Mana tantiyayanqan idiömapä yätsinqan
14
Tsaynö kaykaptinqa shumaq kuyanakur kawayay. Espíritu Santu yachayta qarayäshunaykipä† Tayta Diosta mañakuyay. Tsaypita mas mañakuyay willakuyninta willakuyänaykipä.2 Espíritu Santu parlatsishunqayki idiömapa parlarqa manami runakunatatsu parlapaykäyanki, sinöqa Tayta Diostami. Espíritu Santu parlatsishuptikipis manami pipis tantiyayäshunkitsu. 3 Runakuna tantiyayanqan idiömapa willakuyaptikimi itsanqa llapan niyanqaykitapis tantiyar Tayta Dios munanqannö kawayanqa, shakyätsinakuyanqa y yanapanakuyanqa. 4 Runakuna mana tantiyayanqan idiömapa willakuq kaqqa kikillanmi kushikun. Runakuna tantiyayanqan idiömapa willakuq kaqmi itsanqa Tayta Diosman yärakuqkunata shumaq yachatsiyan.
5 Noqapitaqa allimi kanman Espíritu Santu parlatsinqan idiömacho llapayki parlayaptikipis. Tsaynö kaptinpis mas allimi kanman runakuna tantiyayanqan idiömacho Tayta Diospa willakuyninta willakuyaptiki. Mana tantiyayanqan idiömacho willakuyaptikiqa pillapis kanmanmi tantiyatsinanpä. Tsaynö tantiyatsiq kaptinqa allimi kanman juk idiömacho willakuyaptikipis.
6 Wawqikuna panikuna, shumaq tantiyakuyay. Watukakuq shamur mana tantiyayanqayki idiömacho yachatsiptï ¿yachakuyankimantsurä? Tantiyayanqayki idiömacho yachatsiptïmi itsanqa revelación o yachatsikuy kaptinpis llapanta tantiyar shumaq yachakuyanki.
7 Pinkullutapis arpatapis llutalla tukaptinqa manami imata tukayanqantapis tantiyantsiktsu. 8 Tsaynöpis cornëtata llutalla tukaptinqa soldädukunapis pelyaman aywayänanpä manami kamarikuyantsu. 9 Tsaynöllami kanqa mana tantiyayanqan idiömacho willakuyaptiki. Imata niyanqaykitapis mana tantiyar manami imatapis yachakuyanqatsu. Tsaynö willakurqa manakaqllapämi willakuykäyanki.
10 Musyanqantsiknöpis kay patsachöqa atska idiömakunami kan. Runakuna tantiyayanqan idiömacho parlapashqaqa pipis tantiyanmi. 11 Tsaynö kaptinpis mana tantiyanqä idiömacho parlapämaq runaqa juklä nación runanömi noqapä kanqa y noqapis juklä nación runanömi paypä kashä. 12 Tsaynöllami qamkunapäpis willakuyaptiki kaykan. Tsaymi Espíritu Santu yachayta qarayäshunaykita munarqa wawqikunata panikunata tantiyayanqan idiömacho shumaq yachatsiyänaykipä payta mañakuyänayki. 13 Tsaynölla mana tantiyayanqan idiömacho willakurqa Tayta Diosta mañakuyay willakunqaykita tantiyatsiyänanpä.
14 Espíritu Santu parlatsimaptin mana tantiyanqä idiömacho Tayta Diosta mañakur kushikurpis manami tantiyätsu imata ninqätapis. 15 Tsaynö kaptinqa manami Espíritu Santu parlatsimanqan idiömallachötsu mañakushä, sinöqa tantiyanqä idiömachöpis mañakushämi. Tsaynöpis manami Espíritu Santu parlatsimanqan idiömallachötsu Tayta Diosta alabashä, sinöqa tantiyanqä idiömachöpis alabashämi. 16 Qamkunapis runa mana tantiyanqan idiömallacho Tayta Diosta alabayaptikiqa wakin runakuna mana tantiyar qamkunawan manami alabayta kamäpakuyanqatsu. 17 Llapan shonquykiwan kushishqa alabayaptikipis upällallami rikaräyäshunki.
