3 Yachakunqallätami mas puntatapis qamkunata yachatsirqä. Tsay yachatsinqämi nin: Tayta Diospa palabran ninqannöllami^† jutsantsikpita perdonamänantsikpä Jesucristo wanurqan. 4 Tsaynöpis ninqannöllami^† Jesucristo wanur pamparanqanpita kimsa junaqta kawarimurqan. 5 Kawarimurnami Cefasta^{a †} yuriparqan. Tsaypitanami chunka ishkay apostolninkunata yuriparqan.^† 6 Tsaypitanami pitsqa pachak (500) wawqikuna panikuna qorikashqa kaykäyaqta yuriparqan. Tsaynö yuripanqanta rikaq wawqikuna panikuna juk ishkay wanukuyashqana kayaptinpis wakinqa kawaykäyanrämi. 7 Santiaguta yuripaskirnami wakin apostolninkunatapis yuriparqan. 8 Tsaypitarämi imayka shullu wamranö mana väliq kaykaptïpis noqata yuripämarqan.^†

9 Manarä yuripämaptinqa Tayta Diosman yärakuqkunata qatikacharmi usharqä.^† Tsaynö rurashqa karmi wakin apostolkunamanqa imallanmanpis tinkütsu. Apóstol kanäpäpis manami välïtsu. 10 Tsaynö kaykarpis Tayta Dios kuyapämaptinmi apóstol kaykä. Wakin apostolkunapitapis masrä Jesucristupa willakuyninta willakurmi tantiyakü Tayta Dios allipä kuyapämanqanta. Imanö kaptinpis Tayta Dios yanapamaptinmi willakuykä. 11 Mayqäkuna willakurpis Jesucristupa willakuynintami willakuyä. Willakuyanqäta wiyarmi qamkunapis Jesucristuman criyikuyashqayki.

12 Jesucristo kawarimunqanta willakuykäyaptïqa ¿imanirtä wakinniki nikäyanki wanushqakuna mana kawariyämunanpä kanqanta? 13 Wanushqakuna mana kawariyämunanpä kaptinqa Jesucristupis manami kawarimunmantsu karqan. 14 Mana kawarimushqa kaptinqa manakaqllapämi willakuynintapis willaküman. Tsaynö kaptinqa Jesucristuman manakaqllapämi criyikuyankiman karqan. 15 Wanushqakuna mana kawariyämunanpä kaptinqa Jesucristuta Tayta Dios kawatsimunqanta willakurpis llullakurmi puriyäman.

16 Wanushqakuna mana kawariyämunanpä kaptinqa Jesucristupis manami kawarimunmantsu karqan. 17 Y Jesucristo mana kawarimushqa kaptinqa payman yärakuyanqaykipis manakaqllapämi kanman. Jutsata rurayanqaykipitapis manami perdonashqatsu kayankiman. 18 Tsaynö kaptinqa Jesucristuman yärakuykar wanuqkunapis wanuyanqallanchömi ushakäyanman. 19 Jesucristo kay vïdallacho yanapamänantsikpä kanqanta criyirqa llapan runapitapis mas kuyapaypämi kaykantsik.

20 Jesucristuqa rasunpaypami wanunqanpita kawarimushqa. Pay puntata kawarimushqa kaptinmi musyantsik noqantsikpis kawarimunantsikpä kanqanta. 21 Juk runalla^b jutsata ruranqanpita llapantsikpis wanunantsikpä kanqantsiknöllami juk runalla^c kawarimunqanpita llapantsikpis kawarimunantsikpä kaykantsik. 22 Jutsata Adán ruranqanpitami llapantsik ushakäshun. Jesucristo kawarimunqanpitami itsanqa llapantsik kawarimushun.^†

23 Kawarimurqa Tayta Dios kamakätsinqannömi kawarimushun. Puntataqa Jesucristutami Tayta Dios kawaritsimushqa. Jesucristo kutimuptinrämi payman criyikuqkunata kawatsimunqa. 24 Tsaypitanami juiciu final kanqa. Tsaychönami Satanásta y llapan supaykunata Jesucristo ushakätsinqa. Nirkurnami Tayta Diospa munayninman llapanta churanqa. 25 Contrankunata vincinqanyaqmi llapantapis munaynincho Jesucristo tsararanqa. 26 Vinciskirnami wanuytapis vincinqa.

27 Tayta Diospa palabranchömi Jesucristupä nin: “Paypa makinmanmi llapantapis Tayta Dios churashqa”.^†

Paypa makinman llapanta churanqanta nirpis manami kikin Tayta Dios makincho kanqantatsu nin. Tsaypa trokinqa Tayta Diosmi Jesucristupa makinman llapanta churashqa. 28 Paypa makinman llapantapis churashqana kaptinmi Tayta Diospa makinman llapanta kutitsinqa. Tsaynöpami llapan imaykatapis makincho Tayta Dios tsararanqa.

29 Wawqikuna panikuna, ¿imanirtä yarpäyanki wanushqakuna mana kawariyämunanpä kanqanta? Wanushqakunata Tayta Dios mana kawaritsimunanpä kaptinqa ¿imapätä wanushqakunapa jutincho wakinniki bautizakuyanki?

