Jesucristuman yärakur salvakunantsikpä ninqan
3
Wawqikuna panikuna, Tayta Diospa munaynincho kawaykarqa kushikuyay. Noqa manami ajayätsu tsayllata kutin kutin qellqamurpis. Tsaynö qellqamunqä qamkunapä allimi.2 Llutan yachatsikuqkunapita cuidakuyay. Tsay allqukunami nikäyan: “Tayta Dios salvayäshunaykipäqa leyninkunata cumplir cuerpuykikunatarä roqukur señalakuyay”.
3 Cuerpuntsikta mana señalakurpis Espíritu Santu yanapamashqami Tayta Diosta sirviqkunaqa shonquntsikcho señalashqana kaykantsik.a † Manami leykunata cumplirrätsu salvakuntsik, sinöqa Jesucristuman yärakurmi.
4 Leykunata cumplir salvakunantsik kaptinqa noqapis leykunata cumplir salvakümanmi karqan. Noqanöqa manami pipis leykunata cumplishqatsu. 5 Leykuna ninqannöllami yurinqäpita puwaq junaqyuq kaykaptï señalayämarqan.† Tsaynöpis Benjamín trïbupita Israel runami kä.† Manami mayqan hebreo mayïpis noqanöqa leykunata cumplishqatsu. Fariseo karmi Tayta Diospa leyninkunata imaypis cumplirqä.† 6 Tayta Dios munanqanta ruranqäta yarparmi Jesucristuman yärakuqkunatapis qatikachaq kä.† Tsay leykuna ninqantaqa llapantami cumplirqä.
7 Tsaynö cumplirmi yarparqä allita ruraykanqäta. Kananmi itsanqa noqantsik raykuq Jesucristo wanunqanta musyar tsay cumplinqäkuna manakaqllapä kanqanta tantiyakü. 8 Señornï Jesucristuta reqinqämanqa manami imapis tinkuntsu. Tsaymi ñöpata ruranqäkunaman yärakunäpa trokin Jesucristuman yärakü. Ñöpata ruranqäkunaqa manami imapäpis välintsu. 9 Manami leyninkunata cumplinqäpitatsu munanqanta ruraqtanö Tayta Dios chaskimashqa, tsaypa trokinqa Jesucristuman yärakunqäpitami.
10 Jesucristuta masmi reqiyta munä. Payta Tayta Dios munayninwan kawaritsimunqannö noqatapis tsay munayninwan yanapamänantami munä. Tsaymi Jesucristo ñakanqannö ñakarpis y payta wanutsiyanqannö wanutsiyämaptinpis pay cäsukunqannö noqapis cäsukushä. 11 Tsaymi shuyaykä Jesucristuta Tayta Dios kawaritsimunqannö noqatapis wanuptï kawaritsimänanta.
Tayta Dios munanqannö kawanantsikpä ninqan
12 Manami jutsaynaq ni santu kanqätanatsu nikä, tsaypa trokinqa Jesucristo munanqannö kawanäpämi qoyay qoyay yarpachakü. Tsaynö kawanäpämi Jesucristo salvamashqa.
13 Wawqikuna panikuna, manami Tayta Dios munanqannötsu llapanta ruraykä. Unay kawanqäta yarparänäpa trokinqa qoyay qoyaymi yarpachakü Tayta Dios munanqannö kawanäpä. 14 Premiuta chaskinanpä llallinakur cörriqnömi noqapis Tayta Diospa ñöpanman chänäpä pay munanqannö kawaykä. Tsayman chänäpämi Jesucristo kayninpa Tayta Dios qayamashqa.
15 Jesucristuman firmi yärakuqkuna, ninqäkunata tantiyakuyay. Tantiyayta mana kamäpakuyaptikiqa Tayta Diosmi tantiyatsiyäshunki. 16 Imanö kaptinpis Jesucristo munanqannölla kawashun [y tsay yarpaylla kashun.]
17 Wawqikuna panikuna, imanö kawanqätapis rikayämay.† Noqakuna kawayanqänö kawaqkunapitapis yachakuyay. 18 Wakin runakunaqa mana alli kawarmi Jesucristo cruzcho wanunqanta manakaqman churayan. Tsaynö kayanqantami atska kutina qamkunata nishqä. Kananpis waqarmi willaykä. 19 Tsay runakunaqa Jesucristo munanqannö kawayänanpa trokin shonqunkuna yarpanqannöllami kawayan. Llutankunata rurayanqanpitami penqakuyänanpa trokin allish tukuyan. Kay patsacho kawayänallanpämi yarpachakuyan. Tsay runakunaqa infiernuman qaykushqami kayanqa.