2
Kuyay wamräkuna, jutsata mana rurayänaykipämi kay cartata cartakaykämü.† Jutsata rurashqaqa abogäduntsik kaykanmi Tayta Diospa ñöpancho janantsik shärinanpä. Tsay abogäduqa alli ruraq Jesucristumi. 2 Paymi sacrificiu kashqa jutsantsikkunata Tayta Dios perdonamänantsikpä.† Manami noqallantsik perdonashqa kanantsikpätsu wanurqan, tsaypa trokinqa maytsaycho taq runakuna perdonashqa kayänanpämi.3 Tayta Diosta reqinqantsikta musyantsik mandamientunkunata cumplirmi.† 4 Mayqantsikpis “Tayta Diosta reqïmi” nikar mandamientunkunata mana cäsukurqa manami rasun kaqtatsu parlantsik, sinöqa llullakuykantsikmi. 5 Mandamientunkunata cumplirmi itsanqa Tayta Diosta rasunpaypa kuyantsik. Tsaynöpami musyantsik Tayta Diospa makincho kanqantsikta. 6 Pipis “Tayta Diospa makinchömi kaykä” nirqa Jesucristo kawanqannö kawatsun.
Mushuq mandamientu
7 Kuyay wawqi panikuna, jukniki juknikipis kuyanakuyanki. Kay mandamientu manami mushuq mandamientutsu kaykan, tsaypa trokinqa unaypita patsa musyanqantsik mandamientumi. Tsay mandamientutaqa musyayankinami. 8 Mushuq mana kaptinpis kananqa musyantsik Jesucristo kuyamanqantsiknö kuyanakuyänaykipä kanqantami. Tsaymi tsay mandamientu mushuq kaykan. Jesucristo kuyakuq kanqannömi qamkunapis kuyanakuykäyanki. Tsaynö kuyanakurmi tsakaypita atsikyayman yarquqnö kaykäyanki.
9 Pï runapis “aktsichömi kaykä” nikar runa mayinta chikirqa tsakäpakushqanömi kaykan. 10 Runa mayinta kuyarmi itsanqa aktsicho kaykaqnö kaykan.† Tsaynö kawaptinqa pïmaypis payta rikarmi alli kawayanqa. 11 Runa mayinta chikiq kaqmi tsakäpakushqanö kaykan. Qapra runa maypa aywanqantapis mana tantiyanqannömi Tayta Dios munanqannö kawananpäpis tantiyantsu.
Imanir Juan cartakunqan
12 Kuyay wamrakuna, qamkunapämi cartakaykämü Jesucristo noqantsik raykuq wanunqanpita perdonashqa kayaptiki.
13 Taytakuna, qamkunapämi cartakaykämü qallaykunanpita patsa kawaq Jesucristuta reqishqa kayaptiki.
Chölukuna jipashkuna, qamkunapämi cartakaykämü Satanásta vincishqa kayaptiki.
14 Kuyay wamrakuna, qamkunapämi cartakaykämü Tayta Diosta reqishqa kayaptiki.
Taytakuna, qamkunapämi cartakaykämü qallaykunanpita patsa kawaq Jesucristuta reqishqa kayaptiki.
Chölukuna jipashkuna, qamkunapämi cartakaykämü kallpayuq kayanqaykipita y Diospa willakuyninta cäsukurnin Satanásta vincishqa kayaptiki.
Diosta mana cäsukuq runakuna kawayanqannö mana kawanantsikpä ninqan
15 Diosta mana cäsukuq runakunanöqa ama kawayaytsu. Paykunanö kawarqa Tayta Diosta manami kuyaykäyankitsu. 16 Diosta mana cäsukuq runakunaqa shonqunkuna munanqannömi llutanta rurayan, imatapis rikanqantami munapäyan y llapanpitapis alli rikashqa kaytami munayan. Paykunanö kawarqa manami Tayta Dios munanqannötsu kawaykäyanki, sinöqa jutsasapa runakunanömi. 17 Kay patsapis y runakuna munapäyanqanpis ushakanqami. Tayta Dios munanqannö kawaq runakunami itsanqa mana ushakaq kawayta tariyanqa.
Anticristukuna yuriyämunanpä ninqan
18 Kuyay wamräkuna, ushanan tiempuchönami kaykantsik. Anticristo shamunanpä kanqanta musyayanqaykinömi kananqa atska anticristukuna shayämushqa. Tsaynöpami musyantsik ushanan tiempuchöna kaykanqantsikta. 19 Tsay runakunaqa ñöpata noqantsikwan qorikashqa karpis kananqa manami qorikäyämunnatsu. Paykunaqa manami Jesucristuta rasunpaypatsu chaskikuyashqa. Jesucristuta rasunpaypa chaskikushqa karqa noqantsikwanmi juntu kaykäyanman karqan. Noqantsikpita yarqukushqa kayaptinmi musyantsik Jesucristuta mana chaskikuyanqanta.
20 Qamkunamanqa Jesucristumi Espíritu Santuta kachamushqa. Tsaymi tantiyayanki mayqan yachatsikuykuna alli kanqanta y mayqan mana alli kanqantapis.† 21 Tsaynömi tantiyayanki llullakuqkuna Tayta Diospa willakuyninta willakuyänanpa trokin llutanta yachaykätsiyanqanta. Rasun kaq yachatsikuyta tantiyayanqaykita musyarmi cartakaykämü.
22 Tsay llullakuqkunami niyan: “Jesúsqa manami Tayta Dios kachamunqan Cristutsu”. Tsaynö yachatsiqkunaqa anticristumi kaykäyan. Paykunaqa Tayta Diostapis Jesucristutapis ñëgayanmi. 23 Jesucristo Tayta Diospa Tsurin kanqanta pipis ñëgarqa Tayta Diostapis ñëganmi. “Jesucristuqa Diospa Tsurinmi kaykan” nirqa Tayta Diostapis chaskikunmi.
24 Tsaynö kaykaptinqa Jesucristupa willakuyninta yachakuyanqaykita ama qonqäyaytsu. Mana qonqarqa Tayta Diospa y Tsurin Jesucristupa munayninchömi kawaykäyanki. 25 Paymi awnimashqantsik gloriacho imayyaqpis kawanantsikpä.
26 Kay cartatami cartakaykämü llutan yachatsikuqkunata mana chaskipäyänaykipä. 27 Jesucristupita chaskiyanqayki Espíritu Santumi qamkunawan kaykan. Paymi rasun kaqllata llapantapis yachaykätsiyäshunki. Manami imaypis llullapäyäshunkitsu. Tsaynö kaykaptinqa llutan yachatsikuykunata ama chaskiyaytsu. Espíritu Santu tantiyatsiyäshunqaykinölla Jesucristuman yärakur imaypis kawayay.
28 Kuyay wamräkuna, Jesucristupa munaynincho imaypis kawayay. Tsaynö kawarmi Jesucristo kutimuptin mana mantsariypa y mana penqakuypa ñöpancho kayanki.
29 Musyantsikmi Jesucristo imaypis alli ruraq kanqanta. Tsaymi pipis allita rurarqa Tayta Diospa wamran kaykan.