Ofrendata qoriyänanpä ninqan
16
Jerusaléncho wawqikunapä panikunapä ofrendata qorirqa† Galacia provinciacho wawqikunata panikunata yätsinqänölla qamkunapis qoriyay. 2 Semäna arur gänayanqaykipita cada domingu cada ünuykikuna aykallatapis churayanki. Ama noqa chämuptïräqa qoriykäyankitsu. 3 Qoriyanqayki ofrendata Jerusalénman apayänanpä wawqikunata akrayay. Chaykamurnami paykunapä cartata rurashä Jerusalénman apayaptin wawqikuna panikuna chaskiyänanpä. 4 Noqapis aywanäpä kamakaptinqa paykunawanmi aywashä.Maypapis aywananpä kaqta Pablo willanqan
5 Qamkuna kaqman kutimurmi Macedonia provinciaparä tumamushä.† 6 Chaykamurqa capazchi tamya killa päsanqanyaq qamkunawan quëdashä. Tsaypitanami wakin markakunaman aywanäpäpis yanapayämanki. 7 Manami päsädallaqa qamkunata watukayta munätsu. Tsaypa trokinqa Tayta Dios munaptin qamkuna kaqcho quëdashärämi.
8 Éfesuchömi itsanqa Pentecostés fiesta chämunqanyaq täshä. 9 Atskaq conträ shäriyaptinpis Tayta Dios yanapaykämanmi kay markakunacho alli willakuyninta willakunäpä. Tsaynö willakuptïmi Jesucristuman criyikuykäyan.†
10 Wawqintsik Timoteo qamkuna kaqman chämuptin kushishqa chaskiyay. Paypis noqanömi Jesucristupa willakuyninta willakuykan.† 11 Paytaqa manakaqman ama churayaytsu. Alli kutimunanpä yanapaykuyällay. Noqakunapis kaycho kaq wawqikunawan panikunawanmi payta shuyaykäyä.
12 Qamkuna kaqman wakin wawqikuna shayämuptinmi Apolustapis rugakurqä qamkunaman shamunanpä. Tsaynö rugakuykaptïpis manami shamuyta kamäpakuntsu. Tsaypitarämi may shamunqa.
Carta ushanan
13 Imapitapis maya mayalla kayay. Imanö ñakarpis Tayta Diosman yärakuyay. Imatapis mana mantsariypa Tayta Dios munanqannö kawayay. 14 Pïmaywanpis kuyanakur shumaq kawayay.
15 Wawqikuna panikuna, musyayankimi Acaya provinciacho wawqintsik Estéfanas castankunawan† Jesucristuman puntata criyikuyanqanta. Paykunami wawqikunata panikunata imachöpis yanapaykäyan. 16 Tsaymi qamkunata rugakü paykunata cäsukuyänaykipä. Tsaynölla llapantapis paykunanö yanapayäshuqnikikunata y yachatsiyäshuqnikikunata cäsukuyay.
17 Estéfanas, Fortunato y Acaico qamkuna kaqpita watukamaq chäyämuptinmi llapaykita rikaqnörä kushikushqä. 18 Qamkunata shakyätsishunqaykinöllami noqakunatapis shakyätsiyämashqa. Paykunata y paykunanö kaqkunata shumaq respitayanki.
19 Asia provinciacho wawqikuna panikunapis qamkunapämi winchikuyninta apatsikayämun. Tsaynöllami Aquila y Priscila† y wayincho qorikaq wawqikuna panikunapis qamkunapä winchikuyninta apatsikayämun. 20 Llapan wawqikuna panikunami winchikayämun. Jukniki juknikipis qaqllaykikunacho mutsanakur winchinakuyay.
21 Noqa Pablo kikïmi kay winchikuytaqa qellqaykämü.
22 Pipis Jesucristuta mana kuyaq kaqtaqa Tayta Dios castiganqami. ¡Señor Jesucristo, kutikallämuy!