Wakin kaqkunata alli rikanantsikpä yätsinqan
2
Jesucristupa munaynincho allimi kawaykantsik. Pay kuyamashqami kushishqa kawantsik. Espíritu Santupis noqantsikwanmi imaypis kaykan. Tayta Diosmi tantiyaykätsimantsik llakinakur y kuyanakur kawanantsikpä. 2 Tsaynö kaykaptinqa tsay yarpaylla y juk shonqulla imaypis kuyanakur kawayay. Tsaynö kuyanakuyanqaykita musyarmi kushikushä.3 Runa mayikiwan ama chikinakuyaytsu ni yachaq tukuyaytsu, tsaypa trokinqa pïmaytapis alliman churar respëtuwan rikayay. 4 Kikillaykikuna alli kawayänaykipä yarpachakuyänaykipa trokinqa wakinkunapis alli kawayänanpä yarpachakuyay. 5 Jesucristo kawanqannö qamkunapis kawayay.
6 Payqa Dios kaykarpis† manami ciëlullachötsu täkurqan.
7 Munayyuq kayninta kacharirmi wätaynölla kananpä noqantsiknö yurirqan.
8 Runa karmi Tayta Dios munanqanta rurar cruzcho wanurqan.†
9 Tsaymi Tayta Dios payta churashqa llapanpitapis mas munayyuq kananpä.
Paytami jutita churaparqan llapanpitapis mas munayyuq kaqta.†
10 Tsaymi ciëlucho kaqkuna, kay patsacho kaqkuna y infiernucho kaqkunapis Jesucristuman qonqurikuyanqa.
11 Tsaychömi pïmaypis niyanqa Jesucristo Señornintsik kanqanta.
Tsaynö nirmi Tayta Diosta llapanpis alabayanqa.†
Tayta Dios munanqannö kawanantsikpä ninqan
12 Kuyay wawqikuna panikuna, tsaynö kaykaptinqa qamkunawan kaykar yachatsinqäkunata cäsukuyanqaykinölla karucho kaptïpis cäsukayämay. Salvashqana kayanqayki musyakänanpäqa Tayta Diospita mantsapakur llapan shonquykikunawan pay munanqannö kawayay. 13 Pay munanqannö kawayänaykipä kikinmi shakyätsiyäshunki y poderta qoyäshunki.
14 Manakaqman mana churanakuypa y mana rimanakuypa imaypis kawayay. 15 Tsaynö kawayaptikiqa Diospa wamran kayanqaykita tantiyakur manami pipis wasayki rimanqatsu. Tsaymi mana cäsukuqkunapa markancho tarpis† tsakaypa aktsi atsikyanqannö kayanki.
16 Salvakunantsikpä willakuyta imaypis cäsukuyay. Tsaynöpami Jesucristo kutimuptin willakuyninta allipä willakunqäpita pasaypa kushikushä.
17 Tsaynö kaptinmi wanutsiyämänan kaptinpis kushikü. Wanutsiyämaptinqa sacrificiu jananman vïnuta wiñayanqannömi kashä. Tayta Diosta mana ajayaypa sirviyanqaykipis sacrificiunö kaptin qamkunapis kushikuyay. 18 Noqa kushikunqänölla qamkunapis kushikuyay.
Timoteuta Filipusman Pablo kachananpä ninqan
19 Señor Jesucristo munaptinqa Timoteutami† kachamushä. Qamkuna kaqpita kutiykamur imanö kaykäyanqaykita willamaptinmi kushikushä. 20 Timoteunöqa manami pipis kantsu. Payllami qamkunapä noqanö yarpachakun. 21 Wakinkunaqa Jesucristo munanqanta rurayänanpa trokinmi kikinkuna yarpäyanqallanta rurayan.
22 Qamkuna musyayankimi Tayta Dios munanqannö Timoteo kawanqanta. Payqa imayka tsurïnömi yanapaykäman Jesucristupa alli willakuyninta willakunäpä. 23 Tsaymi prësu kanqäpita yarqamunäpä o mana yarqamunäpä kanqantapis musyaskirrä payta kachamushä. 24 Tayta Diosmanmi yärakü wichqaranqäpita yarqaskamur noqapis watukakuq shamunäpä kanqanta.
Filipusman Epafrodituta kachananpä kanqanta ninqan
25 Wawqintsik Epafroditutami qamkuna kaqman kachamushä. Kushikuypämi payta kachayämushqayki. Tayta Diospa soldädunnö karmi imanö ñakarpis yanapamashqa. 26 Qeshyaptin llakikuyanqaykita musyarmi qamkuna kaqman kutimuyta munaykan. 27 Rasunpaypapis pasaypami qeshyashqa. Wanukunanpäna kaykaptinmi Tayta Dios kuyaparnin alliyätsishqa. Tsaynöpami pasaypa mana llakikunäpä noqatapis Tayta Dios kuyapämashqa.
28 Tsaymi paywan tinkur kushikuyänaykipä juklla kachamushä. Payta rikaskir kushikuyaptikimi noqapis llakikushänatsu. 29 Pay chämuptin Señor Jesucristupa jutincho kushishqa chaskiyanki. Paynö yanapakuqkunataqa llapantapis alli chaskiyay. 30 Jesucristuta sirvir qamkunapa trokiki yanapaykämanqanchömi ichikllapa wanushqa.