Kimsa kaq poesía
3
Álef1 Tayta Dios rabyanar castigamaptinmi noqaqa pasaypa ñakashqä.
2 Aktsi kanqanpa pushamänanpa trokinmi tsakaqpa pushamashqa.†
3 Kutin kutinmi imaypis castigaykäman.†
Bet
4 Qarätapis aytsätapis pasaypanami shiktuyätsishqa.
Tullükunatapis llapantanami pakir ushashqa.†
5 Mayman chaptïpis llakikuyllami y ñakayllami kaykan.
6 Wanushqanö kanäpämi tsakäpakushqata kachaykamashqa.†
Guímel
7 Maypapis mana qeshpinäpämi wichqaykamashqa.†
Pasaypa lasaq cadënakunawanmi wataykamashqa.
8 Yanapamänanpä rugakuptïpis manami wiyamantsu.†
9 Nänita tsapaqnömi imata rurayta munaptïpis tsapäman.
Nänita jukläpa jitariqnömi kawaynïtapis mana alliman churan.
Dálet
10 Imatapis tsarinanpä shuyaraykaq ösunömi shuyaraykäman.†
Pakaraykaq leonnömi atacamänanpä kaykan.
11 Alli nänipa aywaykaqtami pantakätsimashqa.
Chipyaq rachir ushamaqnömi mantsarishqata jaqimashqa.
12 Flëchakunanwan toqiykamarmi flëchamashqa.
He
13 Flëchamanqanqa shonqüyaqmi jatikashqa.†
14 Marka mayïkunapis pasaypami asipäyäman.
Asikuyänallanpämi jutïtapis joqariyan.†
15 Pasaypa llakikuymanmi Tayta Dios churamashqa.
Pasaypa ayaq jachatami uputsimashqa.†
Vav
16 Rumiwan takarmi kirütapis jipishqa.
Uchpaman lätakaqpämi saqtamashqa.
17 Noqaqa imaypis llakishqallami kawä.
Mananami kushikuytapis tarïnatsu.
18 Pasaypa llakikurmi manakaqllapä Tayta Diosman yärakunqäta yarpashqä.
Zayin
19 Tayta Dios, llakikunqäta y pasaypa ñakanqäta rikar kuyapaykallämay.
Pasaypa iwjiq ajenjuta y venënuta upushqanömi ñakaykä.
20 Kayjinanpa ñakanqätä yarpachakuptïmi shonqüpis pasaypa llakikun.
21 Tsaynö kaptinpis kuyapäkuq kanqaykita tantiyarmi qamman yärakamü.
Jet
22 Tayta Diosqa imaypis kuyamantsikmi.
Kuyapäkuq kayninqa manami ushakantsu.
23 Qoyay qoyaymi mana ajayaypa kuyamantsik.
Awnimanqantsiktaqa imaypis cumplinmi.†
24 Tsaymi shonqullächo nï:
“Tayta Diosllami herenciä kaykan.
Paymanmi imaypis yärakushä”.†
Tet
25 Llapan shonquntsikwan yärakur rugakushqaqa Tayta Dios yanapamantsikmi.†
26 Tsaynö kaykaptinqa Tayta Dios salvamänantsikpä mana ajayaypa shuyaräshun.
27 Chölullarä kanqantsikpita patsa Tayta Dios corrigimanqantsikta chaskikushun.
Yod
28 Tayta Dios castigamashqaqa upälla chaskikushun.
Runakunapita witikur payta mañakushun.
29 Qonqurikuykur makintsikta tsoqpashqa mañakushqaqa capazchi kuyapämäshunpis.
30 Maqamashqapis qaqllantsikta kamapäshun.
Imata qayapämashqapis upällalla chaskikushun.†
Caf
31 Tayta Diosqa castigamarnintsikpis yapaymi kuyapämäshun.
32 Castigaskamarnintsikpis kuyapäkuq karmi yanapamäshun.†
33 Shonqun nanaykaptinmi payqa ñakatsimantsikpis y llakikatsimantsikpis.
Lámed
34 Tayta Diosqa rikaykanmi prësukunata ñakatsiyanqanta.
35 Tsaynöpis rikaykanmi pï runata manakaqman churayanqanta.
36 Musyaykanmi demanducho jutsayuqpa janan shäriyanqantapis.
Tsaynö ruraqkunataqa juzganqami.
Mem
37 Tayta Dios mana kamakätsiptinqa imapis manami kanmantsu.
38 Alli kawaypis o ñakaypis poderyuq Tayta Dios niptinrämi kaykan.†
39 Jutsata ruranqantsikpita castigamashqapis kawaykarräqa ¿imanirrä qallayashwan?
Nun
40 Imanö kawanqantsiktapis shumaq yarpachakur jutsa rurayta kacharishun.
Tayta Diosta ashir pay munanqannöna kawashun.
41 Makintsikta joqarkur ciëlucho kaykaq Tayta Diosta llapan shonquntsikwan mañakushun:
42 “Ninqaykita mana cäsukurmi jutsata rurayashqä.
Tsaymi perdonayämashqaykitsu”.†
Sámej
43 Pasaypa rabyanarninmi mana kuyapaypa qati qatiykur wanutsiyämashqayki.
44 Rugakayämunqäta mana wiyanaykipämi pukutay rurinman pakakushqayki.
45 Llapan runakunapa ñöpanmanmi imayka qanratanö jitariyämashqayki.
Pe
46 Chikimaqnïkunapis imaykatami qayapäyäman.
47 Ashi ashiykur wanutsiyämaptin y imaykäkunatapis ushakätsiyaptinmi mantsarir kawayä.
48 Kuyanqä markata tsaynö ushakätsiyaptinmi weqïpis mayunörä aywan.†
Ayin
49 Mana päraypami waqaykä.
51 Jerusalén markächo jipashkuna ñakaqta rikaptïmi shonqüpis pasaypa nanäman.
Tsade
52 Mana wajupaykaptïmi chikimaqnïkuna qatikachäyämashqa.
Pishquta tsariqnömi prësu tsarimayta munayämashqa.
53 Kawaykaqtami pözuman jitarpayämashqa.
Nirkurmi läja rumiwan tsapayashqa.
54 Yaku ultakarkamaptinmi yarparqä wanukunäpäna kanqanta.†
Qof
55 Tayta Dios, pözucho wiñararmi jutikita joqarir qamta mañakushqä.†
56 Mañakamunqäta wiyamashqaykimi.
Rugakamunqäta imaypis wiyamankimi.
57 Qayakamuptï shamurmi “ama mantsarïtsu” nimashqayki.
Resh
58 Tayta Dios, qammi ima desgraciapitapis tsapämashqayki.
Wanuypitapis qammi salvamashqayki.
59 Rikaykankimi imanö ñakatsiyämanqantapis.
¡Tsay ñakatsimaqkunata castigaykullay!
60 Venganzata ruramanqanta y conträ imanö sharkuyanqantapis rikashqaykimi.
Sin/Shin
61 Tayta Dios, wiyashqaykimi conträkuna ashlliyämanqanta y atacayämänanpä willanakuyanqantapis.
62 Chikimaqnïkunaqa wasäta rimaykällarmi qoyäyanpis.
63 Imachöpis asikuyänallanpämi jutïta joqariyan.
Llapan niyanqantapis shumaq wiyaykullay.
Tav
64 Tayta Dios, paykunataqa jutsata ruranqanman tupu castigaykullay.
65 Mana tantiyakuyänanpä maldicionaykullay.
66 Tayta Dios, rabyanashqa castigarnin kay patsapita paykunata illakaykatsillay.