1 Juan
Apóstol Juanpa punta kaq cartan
1
Qamkunamanmi Kawatsikuq Palabra imanö kanqantaa qellqamü. Payqa imapis manarä kaptinmi kaykarqanna.† Paytami rikayashqä, yatayashqä y wiyayashqä. 2 Tsay Kawatsikuqta Tayta Dios kachamuptinmi payta rikayarqä.† Tsaymi qamkunata willayä mana ushakaq kawayta qaramaqnintsik kanqanta. Paymi Tayta Dioswan kaykanqanpita noqantsikman shamushqa. 3 Rikayanqäta y wiyayanqätami qamkunata musyaykätsiyä. Tsaynöpami Tayta Diospa y Tsurin Jesucristupa ñöpancho kawayanqänö qamkunapis paypa ñöpancho kawayanki. 4 Tsaykunatami qellqaykämü kushishqa kawanantsikpä.Jutsata mana ruraypa kawanantsikpä ninqan
5 Jesucristo yachatsiyämanqallantami willayä: Tayta Diosqa aktsimi. Paychöqa manami ima tsakaypis kantsu.b 6 Tsaymi mayqantsikpis “Tayta Dios munanqannömi kawaykä” nikar tsakäpakushqanö purirqa llullakuykantsik. Tsaynö kawarqa manami rasunpaypatsu Tayta Dios munanqannö kawaykantsik. 7 Tayta Dios atsikyaycho kanqannö noqantsikpis atsikyaycho kawarmic juknintsik juknintsik kuyanakuntsik. Tsaynöpis Tsurin Jesucristumi yawarninwan llapan jutsantsikta mayllamantsik.
8 Mayqantsikpis “jutsaynaqmi kä” nirqa manami rasun kaqtatsu parlaykantsik, sinöqa llullakuykantsikmi. 9 Jutsa ruranqantsikpita perdonta mañakushqami itsanqa awnimanqantsikta cumplir Tayta Dios perdonamäshun. Payqa alli ruraq karmi llapan jutsantsikta mayllamäshun.
10 “Noqaqa jutsaynaqmi kä” nirqa pay ninqankunata manakaqmanmi churaykantsik. Tsaynö karqa manarämi willakuyninta chaskikushqantsikrätsu.†