9
(8.23) ¡Imanöllarä weqï yakunörä yuriskinman!¡Ñawïpis pukyunörä tikraskinman!
Tsaynö kaptinqa marka mayïkunata wanutsiyanqanpita paqaspis junaqpis llakikurmi waqäman.†
2 (1) ¡Pillarä tsunyaq jirkacho tsukllallatapis ruraykamunman!
Tsaychömi markäpita aywakur täküman.
Marka mayïkunaqa Tayta Diosta manami cäsukuyantsu ni awnirkurpis manami cumpliyantsu.
Judá nacionta ushakätsiyänanpä willakunqan
3 (2) Tayta Diosmi nin:
“Kay nacionchöqa flëchata llutalla flëchaqnömi llutalla llullakuyan.
Warayllanta warayllantami jutsata pasaypa rurayan.
‘Tayta Diostami reqï’ nirpis manami rasunpaypaqa reqiyämantsu.
4 (3) “Paykunaqa manami runa mayinmanpis ni wawqinmanpis yärakuyantsu.
Amïgunwanpis manakaqtami tumpanakuyan.
Tsay wawqilla kaykarpis engañanakuyanmi.
5 (4) Jukninpis jukninpis llullapänakuyanmi.
Rasun kaqtaqa manami imaypis parlayantsu.
Jutsa rurayman uman churakashqami kaykäyan.
6 (5) Llullapänakullar kawarmi reqimaytapis munayantsu.
Noqa Tayta Diosmi tsaynö nï”.
7 (6) Tsaymi llapanta mandaq Tayta Dios nin:
“Qanranta jipinanpä qorita tsullutsiqnömi kuyanqä runakunata corrigishä.
Tsaynö mana corrigirqa ¿imatarä mas ruräman?
8 (7) Paykuna parlayanqanqa alli afilashqa flëchanörämi kaykan.
Imatapis rasuntanörämi pitapis criyiratsiyan.
Alli shimillanpa amïgunta parlaparpis shonqunchöqa ajapaykäyanmi.
9 (8) Tsaynö kayanqanta rikaykarqa ¿manatsurä castigäman?
Tsay niraq runakunaqa makïta apayanqarämi.
Noqa Tayta Diosmi tsaynö nï”.
10 (9) ¡Jirkakunapämi pasaypa waqashä!
¡Chakracho qewakunapäpis waqay waqaytami cantashä!
Chipyaq rupatsishqa kaptinmi tsaykunapa pipis purinqanatsu.
Törukuna büyanqanpis manami wiyakanqanatsu.
Pishqukunapis y jirka uywakunapis qeshpirmi aywakuyanqa.
11 (10) Tayta Diosmi nin:
“Chipyaq ushakätsiptïmi Jerusalén marka raqällana rikakunqa.
Chacalkunallami tsaycho täyanqa.
Judá nacioncho kaq wakin markakunatapis chipyaqmi ushakätsishä.
Manami pipis tsay markakunacho tanqanatsu”.
Judá nacionta imanir ushakätsinanpä kanqan
12 (11) ¿Imanirtä kay nación ushakashqa? ¿Imanirtä tsunyaqman tikrashqa? ¿Pitä yachaq kaykan imanir tsaynö päsanqantapis musyananpä? ¿Pitatä Tayta Dios tantiyatsishqa tsayta willakunanpä?
13 (12) Tayta Diosmi nin: “Llapanpis tsaynö kanqa leynïkunata mana cumpliyanqanpita, ninqäkunata mana wiyakuyanqanpita y yätsinqänö mana kawayanqanpitami. 14 (13) Cäsukayämänanpa trokinmi shonqunkuna yarpanqanta rurar unay castankunanölla Baal dioskunata adorayashqa”.
15 (14) Tsaymi Israel runakunata kuyaq y llapanta mandaq Tayta Dios nin: “Pasaypa iwjiq mikuyta mikutsiqnö y venenashqa yakuta uputsiqnömi kay runakunata castigashä.† 16 (15) Unay castankunapis ni kikinkunapis mana reqiyanqan nacionkunamanmi paykunata qarqushä. Soldädukunatapis paykunamanmi kachashä espädawan wanutsiyaptin llapanpis ushakäyänanpä”.
Jerusaléncho pasaypa waqayänanpä ninqan
17 (16) Llapanta mandaq Tayta Diosmi nin:
“Imanir castiganäpä kanqantapis tantiyakuyay.
Wanupakuycho waqapakuq warmikunata qayatsiyämuy.
Shumaq waqay yachaqkunata ashiyämuy.
18 (17) Ras shayämurnin nacionnikipä llakikur waqayätsun.
Pasaypa waqayaptin qepshankunapapis weqin jututsun.
19 (18) Siónpitami wiyakämunqa llakikur waqayanqan.
Tsaynö waqarmi niyanqa:
‘¡Chipyaq ushakashqami kaykantsik!
¡Pasaypa penqakuypämi kaykantsik!
¡Wayintsiktapis juchutsirmi ushayashqa!
¡Nacionnintsiktapis kachariykushqantsiknami!’ ”
20 (19) Warmikuna, Tayta Dios ninqanta shumaq tantiyakuyay.
Warmi wawaykikunata waqapakuq kayta yachatsiyay.
Yanasaykikunatapis wanupakuy cantukunata yachatsiyay.
21 (20) Wayintsikkunamanmi wanuy chämushqa.
Palaciuntsikkunamanmi wanuy yaykamushqa.
Cällikunachöpis wamrakunatami wanutsiyan.
Pläzakunachöpis chölukunatami ushakätsiyan.
22 (21) Tayta Diosmi nin:
“Wanushqa runakunapa ayankunaqa uywakunapa iskannömi mashtaräyanqa.
Trïgu manöjukunata pipis mana qoriptin jitaranqannömi jitaräyanqa”.
Tayta Dios imapita kushikunqan
23 (22) Tayta Diosmi nin:
“Tantiyakuq runa tantiyakuq kanqanpita ama alabakutsuntsu.
Munayyuq runapis munayyuq kanqanpita ama runa tukutsuntsu.
Imaykayuq runapis imaykayuq kanqanman ama yärakutsuntsu.
24 (23) Tsaypa trokinqa kushikuyätsun noqata reqimar Tayta Dios kanqäta tantiyayanqanpita.†
Noqaqa kuyapäkuq y kay patsacho allillata ruraqmi kaykä.
Tsaynö reqimar tantiyakuyaptinmi kushikü.
Noqa Tayta Diosmi tsaynö nï”.
Israel runakunapa shonqunkuna señalanni kanqan
25 (24) Tayta Diosmi nin: “Cuerpun señalakuqkunata y mana señalakuqkunatapis castiganäpä kaq tiempu chaykämunnami. 26 (25) Noqaqa castigashämi Egipto runakunata, Judá runakunata, edomita runakunata, amonita runakunata y moabita runakunatapis. Tsaynöllami castigashä llapllanta rutukur tsunyaq jirkacho taqkunatapis.a Llapanpis tsay runakunaqa señalanninömi kaykäyan. Israel runakunapis cuerpun señalashqa karpis shonqunkunaqa señalannimi kaykan”.b †