Kushishqa kawanantsikpä ninqan
4
Kuyashqa wawqikuna panikuna, qamkunapä imaypis yarpararmi watukaq shamuyta munaykä. Qamkunami premiuta chaskinqä corönänö kaykäyanki. Yachatsinqänö kawayaptikimi pasaypa kushikü. Señor Jesucristo munanqannö imaypis kawayay.2 Evodiata y Síntiquitami rugakü Señor Jesucristuman yärakuykarqa juk shonqulla kawayänanpä. 3 Willakuq mayï, qamtapis rugakümi paykunata shumaq tantiyatsinaykipä. Jesucristupa willakuyninta Clementiwan y wakin willakuq mayïkunawanpis willakuyaptïmi tsay warmikuna alli yanapayämashqa. Paykunapa jutinkunapis Libru de la Vïdachömi qellqaraykan.
4 Jesucristupa munaynincho kawaykarqa imaypis kushikuyay. Yapaymi nï: ¡Kushikuyay!† 5 Alli runa kayanqaykita pïmaypis musyayätsun. Señor Jesucristo kutimunanpänami kaykan.
6 Imapäpis ama llakikuyaytsu. Tsaypa rantinqa agradëcikur llapanchöpis yanapayäshunaykipä Tayta Diosta mañakuyay.† 7 Tsaynö mañakuyaptikimi Tayta Dios alli kawayta qoyäshunki. Paymi shonquykikunata y yarpaynikikunata cuidanqa Jesucristuman yärakur mana llakikuyänaykipä. Tsaymi imanir kushishqa kawayanqaykita pipis tantiyanqatsu.
8 Wawqikuna panikuna, rasun kaqkunapä, alli ruraykunapä y alli kawaypä imaypis yarpachakuyay. Imapis alli kaptin o alabanantsikpä kaptinqa tsaykunapäpis yarpachakuyay. 9 Yachatsinqänölla, tantiyatsinqänölla, wiyayämanqaykinölla y imanö kawanqätapis rikayämanqaykinölla imaypis kawayay. Tsaynö kawayaptikimi Tayta Dios imaypis yanapayäshunki alli kawayänaykipä.
Pablo agradëcikunqan
10 Wawqikuna panikuna, apatsikayämunqaykita chaskirmi Tayta Diosta agradëcikü. Manarä chaskirpis musyashqämi mana qonqäyämanqaykita. Apatsikamuyta munarpis karucho karmi kamäpakayämurqaykitsu. 11 Manami pishïpakurtsu tsaynö nï. Imäpis kanqallanwan kushishqa kawakuytami yachakushqä. 12 Noqa musyämi imaykayuq kay y imaynaq kay imanö kanqantapis. Imanö kawarpis contentakuytami yachakushqä. Tsaymi kushishqa kawaykä pacha junta karpis, mallaqarpis, imaykayuq o imaynaq karpis. 13 Imanö karpis Jesucristo yanapamaptinmi alli kawaykä. 14 Tsaynö kaptinpis ministinqä höra apatsikayämunqaykita chaskir pasaypami kushikushqä.
15 Filipos wawqikuna panikuna, musyayanqaykinöpis Jesucristupa alli willakuyninta willakunäpä Macedonia provinciapita aywakuptï wakin iglesiakuna mana yanapayämaptinpis qamkunallami yanapayämashqayki. 16 Tesalónica† markacho kaykaptïpis atska kutimi ministinqäkunapä apatsikayämurqayki.† 17 Manami yapay apatsikayämunaykita munartsu tsaynö nï, tsaypa trokinqa yanapakuq kayanqaykipita mas bendicionta chaskiyänaykita munarmi.
18 Epafrodituwan apatsikayämunqayki llapan ministinqäkunapä aypashqa kaptinmi imäpis pishïmantsu. Tsay apatsikayämunqaykimi Tayta Diospä mushkuq sacrificiunö kaykan.† 19 Jesucristo noqantsik raykuq wanushqa kaptinmi gloriacho riquëzankunapita Tayta Dios qamkunatapis llapan ministiyanqaykita kamaripäyäshunki. 20 ¡Yayantsik Tayta Dios imaypis alabashqa kaykullätsun! Amén.
Cartapa ushanan
21 Qamkuna kaqcho llapan wawqikunata panikunata winchikuynï qoykuyällanki. Noqawan kaykaq wawqikuna panikunapis winchikayämushunkimi. 22 Tsaynöllami kay markacho yärakuq mayintsikkunapis winchikayämushunki. Mas mandaq Césarpa wayincho aruq wawqikuna panikunapis winchikayämushunkimi.
23 Señornintsik Jesucristo llapaykikunata kuyapaykuyälläshuy. [Amén.]