2 (Tsay päsarqan Israel runakunatawan rey Joaquínta Babiloniaman prësu apayanqanpita pitsqa wataman aywaykaptinmi.^† Chusku killa pitsqa kaq junaqchömi 3 Buzipa tsurin sacerdöti Ezequielta Tayta Dios parlaparqan. Tsayqa karqan caldeo runakuna täyanqan Babilonia^a nacioncho Quebar mayu kuchunchömi.)

4 Tsaychömi rikarqä nortiläpita shukukuy shamuykaqta y pukutay tsaparaykämuqta. Tsay pukutaymi illaqukuynörä chipipiykarqan. Pukutay chawpinchömi nina lunyar atsikyaykarqan. Nina chawpinchönami imayka broncinörä pasaypa chipipiykarqan.

5 Tsay chipipiykaq chawpinchönami chuskuq runa niraqta rikarqä. 6 Cada ünunkunami kayarqan chusku qaqllayuq y chusku älayuq. 7 Chankankunaqa derëchullami karqan. Shillunkunanami becërrupa shillunnö karqan. Llushuyätsishqa broncinörämi chakinkuna y shillunkuna chipipïyarqan. 8 Chuskun älankuna rurinchömi runapa makinnö makinkuna karqan. Cada ünunkunami chusku qaqllayuq y chusku älayuq kayarqan. 9 Älankunaqa jukninpa älanwanmi töpanakuykarqan. Mayqanläpapis mana tikraypami aywayarqan.

10 Frenti kaq qaqllankunami karqan runapa qaqllannö. Derëcha kaq qaqllankunami karqan leonpa qaqllannö. Itsuq kaq qaqllankunami karqan törupa qaqllannö. Qepanpa kaq qaqllankunanami karqan ankapa qaqllannö.^† 11 Tsaynömi qaqllankuna karqan.

Ishkay kaq älankunata junishpa mashtaptinmi wakin kaqpa älankunawan töpanakurqan. Mas ishkay kaq älankunanami cuerpunkunata tsapararqan. 12 Diospa Espïritun pushaptinmi qepapa mana tikraypa defrenti aywayarqan.

13 Runa niraq chusku älayuqkunaqa kayarqan imayka shansha pukaypa pukar rawraykaqnö^† y oqsha aktsiwan wakläpa kayläpa puriykäyaqnömi. Nina lunyaykaqqa pasaypami chipipirqan. Illaqukuypis ninapitami yarqamurqan. 14 Runa niraqkunata rikaykanqäkunaqa illaqukuynömi wakläpa kayläpapis aywayaq.

15 Runa niraqkunata rikaraykanqächömi rikarqä paykunapa chakincho chusku ruëdakuna patsacho kaykaqta. 16 Tsay chuskun ruëdakunaqa tsay niraqllami kayarqan. Crisólito ruminömi chipipiyninpis karqan. Cada ruëda chawpinchömi juk ruëda cruzaypa kaykarqan. 17 Tsay runa niraqkuna mayqanläpa aywarpis manami tikrayaqrätsu.

18 Ruëdakunapa ärunmi mantsaypä jatunkaray karqan. Tsay äruchömi jirurushtillan atska ñawikuna kayarqan.^† 19 Runa niraqkuna aywayaptinqa ruëdakunapis aywayaqmi. Patsapita junishpa joqarikäyaptinqa ruëdakunapis joqarikäyaqmi. 20 Diospa Espïritun pushanqan kaqpa runa niraqkuna aywayanqan kaqmanmi ruëdakunapis aywayaq. Tsaynö karqan runa niraqkunacho y ruëdakunachöpis Diospa Espïritun kaptinmi. 21 Runa niraqkuna aywayaptinqa ruëdakunapis aywayaqmi. Manana aywayaptinqa ruëdakunapis mananami aywayaqnatsu. Tsaynöllami patsapita joqarikäyaptin tsay ruëdakunapis joqarikäyaq. Tsaynö karqan runa niraqkunacho kaykaq Diospa Espïritun ruëdakunachöpis kaptinmi.^†

22 Runa niraqkunapa uman jananpanami pasaypa atsikyaykaq espëjunörä mashtaraykarqan.^† 23 Tsay mashtaraykaq rurinchönami runa niraqkuna älankuna mashtashqa kaykäyarqan. Tsaynö karmi ishkay älankunapa puntankuna wakin kaqkunapaman töpanakushqa kaykäyarqan. Ishkay kaq älankunanami cuerpunkunata tsaparaykarqan.

24 Paykuna aywayaptin älankuna sapsapyanqan jinchimi wiyakarqan. Tsay karqan pasaypa jakashqa mayu bunyanqannö, llapanpä munayyuq Tayta Diospa vozninnö, atska runakuna parlayanqannö y atska soldädukuna qayaräyanqannömi. Aywaykäyanqancho ichiskiyaptinqa älankunapis qorikaskiqmi. 25 Älankuna qorishqa ichiraykäyaptinnami ciëlupita jinchi parlamuqta wiyarqä.

26 Runa niraqkunapa janan ciëluchönami rikarqä zafiro rumipitanö rurashqa trönu kaykaqta. Tsay trönuchömi juk runa niraq jamaraykaqta rikarqä.^† 27 Tseqllanpita janamanmi wayllashqa broncinö chipipiykaqta rikarqä. Tseqllanpita uramannami rikarqä nina tsariykaqtanö.^† Entëru ñöpanpanami pasaypa atsikyaypa atsikyaykarqan. 28 Tsay atsikyayqa kaykarqan qori chirapacho tseqyaw shanshaypa shanshar atsikyanqannörämi. Tayta Diospa chipipiyninta rikaykurmi patsaman lätakaykurqä. Tsaychömi parlamuqta wiyarqä.