Lamentaciones ninanqa “llakikur waqanqan” ninanmi. Wata 586 a. C. Jerusalénta ushakätsiyanqanpita watakuna päsaskiptinmi kay libruta qellqarqan. Jerusalénta juchutsiyanqanpita y tsaycho taq runakunata juklä nacionman apakuyanqanpitami kay libruta qellqaq runa pasaypa llakikurqan.

Kay libruta qellqarqan runakuna qorikaykur Tayta Diosta perdonta mañakuyänanpämi. Tsaymi templuta yapay shärirkatsir kay librucho qellqaraykaqkunata cada wata cantayaq.

Kay libruta pï qellqanqanpis manami musyakantsu. Atska runakunami yarpäyan profëta Jeremías qellqanqanta.

Kay librucho cada capïtulu juk poesíami kaykan. Capïtulu 1, 2 y 4-cho cada versïculu juk hebreo letrawanmi qallaykun. Tsaymi hebreo abecedariucho punta kaq letra álef kaptin punta kaq versïculu hebreucho qallaykun álef letrawan. Hebreo abecedariucho ishkay kaq letra bet kaptinmi ishkay kaq versïculu hebreucho qallaykun bet letrawan. Tsaynöllami cada versïculucho qallaykun hasta ushananyaq. Hebreo abecedariucho ishkay chunka ishkay (22) letra kaptinmi tsay capïtulukunacho ishkay chunka ishkay versïculukuna kaykäyan.

Capïtulu 3-chönami cada kimsa versïculu qallaykun tsay letrallawan. Tsaymi hebreo abecedariucho punta kaq letra álef kaptin versïculu 1, 2 y 3 hebreucho qallaykun álef letrawan. Hebreo abecedariucho ishkay kaq letra bet kaptinmi versïculu 4, 5 y 6 hebreucho qallaykun bet letrawan. Tsaynöllami cada kimsa versïculu kaykan hasta ushananyaq. Hebreo abecedariucho ishkay chunka ishkay (22) letra kaptin y cada kimsa versïculu tsay letrallawan qallaykuptinmi tsay capïtulucho soqta chunka soqta (66) versïculukuna kaykan.