30 Tsaynöpis wanushqakuna mana kawariyämunanpä kaptinqa ¿imallapärä wanuytapis mana mantsariypa willakur puriyäman? 31 Wawqikuna panikuna, qoyay qoyaymi wanutsiyämayta munayan. Tsaynö kaptinpis Señor Jesucristuman criyikuyanqaykipitami kushikü. 32 Éfeso markachöpis chikiyämar yaqa uywanömi wanutsiyämayta munayarqan. Wanushqakuna mana kawariyämunanpä kaptinqa ¿imallapätä pasaypa chikishqa purïman? Tsaypa trokinqa: “Kawanqantsikyaq mikushun upushun. Wanukurqa pachantsiktami apashun”^† nïmanchi.

33 Llutanta ama yarpäyaytsu: mana alli amïgukunaqa alli runakunatapis mana alli ruraykunamanmi inkitayan. 34 Shumaq tantiyakur jutsaykikunata kachariyay. Wakinnikiqa Tayta Diospa willakuyninta shumaq mana tantiyarmi penqakuypä kaykäyanki.

35 Wanushqakuna kawariyämunanpä kanqanta mana criyirmi wakinniki nikäyanki: “¿Imanöpanashi wanushqakuna kawariyämunman? Kawariyämuptin ¿imanörä cuerpunkuna kanqa?”

36 Tsaynö yarparqa ¡upanömi kaykäyanki! Imatapis murur mana pampashqaqa manami jeqamuntsu. 37 Tsaynöpis manami yurantatsu muruntsik, sinöqa trïgu kaptinpis o mayqan tsaki mikuy kaptinpis murutami muruntsik. 38 Muruskiyaptinqa Tayta Diosmi wiñatsimun. Imaykaläya murupitami Tayta Dios munanqannölla wiñatsimun.

39 Runapis, uywapis, pajaqpis y pescädupis tukuyläyami kaykäyan. 40 Ciëlucho kaqkunapis manami kay patsacho kaqkunanötsu kayan. 41 Tsaynöllami rupaypis, killapis y qoyllurkunapis juknö juknö atsikyäyan.

42 Tsaynöllami runa wanunqanpita kawarimuptin cuerpun mushuqna kanqa.

45 Tayta Diospa palabranchöpis kaynömi qellqaraykan: “Punta kaq Adántami kawaq runa kananpä kamarqan”.^†

Qepa kaq Adántami^d itsanqa kawatsikuq espíritu kananpä kawatsimushqa. 46 Manami mushuq patsacho kawanantsikpä kaq cuerputatsu puntata chaskintsik, sinöqa kay patsacho kawanantsikpä kaq cuerputami. Nirkurrämi mushuq patsacho kawanantsikpä kaq cuerputaqa chaskintsik. 47 Punta kaq runaqa allpapitami karqan. Qepa kaq runa [Señor Jesucristumi] itsanqa ciëlupita kaykan. 48 Kay patsacho kawanantsikpä kaq cuerpuntsikqa allpapita rurashqa Adánpa cuerpunnöllami. Mushuq patsacho kawanantsikpä kaq cuerpuntsikmi itsanqa ciëlucho taykaq Jesucristupa cuerpunnö kanqa. 49 Kananqa allpapita rurashqa Adán niraqllami kaykantsik. Tsaypitanami ciëlucho taykaq Jesucristunöna kashun. 50 Wawqikuna panikuna, shumaq tantiyakuyay. Aytsantin tulluntinqa manami Tayta Diospa mandakuyninman pipis chanqatsu. Ushakaq cuerpuntsikqa manami mushuq patsacho kawanantsikpätsu, sinöqa kay patsacho kawanallantsikpämi.

51 Tayta Dios pitapis mana musyatsinqanta musyayänaykitami munä: Manami llapantsikrätsu wanushun. Itsanqa llapantsiktami mushuq cuerputa Tayta Dios qaramäshun. 52 Mushuq cuerpuyuqqa illaqpitami tikrashun ultimu kaq cornëtata tukaskamuptin. Tsay junaqmi mana ushakaq mushuq cuerpuyuqna wanushqakuna kawariyämunqa. Tsaynöllami noqantsik kawaykaqkunapis mushuq cuerpuyuq tikrashun.^† 53 Ushakaqlla kanqantsikpitami mana ushakaqna tikrashun. Wanukuqlla kanqantsikpitami mana wanuqna tikrashun.

54 Ushakaqlla cuerpuntsik mana ushakaqmanna tikraptinmi y wanukuqlla kanqantsikpita manana wanunantsikpäna tikrashqami Tayta Diospa palabran kaynö ninqan cumplinqa:

56 Jutsantsikpitami wanuy ushakätsimantsik. Jutsapis Tayta Diospa leyninkunapitarämi ishkitsimänantsikpä munayninta chaskin.^† 57 Tsaynö kaptinpis Señor Jesucristuta kawaritsimurmi wanuypita Tayta Dios salvamantsik. Tsaypita imaypis payta agradëcikushun.

58 Tsaynö kaykaptinqa, kuyay wawqikuna panikuna, mana qelanaypa y mana ajayaypa Señor Jesucristuta imaypis sirviyay. Musyayanqaykinöpis payta sirviyanqaykiqa manami manakaqllapätsu kaykan.