Espíritu Santu yachayta qaramanqantsik
12
Wawqikuna panikuna, Espíritu Santu yachayta qaramanqantsikpitami musyatsiyta munaykä. 2 Musyayanqaykinöpis Jesucristuman manarä yärakurmi mana tantiyakur ïdulukunata adorar kawayarqayki. 3 Tsaymi shumaq tantiyayänaykita munä. Espíritu Santuta chaskishqa kaykarqa manami pipis “Jesucristo maldicionashqa katsun” nintsu. Tsaynöllami Espíritu Santuta manarä chaskikurqa “Jesucristo Señornïmi” niyta kamäpakuntsu.4 Espíritu Santupita juknö juknö yachayta chaskishqapis payqa jukllayllami kaykan. 5 Tsaynöllami Señor Jesucristuta juknö juknö sirvishqapis† payqa jukllaylla kaykan. 6 Yanapamaqnintsik Tayta Diosta sirvinqantsik juknö juknö kaptinpis payqa jukllayllami kaykan.
7 Cada ünuntsikmi Espíritu Santupita yachayta chaskintsik juknintsik juknintsikpis yanapanakunantsikpä. 8 Wakinnintsikmi yachayta chaskintsik shumaq tantiyakur wakinta tantiyatsinantsikpä. Wakinnintsikmi yachayta chaskintsik yachakuskir wakin kaqtapis yachatsinantsikpä. 9 Wakinnintsikmi yachayta chaskintsik Tayta Diosman shumaq yärakunantsikpä. Wakinnintsikmi yachayta chaskintsik qeshyaykaqkunata alliyätsinantsikpä. 10 Wakinnintsikmi yachayta chaskintsik milagrukunata ruranantsikpä. Wakinnintsikmi yachayta chaskintsik Tayta Diospa willakuyninta willakunantsikpä. Wakinnintsikmi yachayta chaskintsik pipis llutanta o rasun kaqta yachaykätsinqanta tantiyakunantsikpä. Wakinnintsikmi yachayta chaskintsik mana yachanqantsik idiömakunacho parlanantsikpä. Wakinnintsiknami yachayta chaskintsik tsay parlayanqanta runakunata tantiyatsinantsikpä. 11 Juknö juknö yachayta chaskishqapis Espíritu Santu jukllayllami kaykan. Paymi kikin munanqannö juknintsik juknintsikta yachayta qaramantsik.†
Jesucristupa cuerpun kanqantsik
12 Cuerpuntsikcho umantsik, rikrantsik y chankantsik kaptinpis juk cuerpullami kantsik. Tsaynöllami noqantsikpis Jesucristuwan juk cuerpulla kantsik.† 13 Tsaymi Israel runa kashqapis y mana Israel runa kashqapis, watay kashqapis y mana watay kashqapis bautizakushqa llapantsikta Espíritu Santu churamashqantsik paypa cuerpun kanantsikpä. Tsay cuerpulla kashqami llapantsikta Tayta Dios Espíritu Santuta qaramashqantsik.
14 Cuerpuqa manami umallatsu ni rikrallatsu ni chankallatsu, sinöqa atska partirämi kaykan. 15 Chakipis “mana maki karqa manami cuerpupatsu kä” nirpis manami cuerpupitaqa yarquntsu. 16 Tsaynöllami rinripis “mana ñawi karqa manami cuerpupatsu kä” nirpis manami cuerpupitaqa yarquntsu. 17 Cuerpuntsik ñawilla kaptinqa ¿imawanrä wiyashwan? Tsaynöpis cuerpuntsik rinrilla kaptinqa ¿imawanrä mushkuytapis mayashwan? 18 Tayta Diosmi cuerpuntsikkunacho cada partikunata kamashqa pay munanqannölla kananpä. 19 Entëru cuerpucho juk partilla kaptinqa manami cuerputsu kanman. 20 Tsaymi atska parti karpis rasunpaypaqa juk cuerpulla kaykan.
21 Manami ñawintsikpis makintsikta ninmantsu: “Manami qamta ministïtsu”.
Umantsikpis chakintsikta manami ninmantsu: “Manami qamta ministïtsu”.
22 Tsaypa trokinqa cuerpuntsikcho mas pishi töpay kaq partikunatami mas ministintsik. 23 Cuerpuntsikcho mana rikatsikunqantsik partikunatapis ¿manaku latsapawan shumaq tsapantsik? 24 Rikana kaq partikunataqa manami tsapantsiktsu. Cuerpuntsikcho mana rikatsikunantsikpä kaq partikunata tsaynö mas cuidanantsikpämi Tayta Dios kamakätsishqa. 25 Tsaynö kamakätsishqa kaptinmi cuerpuntsikcho kaq partikuna chikinakuyantsu, sinöqa jukninpis jukninpis yanapanakuyanmi. 26 Cuerpuntsikcho juk parti nanaptinqa llapan cuerpuntsikmi llakikun. Cuerpuntsikcho juk parti alli rikashqa kaptinqa llapan partimi kushikuyan.
27 Qamkunaqa Jesucristupa cuerpunmi kayanki. Cada ünuykikunami tsaycho juk parti kayanki. 28 Tsaymi iglesiacho Tayta Dios puntata churashqa apostolkuna kayänanpä, tsaypita profëtakuna kayänanpä y tsaypita yachatsiqkuna kayänanpä. Tsaynöpis wakinta churashqa milagrukunata rurayänanpä, wakinta churashqa qeshyaqkunata alliyätsiyänanpä, wakinta churashqa muchuqkunata yanapayänanpä, wakinta churashqa imatapis alli ruraq kayänanpä y wakintanami churashqa mana tantiyayanqan idiömakunacho parlayänanpä.†
29 Manami llapantsu apóstol, ni profëta ni yachatsikuq kayan. Manami llapantsu milagrukunata rurayan, 30 ni qeshyaqkunata alliyätsiyan ni mana yachayanqan idiömakunacho parlayan. Tsay idiömakunacho parlayanqantapis manami llapantsu tantiyatsiyan. 31 Tsaynö kaykaptinqa Tayta Diospita mas allinnin yachayta chaskiyänaykipä yarpachakuyay.
Kananqa mas allinnin kaqta tantiyatsiyäshayki.