Ezequielqa Tayta Diosta sirviq sacerdötimi karqan. Babilonia nacionpa mandaqnin rey Nabucodonosormi paytawan chunka waranqa (10,000) runakunata Judá nacionpita Babilonia nacionman apakurqan (2Rey. 24.14-16). Tsay wata karqan 597 a. C. Tsaynöpami Judápita aywaq marka mayinkunawan Babilonia nacioncho Ezequiel tarqan.

Babilonia nacioncho tarmi Israel runakuna pasaypa llakikuyarqan (Eze. 37.11). Tsaynöpis wata 586 a. C.-cho Diospa templunta y Jerusalénta Babilonia soldädukuna ushakätsiyaptinmi wakinkuna yarpäyarqan Tayta Dios munayniynaq kanqanta. Tsaymi kay librucho runakunata Tayta Dios tantiyatsirqan munayyuq y jutsaynaq santu kanqanta y runakuna jutsa rurayanqanpita castiganqanta. Tsaynöpis tantiyatsirqan kuyanqan runakunata qoriskir payta cäsukuyänanpä mushuq shonquta y Espïritunta paykunata qarananpä kanqanta (\xt Eze. 36.24-28).