Lamentaciones
Punta kaq poesía
1
Álef1 ¡Allaw, Jerusalén marka!
Tsaytsika runakuna qamcho täyaptinpis ¡imanöpatä ushakaykurqayki!
Ñöpata maytsay markapita mas reqishqa kaykarpis kananqa viüda warminömi kaykanki.
Atska markakunapa mandaqnin reinanö kaykurpis kananqa wätay warminömi rikakushqayki.
Bet
2 Tsakaykunapapis pasaypa llakikurmi iktsunqaykiyaq waqaykanki.
Qaqllaykipapis yakunörämi weqiki aywaykan.
Kuyanakunqaykikunapis shoqashunaykipä manami kantsu.
Llapan yanasaykikunapis kananqa chikiyäshunkinami.†
Guímel
3 Judá runakunaqa contrankuna tsariyaptin manami ima ruraytapis kamäpakuyashqatsu.
Prësu apakuyaptinmi juklä nacioncho pasaypa ñakaykäyan.
Jäpa nacioncho prësu karmi jamaytapis tariyantsu.
Dálet
4 Tayta Diosta adorayänanpä fiestakunamanpis mananami shayämunnatsu.
Sión jirkanman aywaq nänikunapis llakikuypä tsunyaqmi kaykan.
Markaman yaykuna punkukunachöpis manami pipis kannatsu.
Sacerdötikunapis waqaykäyanmi.
Jipashkunapis llakikuykäyanmi.
Maytsaychöpis waqakuyllami kaykan.†
He
5 Jerusalén markataqa pasaypa jutsan poqushqa kaptinmi Tayta Dios castigashqa.
Tsaymi chikiqninkuna munaynincho tsararaykäyan.
Wawankunatapis apakushqa karmi chikiqninkuna kushishqa kaykäyan.
Vav
6 Sión runakuna puëdiq kayanqanman yärakurpis kananqa munayniynaqnami kaykäyan.
Mallaqpä kaykaq lluytsu qewata ashiqnömi mandaqninkunapis kaykäyan.
Pasaypa tsankapaykachaykarmi qatipaqninkunapita qeshpiykäyan.
Zayin
7 Jerusalén, qamcho taq runakunata atacayaptin manami pipis janan shärishqatsu.
Llapanpis jaqiskiyäshuptikimi chikishuqnikikuna asikuyashqa.
Qamcho taq runakuna ñöpata imaykayuq kayanqanta yarpaskirmi juklä nacioncho pasaypa llakikuyan.
Jet
8 Pasaypa jutsata rurarmi Jerusalénqa impüru rikakushqa.
Qallapächu warminö penqakuypä kaykaqta rikarmi ñöpata respitaq runakunapis kananqa respitayannatsu.
Tsaynö rurayaptinmi waqar penqakushqa umpuräkuyan.†
Tet
9 Warmipa killa qeshyan träjin jananyaq ushmaptin penqakuypä kanqannömi Jerusalénpis jutsata ruranqanpita penqakuypä kaykan.
Manami ichikllatapis yarpashqatsu ushakänanpä kanqanta.
¡Mana criyiypämi ushakashqa!
¡Manami pipis kuyapashqatsu!
Pasaypa llakikurmi nin:
“Tayta Dios, conträkuna ushakätsiyämanqanpita llakikuptï kuyapaykallämay”.
Yod
10 Jerusalénpa contrankunami imaykatapis allinnin kaqta apakuyashqa.
Jäpa runakuna templuman mana yaykuyänanpä Tayta Dios nikaptinmi llutalla yaykuyashqa.†
Caf
11 Jerusalén runakunami waqaraykar mikuyta ashiyashqa.
Kawayänanpä tupu mikuyta tariyänanpämi imaykankunatapis rantikuyashqa.
Tayta Dios, tsayjinanpa ñakaykaqta rikaykämarqa kuyapaykallämay.
Lámed
12 Jerusalén markami nin:
“Nänipa päsaqkuna, shumaq yarpachakuyay.
Noqa ñakaykanqänö ¿pillaqa ñakaykantsurä?
Tayta Diosmi pasaypa ajanarnin castigamashqa kaynö ñakanäpä.
Mem
13 “Paymi ciëlupita patsa ninata kachamushqa tullüyaq rupamänanpä.
Purinämanpis mana päsanäpämi trampata churapämashqa.
Kachariykamaptinmi pasaypa ñakaykä.
Nun
14 “Matankächo lasaq yügu wataraykaqnömi jutsä ruranqäkuna lasaykäman.
Jutsäpita kikin Tayta Dios tsaynö castigamaptinmi kallpäpis kannatsu.
Conträkunapa makinman kachariykamaptinmi imanö ichipaytapis kamäpakütsu.
Sámej
15 “Tayta Diosqa washämaq kallpasapa runakunatapis llapantami ushakätsishqa.
Jäpa soldädukunawanmi chölukunatapis ushakätsishqa.
Vïnupä üvata jarur ushaqnömi runakunata Tayta Dios ushakätsishqa.†
Ayin
16 “Pasaypa waqayllawanmi ñawïpis tsakaskinna.
Shoqamänanpä ni yanapamänanpä manami pïnïpis kantsu.
Conträkuna vinciyämarmi wamräkunatapis ushakätsiyashqa”.
Pe
17 Makillan tsoqpashqa Sión rugakuptinpis manami pipis kuyapar yanapantsu.
Tayta Diosmi mandashqa Jacobta vecïnunkuna ushakätsiyänanpä.
Manakaqmanmi Jerusaléntaa contrankuna churaykäyan.
Tsade
18 Jerusalén markami nin:
“Tayta Dios nimanqanta manami wiyakushqätsu.
Tsaymi jutsata ruranqäman tupu castigamashqa.
Maytsaycho taq runakuna, rikayay imanö ñakaykanqätapis.
Chölükunatawan jipashnïkunatapis prësumi apakuyashqa.
Qof
19 “Kuyanakunqä nacionkunatami yanapayämänanpä rugakurqä.
Yanapayämänanpa trokinmi conträ rikakuyashqa.
Sacerdötikuna y mayor runakunapis ñakarmi mikuyta ashir puriyashqa.
Mana tarirmi mallaqaypita patsan markallacho wanuyashqa.
Resh
20 “Tayta Dios, pasaypa llakikuykaqta rikaykämarqa kuyapaykallämay.
Mana wiyakuq kanqäta yarpaskiptï shonqüpis pasaypami tiktikyan.
Marka waqtancho wamräkunata espädawanmi wanutsiyan.
Marka rurinchöpis wanuyllami kaykan.†
Sin/Shin
21 “Llakikur waqaykaqta wiyaykämarpis manami pillapis shoqaykamantsu.
Castigamanqaykita musyar llapan conträkunami kushipaykäyäman.
Noqata castigamanqaykinö paykunatapis castigaykullay.
Tav
22 “Conträkuna llutanta rurayanqantapis rikaykullay.
Jutsata ruranqäpita castigamanqaykinö paykunatapis castigaykullay.
Pasaypa llakikuptïmi shonqu nanaypis tsariman”.