18 Runa mana tantiyanqan idiömacho parlanäpä qamkunapita masrä Espíritu Santu yanapamaptinmi Tayta Diosta agradëcikü. 19 Tsaynö kaptinpis wawqikuna panikuna qorikäyanqancho chunka waranqa (10,000) mana tantiyayanqan palabrakunata parlanqäpita mas allimi kanqa pitsqa palabrallatapis tantiyayanqan idiömacho parlaptï.
20 Wawqikuna panikuna, wamrakuna mana tantiyakuypa yarpäyanqannö ama yarpäyaytsu. Tsaypa trokinqa yashqa runakunanö shumaq tantiyaykur yarpachakuyay. 21 Tayta Diospa leyninchöpis kaynömi qellqaraykan:
“Kay runakunata castigarmi mana tantiyayanqan idiömapa parlapäshä.
Tsaynö castigaptïpis manami cäsukayämanqatsu.
Noqa Tayta Diosmi tsaynö nï”.†
22 Tsay ninqannöllami runakuna mana tantiyayanqan idiömacho willakushqa Jesucristuman mana yärakuqkuna Tayta Diospa willakuyninta chaskiyanqatsu. Tantiyayanqan idiömacho willakushqami itsanqa Jesucristuman criyikuyanqa. 23 Qorikäyanqaykicho mana tantiyayanqan idiömacho llapayki parlayaptikiqa imanir tsaynö parlayanqaykita mana musyaq runa o mana criyiq runakuna yaykur löcuyashqa kaykäyanqaykitami yarpäyanqa. 24 Tantiyayanqan idiömacho Diospa willakuyninta willakuyaptikimi itsanqa jutsayuq kayanqanta tantiyakuyanqa. 25 Tsaymi willakuyanqayki shonqunman chaptin Tayta Dios qamkunawan kaykanqanta tantiyar qonqurikuykur Tayta Diosta adorayanqa.
Qorikäyanqancho imanöpis kayänanpä ninqan
26 Tsaynö kaptinqa wawqikuna panikuna, qorikäyanqaykicho salmukunata cantarpis, Jesucristupa willakuyninta yachatsirpis, Tayta Dios tantiyatsiyäshunqaykikunata willakurpis, runakuna mana tantiyayanqan idiömacho parlarpis y tsay parlanqanta tantiyatsirpis llapanta rurayay yärakuq mayikikuna Tayta Dios munanqannö kawayänanpä. 27 Mana tantiyayanqan idiömakunacho parlarqa juk ishkaylla trukanakuypa parlayätsun. Tsay parlayanqanta juk wawqina tantiyatsitsun. 28 Pillapis tantiyatsinanpä mana kaptinqa upällakuyätsun. Parlananpa trokinqa shonqullanchöna Tayta Diosta mañakuyätsun.
29 Tsaynölla qorikäyanqaykicho Diospa willakuyninta juk ishkaylla willakuyätsun. Wiyaqkuna tantiyakuyätsun llutanta willakuyanqanta o rasun kaqta willakuyanqanta. 30 Imatapis willakunanpä juk wawqita Tayta Dios tantiyatsiptinqa parlaykaq wawqi upällakutsun jukaq wawqina parlananpä. 31 Tsaynöpami llapaykipis shuyänakuypa willakuyanki llapanpis yachakuyänanpä. 32 Willakuqkuna imay parlayänanpä y imay upällakuyänanpäpis tantiyayanmi. 33 Salvanqan runakuna qorikäyanqanchöqa Tayta Dios manami desordin kananta munantsu, sinöqa llapanpis shumaq ordenädu kanantami munan.
34 Qorikäyanqaykicho warmikuna upällalla kakuyätsun. Ama parlakuyätsuntsu.a Moisés qellqanqan leykunacho ninqannö runanpa munaynincho kayätsun. 35 Imatapis musyayta munarqa wayinkunaman kutiykur runankunata tapuyätsun. Manami allitsu qorikäyanqaykicho warmikuna parlayaptinqa.
36 ¿Imanirtä yarpäyanki qamkuna kaqcho Tayta Diospa palabran qallaykunqanta y qamkunallata willayäshunqaykita? 37 Tayta Diospa willakuqninkuna y Espíritu Santu tantiyatsinqan runakuna kayanqaykita yarparqa tantiyakuyankimanmi kay cartacho ninqäkuna Jesucristupa mandamientunkuna kanqanta. 38 Kay cartacho ninqäkunata mana chaskikuq kaqtaqa Tayta Dios manami chaskinqatsu.