Noqa Pablo, Jesucristupa sirviqnin karmi kay cartata Timoteuwan cartakaykayämü. 2 Yayantsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.

3 Qamkunapä yarparmi imaypis Tayta Diosta agradëcikü. 4 Tsaynöllami Tayta Diosta mañakur imaypis qamkunapä kushishqa mañakü. 5 Jesucristupa alli willakuyninta chaskikuyanqaykipita kananyaq yanapayämanqaykita manami qonqätsu. 6 Musyämi qamkunacho Tayta Dios alli rurayta qallaykunqanta y Jesucristo kutimunqanyaq tsay ruraykanqanta ushananpä kanqanta.^†

7 Qamkunapä yarparmi tsaynö nï. Jesucristupa willakuyninta willakur puriptïpis o prësu kaptïpis qamkunami yanapayämashqayki. 8 Tayta Dios musyanmi qamkunapä imaypis yarparaykanqäta. Jesucristo kuyamanqantsiknöllami noqapis llapan shonqüwan qamkunata kuyä.

9 Tsaymi Tayta Diosta mañakuykä shumaq tantiyakur payta kuyarnin jukniki juknikipis kuyanakuyänaykipä. 10 Tsaynö kuyanakurmi alli kaqkunata rurayänaykipä tantiyakuyanki y Jesucristo kutimunanta shuyar pay munanqannö jutsaynaqlla kawayanki. 11 Imaypis allillata rurayänaykipä Jesucristo yanapaykuyälläshuy. Llapanpis kaykutsun Tayta Dios alabashqa kananpä.

12 Wawqikuna panikuna, prësu wichqarätsiyämaptinpis Jesucristupa alli willakuyninta maytsaycho chaskikuyanqanta musyayänaykitami munä. 13 Tsaymi kaycho llapan wardiakunawan wakin runakunapis musyaykäyan Jesucristupa willakuyninta willakunqäpita prësu kaykanqäta.^† 14 Tsayta musyarmi wakin wawqikuna panikunapis Jesucristuman yärakurnin mana mantsariypana alli willakuyta willakuykäyan.

15 Wakinqa noqapita mas reqishqa kayta munarmi chikiyämar willakuykäyan. Wakinmi itsanqa runakuna salvakuyänanpä willakuykäyan. 16 Paykuna musyayanmi Jesucristupa alli willakuyninta willakunqäpita wichqaraykanqäta. Wichqaraptïpis Jesucristuta kuyarmi willakuykäyan. 17 Reqishqa kayta munaqkunaqa manami Tayta Diosta sirviyta munartsu willakuykäyan, tsaypa trokinqa ajanätsimayta munallarmi. 18 Tsaynö kayaptinpis manami llakikütsu. Ajanätsiyämänanpä willakurpis o runakuna salvakuyänanpä willakurpis Jesucristupa alli willakuyninta willakuyaptin kushikümi.

Tsaynöllami imaypis kushikü 19 Tayta Diosta noqapä mañakuyaptiki y Jesucristupa Espïritun yanapamaptin prësu kaykanqäpita yarqamunäpä kanqanta musyar. 20 Mana mantsariypa parlanäpä imaypis yanapamanqannömi autoridäkunapa ñöpanchöpis yanapamanqa. Tsaymi Jesucristo yanapamanqan musyakanqa kawaykaqta kachariyämaptinpis o wanutsiyämaptinpis.

21 Kawarpis Jesucristullapämi kawashä. Wanuptïpis mas allimi kanqa.^† 22 Tsaynö kaptinpis mana wanutsiyämaptinqa Jesucristupa willakuynintami imaypis willakushä. Tsaymi wanuypis kawaypis noqapäqa alli kaykan.

23 Tsaynö kaptinmi mayqanta akraytapis kamäpakütsu. Noqapäqa mas allimi kanman kay patsata jaqirir Jesucristupa ñöpanmanna aywakuptï. 24 Tsaynö kaptinpis qamkunata yanapanä raykuq kawaptïpis allimi kanman. 25 Tsaymi qamkuna raykuq Tayta Dios tsapämaptin autoridäkuna wanutsiyämanqatsu. Tsaynöpami yanapayäshayki Tayta Diosman yärakur kushishqa kawayänaykipä. 26 Carcelpita yarqur qamkuna kaqman chämuptïmi pasaypa kushikur Jesucristuta alabashun.

27 Jesucristupa alli willakuynin ninqannölla imaypis kawayay. Tsaynöpami shamurpis mana shamurpis musyashä ñakarpis llakikurpis Jesucristo munanqannö kawaykäyanqaykita y imaypis kuyanakuykäyanqaykita. Tsaynöllami musyashä runakuna chikiyäshuptikipis Jesucristupa alli willakuyninta willakuykäyanqaykita.

28 Jesucristuman yärakuyanqaykipita runakuna chikiyäshuptikipis ama mantsariyaytsu. Tsaynöpami tantiyakuyanqa kikinkuna ushakäyänanpä kanqanta y qamkunata Tayta Dios salvayäshunqaykita. Tsaytaqa Tayta Diosmi ruranqa.

29 Manami Jesucristuman yärakunallantsikpätsu Tayta Dios akramashqantsik, sinöqa pay raykuq ñakanantsikpämi. 30 Ñöpata imanö ñakanqätapis y kanan imanö ñakanqätapis musyayankimi.^† Noqapis y qamkunapis Jesucristupa willakuyninta willakunqantsikpitami ñakashun.