa wanushqanömi kaykan. 15 Llapanpis runa mayinta chikiqkunaqa wanutsiqnömi kaykäyan. Musyanqantsiknöpis wanutsikuqkunaqa Tayta Diospa ñöpanman manami chäyanqatsu.
16 Kuyakuq kanantsikpä Jesucristo noqantsik raykuq wanunqanta tantiyakushun.† Noqantsikpis kuyakuq karqa runa mayintsik raykuq wanunantsikpä listumi kaykäshun. 17 Imantsikpis kaykaptin runa mayintsik muchuycho kaykaqta mana yanaparqa manami Tayta Dios kuyakuq kanqannötsu kuyakuq kantsik.
18 Kuyay wamräkuna, janan shonqullaqa ama kuyanakushuntsu, tsaypa trokinqa imaypis yanapanakur rasunpaypa kuyanakushun. 19 Tsaynö kuyanakurmi musyantsik Tayta Diospa willakuyninta rasunpaypa chaskikunqantsikta y jutsantsikpita perdonamanqantsikta. 20 Mana perdonamanqantsikta yarpashqapis payqa jutsantsikpita llakikunqantsikta musyarmi perdonamantsik.
21 Kuyay wawqikuna panikuna, perdonashqana kanqantsikta musyaykarqa mana mantsariypa Tayta Diosta mañakushun. 22 Mandamientunkunata cäsukur pay munanqannö kawarqa imata mañakunqantsiktapis chaskishunmi.