Ishkay kaq poesía
2
Álef1 Pasaypa ajanarninmi Siónta Tayta Dios ushakätsishqa.
Ciëluchönö kuyayllapä kaykaptinpis chipyaqmi ushakätsishqa.
Ajanashqa karmi tänan templutapis mana kuyapaypa ushakätsishqa.
Bet
2 Tayta Dios pasaypa ajanarmi Jacobpita aywaraq runakunapa wayinkunatapis ushakätsishqa.
Llapantami chipyaq juchutsishqa.
Judá nacioncho llapan murallashqa markakunatapis chipyaqmi juchutsishqa.
Tsaynöpami mandaqkunata y mandashiqkunatapis penqakuyman churashqa.
Guímel
3 Chikimaqnintsik runakuna atacamashqapis pasaypa rabyanarmi soldäduntsikkunata Tayta Dios yanapashqatsu.
Tsaynöpami llapan soldäduntsikkunatapis illakätsishqa.
Nina lunyar chipyaq ushaqnömi Israel runakunata ushakätsishqa.
Dálet
4 Imayka contrantsiknömi Tayta Dios flëchakunanta jinchi sutaskir flëchamashqantsik.
Llapan kuyayllapä kaqkunatapis chikimaqnintsiknömi chipyaq ushakätsishqa.
Rabyanaynin imayka ninanö kaptinmi chipyaq ushakätsimashqantsik.
He
5 Chikimaqnintsiknömi Israel nacionnintsikta Tayta Dios ushakätsishqa.
Palaciuntsikkunatapis llapantami juchutsishqa.
Amparakunantsik jinchi pirqashqa markantsikkunatapis llapantami ushakätsishqa.
Kuyayllapä Judácho taq runakunatapis pasaypa llakikuymanmi churashqa.
Vav
6 Tsukllata ushakäratsiqnömi templuntapis Tayta Dios ushakätsishqa.
Ushakätsiptinmi pipis kannatsu Sióncho fiestakunata rurananpä ni jamay junaqkunacho jamananpäpis.
Pasaypa rabyanar castigaptinmi reypis y sacerdötikunapis ushakäyashqa.
Zayin
7 Altarnintawan templuntapis Tayta Dios manami rikaytapis munannatsu.
Marka murällakunatapis juchutsiyänanpämi chikiqninkunapa munayninman churaykushqa.
Tsaymi Tayta Diospa templunman yaykur fiestata ruraqnörä pasaypa qayaräyashqa.†
Jet
8 Kikin Tayta Diosmi kamakätsishqa Siónpa pirqankunata juchutsiyänanpä.
Juchutsiyänanpä willanakuyanqannöllami chipyaq ushakätsiyashqa.
Kananqa Jerusalénpa pirqankunapis jiruruypa juchushqa karmi rumikunallana qoturaykan.
Tet
9 Markaman yaykuna punkunkunapis manami kannatsu.
Cerröjunkunapis pakir ushashqami jitaraykan.
Mandamaqnintsik reytapis y autoridänintsikkunatapis juklä nacionkunamanmi prësu apakuyashqa.
Tayta Diospa leyninkunata yachatsiq runakunapis mananami kayannatsu.
Profëtankunatapis Tayta Dios mananami revelannatsu.†
Yod
10 Sióncho mayor runakunapis upällallami patsacho jamaraykäyan.
Pasaypa llakikurmi qachqa latsapata jatikurkur umankunaman allpata wiñakuykäyan.
Jerusalén jipashkunapis pasaypa llakikurninmi urkunkunapis patsaman töpanqanyaq lätaraykäyan.
Caf
11 Waqayllawanmi ñawïpis tsakaykanna.
Pëchüpis pasaypami nanaykan.
Marka mayïkuna ñakaykäyanqanta rikar shonqüpis nanayparämi llakikun.
Chuchuykaq wamrakuna cällicho mallaqaypita wanuykaqta rikarmi pasaypa llakikü.†
Lámed
12 Tsay wamrakunami mamankunata mañakuyan ima mikuyllatapis qarananpä.
Pasaypa mallaqarninmi mamankunapa millqayllancho wanuykäyan.
Guërracho pelyaq runakunanömi Jerusalén cällikunacho wanuykäyan.
Mem
13 Sión, pasaypa ñakaykanqaykita rikar ¿imatarä nïman?
Pasaypa ñakaykanqaykita ¿imamanrä tinkutsïman?
¿Imaman tinkutsiypa parlaparrä qamta shoqäman?
Juchu aywaqnörämi desgracia päsashushqayki.
Tsaynö kaykaqta ¿pirä yanapashunki?
Nun
14 “Tayta Diosmi revelamashqa” nir profëtaykikuna willayäshunqaykipis manami rasunpaypatsu kashqa.
Rasunpaypa profëta karqa jutsa rurayta kachariyänaykipämi willayäshunkiman karqan.
Jutsaykikunata kachariyaptikiqa juk nacionman prësu manami apayäshunkimantsu karqan.
Rasun kaqta willayäshunaykipa trokinmi manakaqkunata criyitsiyäshushqayki.†
Sámej
15 Nänipa päsaqkunapis kushipäyäshurnikimi taqllapäyäshunki.
Manakaqman churayäshurnikimi shukar umankunatapis awirrä niyäshunki:
“¿Taqay markachi may markapitapis mas kuyayllapä karqan?
¿Taqay markapächi maytsaychöpis runakuna kushikuyarqan?”
Pe
16 Llapan chikishuqnikikunami wasaykita rimayan.
Kachkachyarrämi ajanapäyäshurniki niyan:
“Imanö karpis chipyaqmi ushakätsishqantsik.
Tsaynö ushakashqa kanantami munarqantsik.
Munanqantsiknömi ushakätsishqantsik”.
Ayin
17 Yarpanqannöllami Tayta Dios castigamashqantsik.
Llapan ninqankunatami cumplishqa.
Unaypita patsa yarpanqannöllami Jerusalénta mana kuyapaypa ushakätsishqa.
Chikimaqnintsikkuna kushipämänantsikpä y makincho tsararämänantsikpämi kamakätsishqa.†
Tsade
18 Sión, yanapashunaykipä Tayta Diosta rugakuy.
Paqaspapis junaqpapis yakunörä weqiki aywatsun.
Ñawikipis pukayanqanyaq mana päraypa waqay.
Qof
19 Paqaskunapapis makikita tsoqpakurkur Tayta Diosta rugakuy.
Llakikuykanqaykitapis llapan shonquykiwan waqar willay.
Mallaqaypita wamraykikuna cällikunacho mana wanuyänanpä makikita joqarkur mañakuy.
Resh
20 Tayta Dios, ima päsaykäyämanqantapis tantiyaykullay.
¿Allitsurä kaykan kuyar wätayanqan wawankunata warmikuna mikuyaptin?
¿Allitsurä kaykan sacerdötikunatawan profëtakunata templucho wanutsiyaptin?†
Sin/Shin
21 Wamrakunapis awkinkunapis cällikunachömi wanushqa jitaraykäyan.
Chölukunata y jipashkunatapis espädawanmi wanutsishqayki.
Pasaypa rabyanashqa karmi mana kuyapaypa wanutsishqayki.
Tav
22 Tukuyläya ñakaykuna chämunanpämi kamakätsishqayki.
Fiestaman runakuna maytsaypitapis shamuqnörämi ñakaykuna shamushqa.
Ajanar castigaptiki manami ni jukllayllapis kawaykar quëdashqatsu.
Wamra kanqanpita patsa wätakuyanqätapis conträkunami chipyaq wanutsiyashqa.