Imanö kuyanakunantsikpä ninqan
13
Kay patsacho llapan idiömakunata parlarpis y angelkunapa idiömanta parlarpis kuyakuynï mana kaptinqa platïlluta llutalla tukanqan chinllillinqannöllami parlanqäkuna kaykan. 2 Profëta karpis, Tayta Dios yarpanqanta musyarpis y pïmay runapita mas yacharpis kuyakuynï mana kaptinqa manami imapäpis välïtsu. Tayta Diosman yärakur jirka witikunanpä niptï witikuptinpis kuyakuynï mana kaptinqa manami imapäpis välïtsu.† 3 Muchuqkunata llapan imaykäkunata aypurpis y Diosman yärakunqäpita rupatsiyämaptinpis kuyakuynï mana kaptinqa manami imapäpis välïtsu.4 Kuyakuq karqa ima kaptinpis pacienciakuntsikmi y pïmaytapis allimi rikantsik. Tsaynöpis runa mayintsikta chikintsiktsu, alabakuntsiktsu, pitapis manakaqman churantsiktsu, 5 manakaqkunata parlantsiktsu, munanqantsikta rurayänanpä obligantsiktsu, ajanantsiktsu y pitapis nanaparantsiktsu. 6 Mana allikunata ruraptin kushikunantsikpa trokinqa allikunata ruraptinmi kushikuntsik. 7 Kuyakuq karqa ima kaptinpis perdonantsikmi. Imaypis criyintsikmi, imaypis shuyarantsikmi y llapantapis awantakuntsikmi.
8 Profëtakuna willakuyanqanpis ushakanqami. Mana yachanqan idiömacho parlayanqankunapis ushakanqami. Yachaq kaypis ushakanqami. Kuyanakuymi itsanqa imaypis ushakanqatsu. 9 Manami llapantatsu musyantsik. Manami llapantatsu willakuntsik. 10 Tsaynö karpis Jesucristo kutimuptinqa kanan musyanqantsikkunata ni willakunqantsikkunatapis mananami ministishunnatsu.
11 Noqapis wamra karqa wamranöllami parlarqä, wamranöllami yarpachakurqä y wamranöllami tantiyarqä. Awkinyarnaqa manami wamranönatsu parlä ni yarpä. 12 Tsaynöllami kananqa makwa espëjuwan rikakuqnöpis shumaqqa tantiyantsikrätsu. Kay patsapita aywakurmi itsanqa kikin Tayta Dioswanna tinkushun. Tsaymi kanan ichikllata musyarpis tsay junaqqa pay reqimanqantsiknö noqantsikpis payta reqishun.†
13 Kananqa yärakur, shuyakur y kuyanakurmi kawaykantsik. Llapanpitapis mas alliqa kuyanakunqantsikmi kaykan.